Ads by Google Ads by Google

Faaopoopo le isi ta’i 5 tausaga i fa’asalaga a ni ali’i pagota


[ata: foa'i]
ausage@samoanews.com

E ta’i 5 tausaga le umi lea ua fa’aopoopo e le Fa’amasinoga Maualuga i fa’asalaga a ni ali’i pagota e to’atolu o loo tuli i le toese i Tafuna i le taimi nei, ina ua tausala i latou i le moliaga mamafa o le sola ese mai le falepuipui.

 

O ali’i pagota e to’atolu e aofia ai Jason Isaiah Muasau, Vatia Tugaga ma Luao Fagota poo Andrew Peters fo’i e pei ona iloa ai o ia e le to’atele.

 

O le ali’i loia fautua lagolago ia Rob McNeill na tula’i mo i latou uma nei e to’atolu, ae o le tama’ita’i loia sili lagolago ia Laura Garvey na fai ma sui o le malo i lenei iloiloga. O afioga i ali’i Fa’amasino Lagolago ia Faamausili Pomele ma Muasau T. Tofili na lagolago i le afioga i le ali’i Fa’amasino Sili ia Michael Kruse i le iloiloina o le faaiuga o lenei mataupu.

 

O le masina o Iulai i le 2018 e pei ona taua i le maliliega na sainia e le malo ma ali’i pagota e to’atolu, na sosola ai i tua mai le toese i latou nei ua molia.

 

Na fa’ailoa e le ali’i pagota o Peters i le fa’amasinoga e fa’apea, na mafua ona latou sosola i tua mai le toese, ona ua lagona lo latou fia ‘aai, e le lava fo’i mea’ai o loo fafaga ai i latou. Na taua atili e Peters i lana molimau, e na o le ti lava e kiliva atu i le taeao, aoauli ma le afiafi.

 

Sa ia taua fo’i e fa’apea, o loo i ai mea’ai i le falepuipui ae o le fa’afitauli e le o fa’aaogaina. E pule lava pagota o loo kuka poo a mea’ai e fa’aaoga i aso ta’itasi.

 

Na fesili Kruse ia Peters poo le a le mafua’aga na taofia ai o ia i le falepuipui, ae na tali le ua molia, e mafua mai ina ua ia faaoolima i se isi tagata i le Karaoke Bar, ma fa’asala ai loa o ia i le toese mo le 7 tausaga.

 

Na fia iloa e Kruse pe sa faamatala e Peters i nisi pagota o ia ua fia ‘ai, peita’i na tali le ua molia, e leai, na te le’i ta’uina i se isi lona fia ‘ai sa i ai. Sa latou taupulepule fo’i ma Vatia ma Muasau e sosola i tua i lona fale e aumai ai se latou mea’ai.

 

Na toe fesili Kruse ia Peters pe aisea e le mafai ai ona o atu lona aiga e avatu sana mea’ai i le falepuipui, ae na tali le ali’i pagota, e le fa’ataga ona latou fa’aaogaina telefoni a le falepuipui, e le faatagaina fo’i ona ave se pagota i le falema’i pe a ma’i tigaina.

 

Na faatoese Peters i le fa’amasinoga e tusa ai o lana solitulafono, ma ia taua ai lona salamo i le mea sese sa ia faia. Sa ia taua e fa’apea, o le a maua e ia le onosa’i i se isi lava taimi e toe lagona ai le fia ‘ai, o le a ia faitauina fo’i le Tusi Paia ina ia maua ai lona malosi e tuli ai lana fa’asalaga.

 

O le molimau lava fo’i lea na tuuina atu e Vatia ma Muasau ina ua maua lo la avanoa e fa’atoese ai i luma o le fa’amasinoga.

 

Na taua e Vatia e fa’apea, e le na o i latou pagota e sosola i tua, peita’i o le fa’afitauli, e to’atele fo’i isi pagota e sosola ae le maua lava. Sa ia taua fo’i e fa’apea, o le autu o le latou solaaga, e le o le talepe pe gaoi fale o ni aiga, ae o le sailiina o se mea’ai mo i latou. Sa ia taua fo’i e fa’apea, ina ua maua le latou mea’ai, sa latou toe fo’i loa i totonu o le falepuipui.

