Pago Pago - AMERIKA SAMOA

O le amataga o le vaiaso na toe fa’aopoopo ai, i lalo o le tulafono mo totogi pito maualalo (Fair Minimum Wage Act 2007), ia seisi 40 sene i totogi mo tagata faigaluega a Amerika Samoa, o lo’o galulue i totonu o kamupani ‘ese’ese.

O lenei tulafono (Fair Minimum Wage Act 2007) e pei ona suia e le Tulafono Lautele 114-61, e fa’atulagaina totogi amata mo Amerika Samoa, faapea ma fa’aopoopoga ta’i $0.40 i le itula, i le ta’i tolu tausaga, i le aso 30 o Setema, se’ia o’o lava ina tutusa ia le totogi amata a kamupani ma totogi amata a le malo feterale.

O le taimi mulimuli na faia ai lenei siitaga po o lenei fa’aopoopoga, o Setema 30, 2021.

O totogi amata mo Amerika Samoa, e fa’atulagaina mo na’o kamupani ma’oti, ae le mo galuega ma’oti a tagata faigaluega.

E ui ina o nei fa’atulagaga e mo totogi amata, ae peitai, e mafai e le pule o le kamupani ona filifili le totogi a lana tagata faigaluega, e sili atu lo le totogi fa’atulagaina mo lana kamupani.  Ae o lo’o fa’amalosia mai i le tulafono, ona fa’apipi’i e pule o kamupani ia se fa’aaliga e fa’ailoa mai ai ia totogi amata fou, i se nofoaga e mafai ona tagai iai tagata faigaluega.

O lo’o aofia foi i totonu o le tulafono ia totogi amata mo tagata faigaluega a le malo, lea u si’itia nei i le $6.01 i le itula, amata mai ia Setema 30.  Ae peitai, ua mae’a ona fa’atulagaina e le malo ia totogi amata faaleitula, i le $7.25 mo ana tagata faigaluega.

Na amata mai i le aso Gafua, Setema 30, 2024 ona fa’atulagaina totogi amata i totonu o Amerika Samoa, e pei ona ta’ua i lalo:

Kamupani gaosi oloa tu’u fanu, ‘ava malosi ma oloa gaosi i le susu $6.29

Lomitusi/Nusipepa $6.73

Kamupani fau fale $6.70

Faleoloa, Kamupani Si’i oloa atoa $6.20

Kamupani tau tupe ma Inisiua $7.09

Tausiga o Va’a $6.61

Kamupani I’a $6.36

Tagata Faigaluega a le Malo $6.01

Kamupani gaosi lavalava $5.78

Va’a la’u oloa ma Femalagaiga $7.19

Faletalimalo $6.10

Va’a Fagota ma La’u I’a $7.02

Kamupani suau’u $6.95

Femalagaiga ma Isi $6.98

Lomitusi $6.60

Turisi ma Femalagaiga $6.58

Falema’i ma A’oga tua $6.43

O isi galuega e aofia ai Teu fale $5.80