Pago Pago - AMERIKA SAMOA

O le aso Gafua na sei mavae atu nei, na tatalaina aloaia ai le Tauaofiaga Tuufaatasi Faapitoa a le nofoaiga lona 38 a le Fono Faitulafono i lalo o se faatonuga mai i le afioga i le Kovana Sili, Lemanu P. S. Mauga, i le toe tasi le tausaga ma nai masina o totoe o le Faigamalo o iai nei.

O lenei tauaofiaga faapitoa e iloiloina ai ni mataupu autu se lua, o tupe faasoasoa mo ni poloketi se lua – o le tasi e mo le paketi o le tausaga tupe 2024, lea e faasoasoa ai le $3.1 miliona o tupe aoina mai i le tausaga tupe 2022, lea o lo o finagalo le kovana e faaopoopo i le paketi o le tausaga tupe o le 2024,, o leisi $36 miliona e mai tupe aoina na totoe mai i le tausaga tupe o le 2023.

O le $36 miliona lea sa taoto i le faaiuga o se iloiloga a le fono faitulafono, ina ua tulai mai se mataupu e faapea, ua mae’a ona fa’aaoga le $36 miliona lea, ae e le o ma’oti mai se ripoti i poloketi po o polokalama sa fa’aalu ai.

Na uluai faaooina atu e le kovana le mataupu i le $36 miliona i luma o le Fono, e ala i se feiloaiga ma le Peresetene o le Senate, le afioga Tuaolo Manaia Fruean faapea le Fofoga Fetalai, le afioga Savali Talavou Ale, i le vaiaso lona tolu o Setema o le tausaga nei.  Sa maua e maota uma e lua le avanoa e iloiloina ai lenei pili ma tonu ai o le a toe taoto lea pili seia toe tauaofia le Maota Fono i le tausaga fou.

O le $3.1 miliona e mai i poloketi na taofia e le kovana i le tupe faaopoopo e $22 miliona, i se pili na suia ma pasia e le maota fono, ae na tete’e ai le kovana.  O se tasi o nei poloketi o le $3.1 miliona faaopoopo e aofia ai le $1 miliona mo le faamanatuga o le aso fanau a le Fono.  I totonu o le pili o le tupe faasoasoa (SB 38-27) e le o ma’oti mai ai le tinoitupe, seia vagana ai o lo o ta’ua o tupe aoina na totoe mai i le tausaga tupe 2022.

I le tatalaina o le tauaofiaga faapitoa a le maota fono, na aloaia ai e le afioga i le Fofoga Fetalai le auai o taitai uma, e aofia ai le afioga i le kovana sili, le peresetene o le Senate ma afioga i Senatoa, o le Fofoga Fetalai ma Faatonusili, ae e le i fofogaina e le Failautusi Sinia o le Maota o Sui, le susuga Vaiaitu M. Maluia ia le valaau a le Kovana.

O le Sui Failautusi ia Motusaga Peleti sa fofogaina le tauvalaauga ma faamaonia ai le auai o afioga Senatoa e to’a sefulutasi (11) ma Faipule e to’a sefuluvalu (18).  E tofitu (7) Senatoa e le i mafai ona auai, faatasi ai ma faipule e toalua (2).

I lana saunoaga, na fa’aalia ai le agaga fa’afetai o le afioga i le kovana sili i le tu’uto a sui faitulafono i lenei galuega ma ia saunoa ai e faapea, a aunoa ma le latou lagolago i le pasiaina o nei pili ma iugafono, aemaise lava i mataupu taua, e le mafai ona ausia faamanuiaga ua maua i nei vaitaimi.  Na ta’ua foi e le kovana le si’itia o tala o le tupe i totonu o Amerika Samoa ona o la latou tautua.  

Ae sa ia faamanino mai foi, ona o tulaga le ma’alofia, ua a’e ai se manatu ina ia tatalaina lenei tauaofiaga faapitoa, e faasoa atu ai manatu ma saili le lagolago ina ia mafai ona fa’aauaina galuega a le faigamalo.

