Ads by Google Ads by Google

Fa’amanino e le Taitaifono o le Komiti ASTCA faaiuga faasaga i le CEO


[ata: foa'i]
ausage@samoanews.com

Pago Pago, AMERIKA SAMOA

Na faamanino e le Taitaifono o le Komiti Faafoe a le Pulega o Fesootaiga a Amerika Samoa (American Samoa Telecommunication Authority-ASTCA) i le Samoa News, o le faaiuga ua mae’a ona faia i le Tamaitai sa avea ma Pulesili o le ASTCA, e faamalolo mai lona tofiga, “o se faaiuga sa faia e tusa ma le tulafono.”

I se talanoaga ma le susuga Aleki Sene Jr i le vaiaso na te’a nei e uiga i lenei mataupu, sa ia faamanino ai le auala na tuuina atu ai le faaiuga a le Komiti Faafoe e tusa ai o le mataupu e pei ona faamalolo ai le Tamaitai sa avea Pulesili o le ASTCA ia Falavaoto Sualevai mai lona tofiga sa i ai.

“O le faaiuga sa matou faia faasaga ia Sualevai, e le gata na matou mulimuli i le tulafono, ae sa matou faaeteete fo’i i tulaga uma sa matou vaavaai i ai ina ia mautinoa o loo uia uma ala o le tulafono,” o le saunoaga lea a Sene Jr i se talaoaga ma le Samoa News i le vaiaso na te’a nei. 

E le i tele ni faamatalaga na mafai ona ofo mai e le Taitaifono o le Komiti Faafoe a le ASTCA ina ua fesiligia o ia e le Samoa News, i isi fo’i tulaga o le mataupu. Pau lana saunoaga na tuuina mai, o le tusi lea na tuuina atu ia Sualevai e faamalolo ai o ia ma lana galuega, o lo o auina faatasi atu ai ma aso e 30 e mafai ai ona tali mai e tusa ai o sona finagalo e faatatau i lenei mataupu.

“Pau ia o faamatalaga e mafai ona ou tuuina atu i lenei taimi e faatatau i le mataupu e uiga i le Pulesili a le ASTCA. Pau le isi tulaga e mafai ona ou faamaonia atu, ua mae’a ona tau aao atu le tusi ia Sualevai e faailoa ai le faamuta aloaia o lana tautua, o lo o faatali le Komiti Faafoe mo se tali mai a Sualevai e tusa ai o le faaiuga ua faia faasaga ia te ia,” o le saunoaga lea a Sene Jr.

Ina ua fesiligia e le Samoa News le mafua’aga o le faaiuga e faamalolo ai Sualevai mai lana galuega, na saunoa Sene Jr, “E le mafai ona ou faailoaina atu nisi faamatalaga auiliili e faatatau i le mataupu se’i mae’a aloaia taualumaga o gaioiga o loo faia ona mafai lea ona toe tuuina atu se isi faamatalaga i le lumana’i.”

I le mataupu e faatatau i le tofa ia Iulogologo J. Pereira lea sa avea ma totino o le Komiti Faafoe, na faamaonia e Sene Jr i le Samoa News e faapea, e le o toe avea Iulogologo ma totino o le Komiti Faafoe a le ASTCA i le taimi nei. O le masina o Ianuari o le tausaga nei lea na tuuina mai ai le Poloaiga Faapitoa mai le afioga i le ali’i Kovana ia Lemanu P. S. Mauga e tofia ai totino fou e to’a 7 o le Komiti Faafoe o le ASTCA.

Na ta’ua e molimau e malamalama lelei i lenei mataupu i le Samoa News e faapea, o le mafua’aga autu na ala ai ona gaioi le Komiti Faafoe e faamuta le auaunaga a Sualevai mai le avea ma Pulesili o le ASTCA, ona o sana konekarate e galue ai mo le isi 5 tausaga na mafai ona maua e le Komiti Faafoe.

O lea konekarate e fa’aauau ai le tautua a Sualevai mo le isi 5 tausaga na sainia to’atasi e le tofa Iulogologo i le taimi a o avea o ia ma totino o le Komiti Faafoe a le ASTCA, ae o ia fo’i o le Taitaifono o le Komiti Faafoe.

Ina ua manino i le Komiti Faafoe le konekarate ma le auala na faatino ai, na fono ai loa le sui o le Komiti Faafoe ma soalaupule le mataupu. 

