Pago Pago - AMERIKA SAMOA

I se fa’aaliga tusitusia mai I le Laulau a Faatonu (Board of Directors) a le Falema’i Tele I Fagaalu (LBJ), ua fa’alauiloa mai ai le faamavae o le susuga Moefaauo Bill Emmsley mai i le tofiga o le Faatonu Sili o le LBJ i le afiafi o le Aso Faraile na se’i mavae atu nei, i le na’o le 8 o masina talu ona ia umia lenei tofiga faaletaitai.

O lea ua filifilia ai e le Laulau a Faatonu a le LBJ ia le alii foma’i ia Dr. Akapusi Ledua e avea ma Faatonusili le tumau, e pei ona faamaonia mai e le sui taitaifono ia Jean Anderson, i le aso ananafi.

I sa latou fa’aaliga tusitusia na tuuina mai, sa fa’ailoa mai ai e le Laulau a Faatonu a le LBJ le iai o se aufaigaluega agavaa ua nofo saunia e tautuaina le soifua maloloina o le mamalu o le atunu’u i totonu o le falema’I autu a le teritori.

Na ta’ua i lea lava fa’aaliga, sa tofia e le Laulau a Faatonu ia Emmesley ina ia ausia le misiona ma le faamoemoega a le Laulau a Faatonu, ina ia faamautuina se tautua sili atu mo le mamalu lautele ma le aufaigaluega ma ia toe faatuina mai le falemai a le LBJ, o se nofoaga e agava’a mo le tausia o le soifua maloloina mo le mamalu o le atunu’u.

Ma o lea ua autasi ai Emmesley ma le Laulau a Faatonu, ina ia mafai ona ausia lea faamoemoe, ua tatau ma onomea ai le tula’i ese o Emmesley mai i le tofi taitai.

Ua fa’ailoa mai e le tamaitai ia Anderson, o le vaiaso nei o le a toe faalauiloa mai ai e le Laulau a Faatonu fuafuaga faataatia mo le alualu i luma o le tautua a le LBJ, e aofia ai ma fuafuaga i nisi o Tausi Soifua ma foma’i faaopoopo mo le LBJ.

O le vaiaso ua tuana’i na fesiligia ai e le afioga i le Senatoa Togiola T.A.Tulafono le laulau a faatonu o le Falema'i, pe aisea "ua le faate'a" ai le CEO o le falemai ina ua savali ese tausi soifua ma auai i le tetee faasaga i le pulega o le falema'i ia Tesema 2022.

Na saunoa ai Togiola i le taimi na faatalanoa ai e le Senate  le mataupu lea i le vaiaso ua tuanai, sa tula'i ai Dr Tuiolosega ma le Faatonusili o le Soifua Maloloina (DOH) le susuga ia Motusa Tuileama Nua, ma le Teutupe (CFO) a le LBJ ia Fala Sualevai.

Na maitauina e le Samoa News, sa malaga i fafo le susuga ia Moefaauo ma e le'i auai i le faatalanoaga lea i luma o le Senate. Sa taumafai  foi le Samoa News, e fesoota'i o ia mo sana saunoaga, ae le'i manuia.

Na maitauina e Togiola le saunoaga a Motusa, ana faapea e savali ese o le Tausi Soifua o le DoH, o ia la e gafa ma le mataupu lena.

Saunoa Dr Tuiolosega sa talanoaina e le laulau a faatonu le mataupu lea ua laga  ina ua savali ese tausi soifua ma lipotia e le nusipepa.

"Ua uma ona faatalanoa ma Moefa'auo, i le taimi na tula'i ai i luma o le laulau a faatonu o le falemai poo le Hospital Board. Sa talanoa iai sui o le laulau i o latou faanoanoaga i le mea na tupu.  Na iloa ane ai ile taimi lena le mu'amu'a ma mautinoa ai e le o tele se silafia o le CEO i ana matafaioi," pei ona saunoa Dr Tuiolosega, ae na faopoopo atu le afioga a Togiola, "Aisea na le faamalolo ai pe afai e le o agavaa ile galuega?

Ae na tali Dr. Tuiolosega, "e na'o Moefaauo lava e maualuga ona agavaa," ma na maitauina ai foliga le fiafia o Togiola ma ia faapea ane,"e a ea..." ma una'i atu le Taitaifono e faaauau lana tala.

Na faamanino e le Taitaifono, e le fesiligia agavaa o le CEO,  ae o le faaletonu o iai, o le auala e faatino ai lana galuega faa CEO.  Saunoa Tuiolosega, "O lana style po o lana auala i le faatinoga o ona tiute faa CEO."

Peitai, na saunoa Faipule Luaitaua Gene Pan, mo Moefaauo e faamavae ese ma le tofiga talu mafuaaga ua iloa atu.

Ae ile faatalanoaga ma le Samoa News i le Aso Gafua, na saunoa ai Luaitaua, ua iai mataupu aliali mai talu ona faasee atu Moefaauo i le tofiga CEO, ma e tatau  i le laulau a faatonu, ona faia iai se latou faatatau, a leai, e uma le savali ese o tausi soifua, ae o foi ma fomai latou.

