Ads by Google Ads by Google

Ua faamalosia pasese uma o le Malaga Toe Taliu #5 ia kuarenitini i le taunuu mai


[ata: foa'i]

PAGO PAGO, Amerika Samoa – I se pepa o fa’amatalaga mai le COVID-19 Task Force ua fa’ailoa ai e fa’apea, o le malaga toe taliu mai #5 o loo fuafua e taunuu mai i le Aso Lua, Iuni 1, 2021, ole a le faataunuuina le fuafuaga e malaga sa’o i aiga le ‘au pasese ua tuipuipuia atoa.

 

Ina ua toe iloiloina fuafuaga o le tatala atu i aiga ma le toe aliali a’e i su’ega o nisi o loo kuarenitini i Hawaii ua maua i le KOVITI i le faai’uga o le vaiaso, na toe fuli ai ananafi le tonu a le Faatino Galuega KOVITI ma toe taofi ai pasese ua tuipuipuia atoa.  

 

O ia tagata e to’alua ua maua i le KOVITI e aafia ai ma nisi pasese ua tuipuipuia ae sa iloa a’e i su’ega sōloi o Me 28. E ta’u ia o “breakthrough cases” – “tulaga osofia”. E tupu lea  tulaga pe afai ua toe maua i le faama’i se tasi ua atoatoa ona tuipuipuia mai lea faama’i. I le manatu o le Nofoaga Tutototnu e Pulea ma Puipuia Faama’i (CDC), e faatalitalia (expected) ni tulaga osofia ona e leai se tuipuipui e 100%, a ua iai faamaoniga o le aogā o le tuipuipui e faaitiitia ai le matuiā o le gasegase pe afai e maua ai le ua tuipuipuia. 

 

O le to’alua ua osofia ma le to’alua sa fesoota’i lalata ane i ai ua faaoo i le Matagaluega Soifua Maloloina a Hawaii, ma ua aveesea mai le faigamalaga. 

 

I le fonotaga a le Faatino Galuega i le Aso Gafua, Me 31t, 2021, na saunoa ai le Ta’ita’ifono Afioga Sui Kovana Talauega Eleasalo Ale, e le’i sauni le Faatino Galuega e tatala atu le au malaga i le taunuu mai i le malaevaalele. I lana saunoaga, e 45 minute e faasolo ai suega o KOVITI i le taunuu mai ma maua i’uga, ma afai e maua se isi i suega, e toe faia foi le isi suega e faamautu ai le suega muamua. O le fuafuaga ua iai nei o le ave uma o le au malaga i le Faletalimalo Tradewinds e faataunuu ai suega. Aepeita’i ona o i la’ua na maua i suega o le KOVITI e iai ma nisi ua atoa tuipuipui, ua fautuaina nai e le Matagaluega Soifua Maloloina mo le saogalemu ma le puipuiga o le soifua maloloina, ua tatau ona kuarenitini uma le au malaga mo le 7 aso i le Tradewinds. Ua lagolagoina ma e le Faatino Galuega lea fautuaga. 

 

Na saunoa Talauega, le Sui Tofia o le Kovana, i le au faigaluega o le kuarenitini i Hawaii o loo taitaia e le Faatonu o le DOH, Motusa Tuileama Nua ma le Faatonu o le Medicaid Sandra King-Young ia faamautinoa ua nofouta le au malaga i le suiga ua iai. O loo iai le manatu o i latou ua tuipuipuia atoa e malaga sa’o i o latou aiga i le taunuu mai i Amerika Samoa. O le taimi ua faaopoopoina i le kuarenitini ai ua lata ai i le masina atoa o faanofoesea le au malaga.  E ui i le manatu alofa i le au malaga, ae tatau ona faaeteete le Faatino Galuega pe a manatu i isi ituaiga poo vala o le KOVITI ua aafia ai nei nisi e oo lava ia i latou ua atoatoa ona tuipuipuia. 

 

O le aofa’i o le malaga #5 ua iai nei e 212, ma o le a kuarenitini uma i le Tradewinds.