Ads by Google Ads by Google

Fa’ameaalofa mai e Samoa ni Faisua mo Amerika Samoa


[ata: foa'i]

Pago Pago - AMERIKA SAMOA

- Sauni le aumaia o nisi figota ma i’a, povi ma mamoe

Na tino mai i le aso Gafua na se’i mavae atu nei, ia nisi o maliliega sa faia i le va o Samoa e lua i le fonotele o le ‘Atoa o Samoa’, mo le fetufaa’iga o le atamai faapea metotia i le fa’asaoina o taumafa, e ala lea i ni faisua e 500 mai i le malo o Samoa, o le a tausia ma faaola i totonu o Amerika Samoa.

O le aso Lua, Novema 28, 2023 sa mafai ona galulue faatasi ai nisi mai Samoa faapea ma tagata faigaluega o faigafaiva i totonu o Amerika Samoa, i le iloiloina lea o se nofoaga autu o le a tausia ai nei faisua, o se ogasami faasao i Faga’alu.

Na faimalaga le afioga Laaulialemalietoa Polataivao Leuatea Fossie Schmidt, le minisita o Faatoaga ma Faigafaiva, a le malo o Samoa faatasi ai ma sana aumalaga e to’a 11, o i latou uma ia ua iai le poto aoaoina i tulaga o faigafaiva; faapea ma le afioga i le sui minisita ia Maiava Fuimaono Tito, mo le tauaaoina o lenei meaalofa i le afioga i le Kovana ia Lemanu P. S. Mauga ma le faigamalo a Amerika Samoa.

Na faapea foi ona auai ai i lea sauniga taua sa faia i Faga’alu i le aso Gafua, ia le Komesina o Samoa i totonu o Amerika Samoa, le susuga ia Fata Brian Kaio.

Ae le gata i lea, na auai foi le Pulenu’u o le afioaga o Faga’alu, le susuga ia Tuailevaoola Sima Lago’o Vaitautolu, ma sa ia fa’aalia lona agaga fa’afetai mo lenei avanoa ua maua e lona nu’u, e latou te puipuia ai nei figota taua.  Ma e pei lava o isi afioaga o Amerika Samoa, e le gata i Faipule, ae o lo o puipuia foi I le pulega a matai

O se tasi o tiute a le susuga ia Tuailevaoola o le atina’eina lea o se siomaga maloloina mo lona nu’u, faamautuina le malu puipuia o le nu’u faapea ma le puipuia o le nu’u mai i fualaau faasaina.

I lana saunoaga i le aso Gafua, na fa’alauiloa mai ai e le minisita o Faatoaga ma Faigafaiva a Samoa, le saunia foi o sapalai o isi figota ma i’a o le sami, mo Amerika Samoa.  Ma ua iai foi se fuafuaga mo le auina mai o povi ma mamoe.

Na fofogaina e Lemanu lona agaga faafetai i le malo o Samoa ma i latou uma sa galulue malosi ina ia mafai ona tino mai lenei fuafuaga.

Ae e le o se taimi muamua lenei ua faatuina ai se fa’ato’aga figota po o faisua i totonu o Amerika Samoa.  Pe a ma le 10-15 tausaga ua mavae, na iai foi se fa’ato’aga faisua i Nu’uuli, ae peitai, sa tulai mai ai ni faafitauli i le gaoia e tagata, faapea ai ma le tulaga faaletonu o tala o le tup emo le tausiga o lea polokalama.  Na i’u ina le faamuta ai lea polokalama.

E lua vaiaso ua faamoemoe e nonofo ai le aumalaga mai Samoa e fesoasoani i le tau amataina o lenei polokalama fou.