Ads by Google Ads by Google

Faamavae atu le LBJ i ni faifeautalai faapitoa a le ekalesia a Iesu Keriso na galulue i le LBJ


O se va’aiga i le alii ma foma’i o le vaega o Nifo faapea le Fatu, a le LBJ, ae le gata i lea o nisi o taitai o le LBJ faatasi ma le susuga ia Dr. Eric Carter ma le faletua, i le latou pati fa’amavae sa faia i le DDW i le lua vaiaso talu ai. [ata foa’i]

Pago Pago - AMERIKA SAMOA

O le vaiaso ua mavae, sa faataunu’uina ai se fa’atasiga i le fale’aiga a le DDW i Utulei, e momoli atu ai le fa’amalo ma le fa’afetai i le susuga i le alii fomai mai Amerika, o Elder Dr. Melvin Eric Carter ma si ona faletua o Allison Carter, ona o le la tautua matavela mo le falema’i autu a le malo i Faga’alu (LBJTMC), aemaise mo tagata o Amerika Samoa.

O Dr. Carter o se fomai faapitoa o le fatu, ae o si ona faletua o se tausimai pasi.

Sa malaga mai lenei ulugalii, o se vaega o le polokalama fa’afaifeautalai a le Ekalesia a Iesu Keriso o le Au Paia o aso e Gata Ai, e galulue ma tautuaina le atunuu e aunoa ma se totogi.

Ua toatele nisi o le atunu’u ua fa’amanuiaina ona o le auaunaga a i la’ua, e le gata o gasegase i totonu o le falemai, ae faapea le lautele o le atunu’u.

Sa fa’aalia e le susuga ia Dr. Akapusi Ledua, le pulesili a le falemai, lona agaga fa’afetai ia Dr. Carter ma le faletua, ona o le fa’avaeina o se talavai mo le fatu, lea ua lata i le 4,000 tagata o le atunu’u ua mafai ona togafitia ai, ae le gata i lea, o polokalama ma a’oa’oga sa o la faataunu’uina.  Ma o le fesoasoani malosi ma le tausiga alofa a le faletua ia Allisn Carter i tagata mama’i o le atunu’u, ua faamanuiaina ai le LBJ.

Na saunoa Dr. Ledua, sa ia faitauina se fuaiupu mai i le Tusi Paia, ia Luka 6: 45 o lo’o faapea mai ai, “Ua aumai mea lelei e le tagata amio lelei i mea lelei ua teu i lona loto,” ma sa ia teufatuina lenei mau, ona e fa’amatala manino ai lava le alofa ma le agalelei aemaise o le tausiga a Dr. Carter ma le faletua, ua faia mo le atunu’u.

Ta’ua e Dr. Carter, ua fa’aali mai i a la galuega “mea lelei o lo’o sau mai i o la loto ma agaga”.  Ma na fa’aalia foi e Dr. Ledua le fa’asili atu o mea o la faia, nai lo la valaauga.

I le lua tausaga na se’i mavae atu, ua faapea ona va’aia e Dr. Carter ia ni gasegase se 3,720, e le gata i le potu talavai o le fatu i le LBJ, ae faapea foi i totonu o nu’u ma afioaga. E le gata i lea, sa faapea foi ona ia galue malosi i le fa’atulagaina o ni polokalama mo le tausiga o le soifua maloloina.  

Ma i le tausaga ua mavae, sa ia fesoasoani malosi ina ia fa’amalosia le a’oa’oina o le mamalu o le atunu’u e tusa ai ma le gasegase o le Suka ma ua fa’apea ona fa’aauau mai i lenei tausaga lenei polokalama.

E to’a 1,547 nisi tagata o le atunu’u sa o’o atu iai le galuega a lofa a Dr. Carter, e ala i auaunaga i tua o nu’u ma afioaga.  Ae le mafaitaulia ai ana auaunaga eseese i totonu o le ekalesia ma fa’alapotopotoga o lo’o auai ai.