E ese mai i le talanoaina o le mataupu i le konekarate, ae sa talanoaina ai fo’i ma le mataupu i isi tagata faigaluega e to’alua (2) o loo masalomia le i ai o ni itu e feteena’i ai la latou auaunaga ma le tulaga o le Pulesili. O ia tagata faigaluega e aofia ai le Pule o le Vaega o Tagata Faigaluega a le ASTCA, faapea ai ma se ali’i faigaluega sinia o loo masalomia, o loo uo lea a le tamaitai Pulesili o le Ofisa.

I le 2 vaiaso talu ai, na tuu mai ai se pepa o faamatalaga na malilie faatasi ai le Komiti Faafoe a le ASTCA ma le Ofisa o le afioga i le ali’i Kovana ia Lemanu P. S. Mauga, ma latou faailoa aloaia ai le filifilia o le susuga a Chuck Leota na te tauaveina le Tofiga o le Pulesili le tumau mo le ASTCA i le taimi nei. 

O le susuga a Leota sa Faauluulu i ai le Vaega o Faasalalauga ma Fefaatauaiga a le ASTCA (Sales Division), a o lea ua tofia e sui tulaga i le tamaitai ia Sualevai mo se taimi le tumau, se’i mautu fuafuaga uma ona filifilia lea o se tasi na te tauaveina le tofiga, pe a mae’a ona uia uma ala o le tulafono. O le aso 24 o Mati, 2021 na te’a nei na aloaia ai le avea o le susuga a Leota ma Pulesili le tumau o le ASTCA.

Na taua i le pepa o faamatalaga e faapea, o le susuga a Leota, o se tasi o tagata faigaluega ua leva lana tautua i le Faalapotopotoga o Fesootaiga, ma ua lava lona tomai i le faatautaia o galuega faa ta’ita’i. O ia o se tagata e i ai le agava’a i galuega eseese, atoa ai ma tulaga tau Pulega, Pisinisi ma Fefaatauaiga.

“O agava’a ma tomai eseese o loo i ai i le susuga a Leota, ua mafai ai ona faamautuina le talitonuga, ua lava ma totoe lona tomai ma le aoaoga sa ia ausia na te tauaveina ai lenei tulaga mo se taimi le tumau, a o faagasolo ai galuega faatino a le Komiti Faafoe ma le Pulega a le ASTCA,” o le saunoaga lea a le afioga i le ali’i Kovana ia Lemanu i le pepa o faamatalaga na tuuina mai i le au faasalalau i le 2 vaiaso talu ai e faamanino ai fesuiaiga ua faia.

O le masina o Ianuari o le tausaga nei, na tuuina mai ai e le afioga i le ali’i Kovana sana poloaiga e faalauiloa ai totino fou e to’a 7 o le Komiti Faafoe a le ASTCA, faapea ai ma le filifilia o le Taitaifono o le Komiti Faafoe, le susuga ia Aleki Sene Jr, o ia fo’i o le isi totino fou e 7 i ai totino fou ua filifilia.

O isi totino na taua e Lemanu i lana tusi i le Fono Faitulafono e aofia ai le susuga a Omar Shallhout ma Seumalo Sofa, o i latou ia e to’atolu (3) i ai sui mai le Vaega o le Aufai Pisinisi i le atunu’u.

O isi sui e to’afa (4) e filifilia mai i le atunu’u lautele e aofia ai le afioga i le ali’i Senatoa ia Utu Sila Poasa; Alofagia Nomura; Taiulagi Mauga ma Tuni Tauiliili. O ta’i 2 tausaga le umi e galulue ai i latou nei e fai ma totino o le Komiti Faafoe ona toe iloiloina fo’i lea o latou agava’a.

Ae pei ona silafia, na faasalalau e le Samoa News i le masina o Tesema o le tausaga na te’a nei, ao i ai pea le faigamalo ua mavae atu a Lolo ma Lemanu i le ta’ita’iina o le malo, na sainia ai e Kovana Lolo Matalasi Moliga se poloaiga e toe tofia ai totino e to’afa (4) o le Komiti Faafoe a le ASTCA ina ia faaauau le avea o i latou ma totino o le Komiti Faafoe mo le isi 2 tausaga, lea e mae’a ia Tesema 2022.

O le poloaiga lea a Kovana Lolo na faaleaoga ina ua tuuina mai e Lemanu lana poloaiga i le masina o Ianuari o le tausaga nei, e filifilia ai totino fou e to’a 7 o le Komiti Faafoe.