 

Na faatoese Vatia i le fa’amasinoga e tusa ai o lana solitulafono, ma ia talosagaina ai se isi avanoa mo ia.

 

Mo le susuga a Muasau, sa ia faatoese fo’i i le fa’amasinoga e tusa ai o lana solitulafono. Na fesili Kruse ia Muasau pe sa ‘ona i le taimi na toe fo’i ai i totonu o le toese, na tali le ua molia, ioe.

 

Na finau loia a itu e lua ina ia fa’asala i latou nei i se fa’asalaga fa’a nofovaavaaia, peita’i o lea fautuaga e le i taliaina e le fa’amasinoga. Na manatu le fa’amasinoga, e le tatau ona tuu avanoa i pagota e solitulafono ao tuli a latou fa’asalaga, ina nei fai ma itu e manatu mama ai isi tagata i le lumana’i.

 

I le mae’a ai o se malologa puupuu a le fa’amasinoga, na fa’ailoa ai loa e Kruse, o i latou nei e to’atolu ua ta’usala i le moliaga mama o le sola ese mai le toese, lea e mafai ona fa’asala ai se tasi i le toese mo le umi e le sili atu i le 5 tausaga, poo le salatupe e le sili atu i le $,5000.

 

Ona o le matuia o le gaioiga sa faia e i latou nei, na faasala ai loa i latou e le fa’amasinoga mo le umi e ta’i 5 tausaga, o lea fa’asalaga o le a faaopoopo i a latou fa’asalaga o loo tuliina nei i le toese i Tafuna.

 

Saunoa Kruse e fa’apea, o le agaga o le Fa’amasinoga, ia momoli atu se feau taua i le atunuu lautele, e le avea le sola i tua mai le falepuipui ona o le fia ‘ai e fai ma ‘alofaga o ituaiga solitulafono faapenei. Sa ia taua fo’i e fa’apea, e le ‘alo lava le fa’amasinoga i le tuuina atu o ana faaiuga e tusa ai o solitulafono o loo alia’e mai.

 

Na taua e Kruse e faapea, o loo tu’u fesili lava le fa’amasinoga i le mafua’aga e ala ai ona to’atele tupulaga talavou e sosola i tua mai le falepuipui, ae o le to’atele o tagata matutua o loo tuli a latou fa’asalaga i le taimi nei, e leai lava ma se isi ua oo mai i luma o le fa’amasinoga ona o le sola i tua.

 

Sa ia faamanatu i ali’i pagota e to’atolu le avanoa o loo latou maua e ta’aalo sa’oloto fiafia ai i totonu o le toese, o le avanoa o loo asia ai i latou e o latou aiga, atoa ai ma le avanoa o loo feofeoa’i sa’oloto ai ma vaai i le susulu matagofie o le la.

 

“E i ai le taimi e fausia ai e le malo se isi falepuipui e taofia ai outou i totonu e aunoa ma le toe vaai i le mata o le la. E tatau ona outou fa’afetai i le avanoa o loo outou maua i le taimi nei,” o le saunoaga lea a Kruse.

 

O Peters na ta’usala i le tausaga e 2012 i le moliaga o le gaoi, e mafua mai i le fa’alavelave lea na ia gaoia ai se telefoni mai totonu o se Taxi sa paka i luma o se faleoloa i Pago Pago. Ae i le tausaga e 2014, na ta’usala ai fo’i o ia i le gaoi ina ua ia gaoia se pusa pia mai totonu o se Faleoloa Asia i Pago Pago lava. O le tausaga e 2015 na ta’usala ai fo’i o ia i le faaoolima i le tulaga lua, e mafua mai i le fa’alavelave lea na ia faaoolima ai i se isi alii i totonu o le Karaoke Bar.

 

O Vatia ma Muasau o loo tuli a laua fa’asalaga ta’i 27 tausaga le umi, e mafua mai i le fa’alavelave lea na la fasi fa’amo’amo’aina ai se Tama e silia i le 70 tausaga le matua e nofo i luga o le Vaa Faila.