Los Angeles - KALEFONIA

O le vaiaso ua mavae, na I’u manuia ai taumafaiga a le susuga ia Mark Sauvao, lea sa faia sana tagi e fa’asaga i le a’ai o Los Angeles (LA), i Kalefonia, e tusa ai ma le fa’ailoga lanu o ana supavaisa i totonu o lana galuega, ona o lona pito Samoa.

O Sauvao, o se leoleo i totonu o le a’ai o LA ma sa galue faatasi o ia ma ta’ifau faapitoa a le ofisa a leoleo, ae peitai, sa ia tu’ua’ia ana supavaisa i le fa’asalaina sese o ia, ina ua ia lipotia nisi sa o latou galulue faatasi, ona o le lauina o ia i ni igoa e taufaifai ai i lona pito Samoa. 

Sa lipotia foi seisi o ana supavaisa i le valaauina o ia (Sauvao), o se Tonga, o se tulaga na le fiafia ai Sauvao ona o talafaasolopito i le va o tagata Samoa ma tagata Tonga.

I tu’ua’iga sa faaulu e Sauvao, sa ia ta’ua ai le faia e leoleo o ni faamatalaga le faamaoni e fa’asaga ia te ia, e aofia ai lona musu e a’oa’o leoleo e gafa ma taifau faapitoa, se’ia vagana ua o latou tu’uina atu a latou ‘overtime’ mo ia.

E tusa ai ma le lipoti a le nusipepa o le LA Times, o lo’o iai pea le avanoa e toe lu’i ai e le a’ai ia le aofaiga o le tupe ua manumalo ai Sauvao, i lana tagi.

Mai i le tausaga e 2005 seia o’o mai i le 2017, sa galue ai Sauvao i le vaega a le Ofisa a Leoleo e gafa ma taifau faapitoa (K-9) a le ofisa a leoleo.  E 30 tausaga na galue ai Sauvao i totonu o le ofisa a leoleo.  Ma sa ia ta’ua e faapea, na amata ona tulai mai le mataupu lea sa fa’avae ai lana tagi, ina ua si’itia lona tulaga i totonu o lana galuega.

Na ta’ua e Sauvao, ina ua fa’alogo i faamatalaga ua salalau e uiga ia te ia, sa ia talosagaina le taitai o le latou iunite, le susuga ia Lt. Raymond Garwin, ina ia faia se su’esu’ega e tusa ai ma lea tulaga.  Ae peitai, sa ta’ua e Sauvao, e leai se mea na faia.

Sa molimau foi seisi e galulue faatasi ma Sauvao, sa faamatalaina e Garvin ia tu’uaiga o ‘ovataimi’ e faasaga ia Sauvao, i isi leoleo i se latou tauvala’auga na faia i se fale’aiga lata ane.  Sa tu’uaia ai e se tasi i lea faalapotopotoga ia Sauvao, o le taitai o se vaega i totonu o le iunite K-9, e fa’aigoaina o le “P.M.-Watch Mafia”.  O ia tu’uaiga sa te’ena e Sauvao.

Sa faila foi e Garvin sana ia tagi e fa’asaga i le ‘a’ai o LA, e faapea, na taupulepule nisi o taitai maualuga a lo latou ofisa, e tuli ese o ia mai i le latou iunite ma sa faamanuiaina le tagi a Garvin ma maua ai lana vaegatupe e $700,000.

Sa ta’ua e Sauvao, na o’o lava ina ona ia fa’ao’oina atu lenei mataupu i le kapetenei o vaega a le EMS, ia Kathryn Meek.  O ia lea o lo’o va’aia le iunite a le K-9 ma le ‘bomb squad’.  Ae peitai sa ta’ua e Sauvao, e le’i faia se su’esu’ega i ana tu’uaiga, ae peitai, i ni nai masina mulimuli ane, na su’esu’e ai e vaega su’esu’e faalotoifale ia lana ‘locker’.  Ma o se tulaga na talitonu Sauvao, o se taui ma sui ona o lana fa’asea.

Sa ta’ua foi e Sauvao ia le teena o sana talosaga, ina ua mae’a ona su’esu’eina lana ‘locker’, mo se feso’ota’iga ma se sui o le iuni a leoleo.

I se taimi mulimuli ane, na faatonuina ai Sauvao e auai i se suesuega faalemafaufau (psychiatric testing) ma i’u ai lava ina toe sui ma ona tiute, sa tu’u’ese’ese ai i la’ua ma lana ta’ifau K-9, o Pistol, e pei ona ta’ua i totonu o lana tagi.

Sa ta’ua e le loia a Sauvao, o Matthew McNicholas, le tele foi o nisi tagi sa faila e ni isi o le aufaigaluega a le iunite K-9, sa ia fa’afoeina ma manuia fa’ai’uga.  Sa fa’aalia e McNicholas, i le 2008, e lua ni tagi sa ia fa’afoeina ma na maua ai le $3.6 miliona ma le $2.2 miliona.

Saunoa McNicholas, o lea ua atoa le 15 tausaga, ae o lenei lava e iai faafitauli faapea o lo’o tulai mai i totonu o lenei iunite, e fa’ailoa mai ai le fa’aauau pea ona iai fa’aletonu i le ta’ita’iga.