"Ua tele faitioga mai tausi soifua ma fomai mai lo'u itumalo I le tulaga ua iai nei le falema'i. Faatasi ai ma le talanoa a'i i le savali ese a tausi soifua ma auai i le tetee, o iina e ta'u mai ai e le ono CEO.  Pau le mana'o o tausi soifua, o mea e agavaa iai, totogi o latou livi e lei faaaogaina, talu sa le mafai ona ave o latou livi ona o le utiuti o tausi soifua”.

O le masina talu ai, na faamaonia ai e le CEO o le falema'i, o fetuunaiga o totogi ma livi faaopopo, ua uma ona totogi e le falema'I i tausi soifua - le lata i le afa miliona tala.

Na ta'ua e Moefaauo i lena taimi, o le mea tatau lava le ave o totogi o tausi soifua, peita'i " sa leai so latou onosa'i ". O le tetee o le latou aia tatau, peita'i "sa le tatau ona tupu".

"E le faapea na ala ane loa ma manatu e sii o latou totogi, e leai o vaega uma lava ia o le fuafuaga faataatia," pei ona saunoa le Moefaauo.

I ulua'i lipoti o le mataupu lenei, na tusi atu ai tausi soifua i le Susuga a Moefa'auo, ma avatu ai fautuaga faatasi ai ma le toe fetuunaiga o le totogi o le Pule o tausi soifua, ma totogi amata o Tausi Soifua Pasi e iai Registered Nurses; Licensed Practical Nurses; Certified Nurses Assistants ma Orderly Clerk.

FEILOA’I LE KOVANA MA LANA AUMALAGA I TAGATA E TUSIA ATA O LE FALEMA’I FOU

Ua uma ona feiloai  sui o le Malo o Amerika Samoa ma le  Architects Hawaii Limited (AHL) i lo latou ofisa i Honolulu, e faatalanoa lesi laasaga mo le fausia o le falema'i fou.

O le uma ane o le tauofoga na manumalo ai le AHL i le konekarate e fausia le falemai fou. Pei ona faamaonia e le faamatalaga aloaia na tuuina mai i le vaiaso talu ai.

O le fono i le vaiaso ua tuana'i, sa auai Kovana Lemanu P. S. Mauga, o Faatonusili o le Kapeneta, Peti Matila, Ryan Tuato'o, Faleosina Voigt, Tuiafono Vaiula Sua,  ma le susuga ia Moefaauo Bill Emmseley.

I le faamatalaga aloaia mai le Malo, na saunoa ai le afioga Lemanu, o le faamuamua masani lava e ave i le Soifua maloloina.  Ma na ia saunoa faamalamalama ai foi, “o le falema'i fou le taulaiga o le galuega a le Faatonusili ia Matila ma lana vaega”.

Ma uunaia ai e Lemanu ia le AHL e “amata loa fuafuaga ma ia galulue valalata ma le Malo o Amerika Samoa e amata fau le falemai i se taimi vave”.

I le famatalaga lava lea, o ta'ua ai, o le AHL e taitai ai Linda Lileikis, o ia le Loia Sinia ma le Faatonu ole Poloketi. Na faaali lona agaga faafetai ile avanoa e galulue ai ma le faigamalo a Lemanu.

"O le fuafuaga mo le falemai fou, e aofia ai moega e 40.  Ae o le Lions Park, e le o se nofoaga e aafia i lologa”, o le maitau lena a le AHL, i” suiga o le tau ma le siitia o suavai pe a tai o'o o'o, o le fogafale pito i lalo o le fale, e le tuua I ai ni auaunaga maaleale”.

"O le fogafale tasi, e fetaui ma isi fogafale e lua mo paka taavale.  Ma na talosagaina foi e le Kovana ia Lemanu, se 3D model ma ua ia faatali i le taimi e avane ai le ata mulimuli , e le AHL.

 "Ua iai le fuafuaga a le AHL e malaga mai i Amerika Samoa ia Fepuari e mata'itu po o a mea o lo o maua ma faamaumau mea e man'omia ona aumai i fafo mo le fauga o le falema'i fou."

Na faailoa e Director Matila foliga o le ata atoa o le atina'e lea, ma o le falemai lava le auga atoa .  "O le atina'e fou lenei, e aofia ai le faamalumaluga mo Aoga, Soifua Maloloina, ma faamatalaga faaonapo nei, (Information Technology-IT).  O le manaoga autu ole Tech Park, ia fesootai uma lava auaunaga tau soifua maloloina.

"Pei o se faataitaiga, o le Medical plaza, e fau ia laina ma le falema'i, ma maua ai avanoa mo isi auaunaga tau soifua maloloina, e Medicaid certified pei o le fale fa'i nifo, mata, ma isi”.

Na faailoa foi e Matila o le ata autu lava, mo le Tech Park, o loo faauma, ma e tatau ona mae'a mai i se taimi vave.  Ma ua faatalitali foi iai le afioga i le Kovana Lemanu, ile taimi e taunuu ai le AHL i Amerika Samoa.