Na saunoa Lemanu, o lo o iai faamaoniga o fesoasoani mai i le malo feterale ma tupe lotoifale, e mafai ona toe fausia ai le teritori, e aofia ai ma tupe maua mai i le koviti-19.

Na faapea foi ona saunoa le kovana nisi o tulaga o avea pea ma puniala, e pei o suiga i le tau.  Ae sa ia ta’ua le tele o inivesi a le malo feterale i totonu o le teritori, ua mafai ai ona tali atu le faigamalo i nei puniala ma faafitauli, ma faamautuina le saogalemu ma le soifua maloloina o tagata o le atunu’u.

Na saunoa Lemanu i le tele o tulaga ua faalelei i totonu o Amerika Samoa, ona o le galulue faatasi a le Fono Faitulafono ma le faigamalo a Lemanu ma Talauega.  Ma o lea na u’unaia ai e Lemanu ia le Fono Faitulafono ina ia pasia le paketi ua taoto nei i o latou luma, aua le talia o manaoga o tagata o Amerika Samoa.

Sa faapea foi ona fofogaina e le kovana ia faafitauli e ono tulai mai pe afai ae le pasia nei iugafono, e le gata i le aafiaga i tala o le tupe I totonu o le teritori, ae faapea foi le ave’esea o avanoa e maua mai ai fesoasoani tau tupe mo le malo.

I le auiliiliina o nisi o poloketi o lo o aofia i le pili mo tupe faaopoopo, na fa’ailoa mai ai e Lemanu, le $2.5 miliona mo le Medicaid ma le $1.5 miliona e toe totogi ai tupe a le Koviti lea na fa’aaoga i nisi o galuega lotoifale, e aofia ai ma le $36 miliona lea na fa’atau ai le va’a mai ia Papalii Laulii Alofa ma nisi o mea sa fa’aaoga ai tupe o le Koviti lea na maua mai i suegatusi a le malo feterale.

Atoa ai ma le auiliiliina o tupe faasoasoa o tupe na totoe mai i le tausaga e 2022, mo le $3.1 miliona e faatupe ai le aso fanau a le maota fono lea o lo o loma nei, o galuega tau i feamalagaiga ma nisi o poloketi faaletulafono, siosiomaga ma le faasaoina o le aganu’u.

Na saunoa Lemanu, o lo o manaomia le pasiaina o nei iugafono aua le puipuia o le lumanai o Amerika Samoa ma ona tagata.

O le afioga i le peresetene o le Senate sa tali fuaitau i le saunoaga a le kovana ma ia fofogaina ai le agaga faafetai i le kovana ma le faigamalo, ae sa ia toe faamanatu atu i le kovana, e toe tasi le tausaga ma masina o totoe i le faigamalo, ae o lea fa’ato’a talo le uluai tauaofiaga faaptioa a lenei faigamallo ma na saunoa foi Tuaolo, e le fou lenei tulaga o tauaofiaga faapitoa.  Ae e tolu mataupu o lo o finagalo le kovana e ao ona iloiloina, lea e aofia ai ma le $1 miiliona o le ofisa o le kovana, $1.5 mo le Fono ma le lisi a le FFAS.

Sa saunoa Tuaolo i le taua o le lisi a le FFAS mo le atunu’u, ae sa ia toe faamanatu atu foi i sui faitulafono, le $36 miliona lea ua mae’a ona fa’aaoga.  E le i aveina e le kovana po o lana faigamalo, ae ua maea ona fa’aaoga, ma ua maea ona faamanino mai le fa’aaogaina.  Ma sa ia fa’aalia lona agaga fa’afetai i le kovana i lona lotele e fa’ailoa mai ai lea mataupu.  Ae o le a talanoaina i se taimi mulimuli ane.

Sa faapea ona fa’alauiloa mai e le Fofoga Fetalai le amataina o iloiloga a maota eseese i le aso ananafi ma o lenei tauaofiaga faapitoa o le a le silia ma le sefulu aso.