“Ta Mau le Faamoemoe…i le Atua”

O le 2 i le aoauli o le aso Sa na se’i mavae atu nei, na tatala aloaia ai polokalama mo le fa’amanatuina o le 125 tausaga, o le maliliega i le va o Tutuila ma Manu’a ma le malo tele o Amerika, i se sauniga lotu sa fa’ataunu’uina i le malumalu “Ua Taunu’u” a le Ekalesia Faapotopotoga Kerisiano a Amerika Samoa i lona laumua i Kanana Fou, i Tafuna.

O le manulauti o le faamoemoe i lenei tausaga, ua fa’aautuina “Ta Mau le Fa’amoemoe”. 

Na fa’atumulia le malumalu i Kanana Fou, i taitai o le malo, na aofia ai le afioga i le kovana Pulaalii Nikolao Pula ma le faletua ia Lois Phillips-Pula faapea le afioga i le sui kovana, ia Pulumataala Ae Ae Jr. ma le faletua ia Titilupe Ae, faapea ma le kapeneta.

E le gata i lea, sa auai ai foi ma le afioga i le Peresetene o le Senate, Tuaolo M. Fruean ma le afioga i le Fofoga Fetalai, Savali Talavou Ale aemaise afioga i Senatoa ma Faipule.

Sa faapea foi ona auai ai ma le afioga i le Faamasino Sili, Lealaialoa F. Michael Kruse ma le aiga faamasino.

O le susuga i le Taitaifono EFKAS Faifeau Toeaina Fa’aeteete Saifoloi, na fofogaina le lauga autu o le sauniga, aua se timaiga ma se fa’amalosi’au, e le gata mo ta’ita’i o le atunu’u, ae faapea ona tagata, a’o alo atu mo le fa’amanatuina o le sisiga fu’a o lenei tausaga.

Sa fa’aautuina manatu a le susuga i le faifeau toeaina i le manulauti o le Sisiga Fu’a o lenei tausaga, “Ta mau le Faamoemoe” ma ia faaopoopoina ia upu “i le Atua”.

Na saunoa Rev. Elder Saifoloi, O le mea o iai le ola, e iai le faamoemoe.  O le mea e iai le faamoemoe, e iai le ola.  Ae a tineia le faamoemoe i lenei olaga, ona o tiga ma faigata, o le a leai se faamoemoe.  O le tineia o le faamoemoe, o le fili sili lea ona leaga.

Sa ia tima’i mai e faapea, “Faamoemoe e le uma i le Atua.  E ou le ola ma le malosi uma lava.  Ta mau i lou faamoemoe.  O le a lou faamoemoe Amerika Samoa?  Faamuamua le Atua i mea e manatu iai.”

“Faamuamua le Atua, o lau tagavai mai anamua, anamua lava.  Na fausia e o tatou matua ma tua’a, ua ta’o’oto mai i tia sa.  125 tausaga o sisi pea ma manumalo pea tagavai o Amerika Samoa.  E le toe tautalagia, ua pine, ua taoto, ua mau.  Taofiofi mamau, e o tatou tua’a ma matua.  O le feau foi lena mo lenei aso.  Ta mau lou faamoemoe i le Atua”.

Na fautua mai foi le taitai fa’aleagaga e faapea, o le faamoemoe, e na te talepeina le faiaina, e ave’ese le toilalo ma le mataga o le olaga, le faamoemoe talosia o matua ma aiga mo le ola ina ia maua manuia.  A o’o mai faaletonu ma tiga o le olaga, ona tulai mai lea o le faavaivai, o le solomuli,  le ola palaai, o le fefe, o le tautevateva o le olaga.  Ona o’o ai lava i le saofa’i ma o’o atu ai lava i le ‘ava, fualaau faasaina ma nisi mea ua a’afia ai le atunu’u.

Ma ia toe fa’amamafa mai ina ia “Ta mau le faamoemoe i Atua, e afua ai lo tatou malosi”.

O le fa’aauau ai o le polokalama mo le Sisiga Fu’a, i le afiafi ananafi, sa amataina ai fa’afiafiaga a le “Arts Council ma le Humanities” i le Malaeoletalu, e pei ona masani ai i tausaga ta’itasi, ma o le a fa’aauauina se’ia o’o i le afiafi o le aso Lulu.

Ae o le taeao, o lo’o fa’amoemoe e fa’ataunu’uina ai Fa’agatama i le Tai, pe a tulaga lelei tala o le tau.  E 11 sa mai afioaga ‘ese’ese ua nofo sauni e tauva i lenei tausaga.  Ae peitai, e pei ona fa’alauiloa mai e le komiti o tu’uga fautasi, a le Ofisa o Mataupu tau Samoa, afai ae tulaga faaletonu tala o le tau, o le a faapea ona toe tolopoina tu’uga va’a mo le aso Lulu, ae o le a fa’apu’upu’uina le tu’uga, i le 3 maila.

Ma o le a vaeluaina ia Sa i ni tu’uga e lua.  E 6 fautasi o le a tauva i le tu’uga muamua, ma le 5 i le tu’uga lona lua.  O le tulaga 1-4 mai i le tu’uga muamua ma tulaga 1-3 i le tu’uga va’a lona lua, o le a faapea ona saili siamupini.

O le 8:00am i le taeao neif oi, o le a tatalaina ai le polokalama mo le fa’amanatuina o le 250 a le Fuava’a a le Malo Tele, i le Stadium.  Ae o le 6 i le afiafi, o le a faia ai se fa’aaliga fa’apitoa a le faili pu a le Fuava’a i le Malaeoletalu.

O le afiafi o le aso Lulu, o le a fa’afiafia ai le fa’ili pu a le Maligi i le Malaeoletalu.

Ae o le 6:30 i le taeao o le aso Tofi, o le a faapea ona sisiina ai tagavai a le Malo Tele faapea le malo o Amerika Samoa i le Malaeoletalu, i Fagatogo, faatasi ai ma le Faitauina o le Fa’aaliga Fa’alauaitele o le Sisiga Fu’a ma le ‘Ava o Feiloaiga.

Ona fa’aauauina ai lea o le polokalama i le Stadium i Iliili, lea e aofia ai solo fa’aaloalo ma fa’afiafiaga mai i le Ekalesia Faapotopotoga Kerisiano a Amerika Samoa (EFKAS), Ekalesia a Iesu Keriso ole Au Paia o Aso e Gata Ai ma le Ekalesia Metotisi.