Pago Pago - AMERIKA SAMOA

O lo’o a fa’aopoopo e le Hawaiian Airlines le malaga lona tolu i vaiaso ta’itasi i le va o Honolulu ma Pago Pago mo masina o le taumafanafana e fa’afetaui ai le pisi masani o femalagaiga, a’o aga’i atu tagata o le atunu’u i Amerika mo tafaoga ma aso malolo, ae o tagata Samoa ma isi o lo’o aumau i Amerika e malaga mai i le teritori- mo tafaoga ma asiasi aiga.

O tamaiti a'oga fa'apitonu'u o lo'o aga'i atu i kolisi ma iunivesete i le Iunaite Setete o le a fa'alumaina fo'i femalagaiga i le taumafanafana.

O lo’o fa’atinoina nei e le Hawaiian Airlines le ta’i lua vaiaso o va’alele i le va o Honolulu ma Pago Pago i le Aso Gafua ma le Aso Tofi, ma ua fa’ailoa mai e le kamupani va’alele a Honolulu i le vaiaso ua te’a, o le a fa’aopoopoina le malaga lona tolu i vaiaso ta’itasi mai le aso 07 Iuni e o’o atu i le aso 30 o Aukuso.

O le a fa’agasolo le va’alele i Aso Lulu ae taunu’u i Pago Pago i taimi o le po - e pei o le taimi nei e ta’ilua i le vaiaso. Na fa’amaonia mai e le kamupani va’alele, ua tatala reservation ma booking mo le malaga lona tolu i vaiaso ta’itasi.

Na fa’amaonia mai e le so’oupu a le Hawaiian Airlines i le Samoa News le malaga fa’aopoopo i vaiaso ta’i vaiaso i Aso Lulu e fa’afetaui ai le pisi o femalagaiga i masina o le taumafanafana.

O le Hawaiian Airlines i le tele o tausaga sa tautino atu i le malaga lona tolu i vaiaso taitasi i le pisi o masina o le taumafanafana, ae o le faamaʻi o le COVID-19 i le lalolagi atoa, na mafua ai ona tapunia tuaoi na taofia ai malaga faaopoopo mo le taumafanafana mo Pago Pago talu mai le 2020.

E ese mai i malaga faaopoopo mo Pago Pago, sa faalauiloa foi e le Hawaiian Airlines i le vaiaso nei nisi malaga i le taumafanafana i le va o Honolulu ma Austin, Texas; Boston, Massachusetts; ma Las Vegas, Nevada.

O le a faaopoopo foi e le kamupani vaalele se malaga lona fa i aso taitasi i le va o Honolulu ma Los Angeles.

O le fa'asologa o va'alele fa'aopoopo e mafai ona maua ile

(www.hawaiianairlines.com). Mo Pago Pago, valaau le ofisa i le 699-1875.