Ua fa’aopoopo atu le isi to’avalu o e taofia mo suesuega fa’apitoa pe o maua i le Coronavirus poo le misela fo’i ia i latou o lo’o taofia i le falema’i i Leone. O le to’avalu lea sa malaga mai le va’alele a le Hawaiian Air i le afiafi o le aso Gafua na te’a nei.

Ua fa’ailoa mai e to’a fitu i latou mai Taiwan na uia Honolulu ae to’atasi tagata sitiseni Amerika e 30 aso o i ai o ia i Filipaina - lea o lo’o fa’amonia ai le coronavirus fa’apena foi Taiwan.

Ua mafua ona malaga mai nei sui uma, ina ua mae’a fa’amauina a latou OK Board e malaga mai ai, ma ua fa’ailoa e le fa’atonu o le Soifua Maloloina, o le a toe faia lava se la’ua fonotaga ma le afioga le Loia Sili ma lona Ofisa, e tusa ai o aiaiga o le fa’asa o i ai nei, ina ia tau fai malamalama i tulaga o le OK Board lea e talosaga mai ai le ulufale mai o le to’atele, pe o talafeagai.

O le a talanoaina, ae o le va’aiga lautele i le Ok Board, e pei lava e ao ina taofia mo le taimi nei, a’o pipisi atili mai le Coronavirus i atunuu ua feso’ota’i tele ma Amerika, ma o lo’o fa’apea fo’i ona tatou feso’ota’i lelei ma le Malo Tele o lo’o fa’amalumalu i le tatou teritori nei.

Ua iloga mai e le o fa’ataua tele e le Hawaiian Air le va’aiga toto’a i pasese uma e ulufale ane i Hawaii ma toe fa’aauau mai a latou faigamalaga i Amerika Samoa nei, e pei ona matua puipuimalu e Samoa na lua femalaga’iga i lo tatou va ona o fa’ama’i pepesi ma aiaiga ua tamau nei mo femalaga’iga.

O le aiaiga e pei ona fa’atulaga ai mo so’o se pasese e malaga mai atunu’u o lo ua mae’a ona maua tagata i le Coronavirus, ae uia mai Hawaii, e ao ina taofia i Hawaii se’ia mae’a le 14 aso ona fa’ato’a tuu mai lea e malaga mai. I lana nofo ai i Hawaii e ao ina toe faia ai iina lana talavai ma umia mai lona fa’amaoniga sa va’aia le foma’i i Honolulu ma kilia mai ai lana sau, 3 aso talu ona mae’a va’aia le foma’i.

Ona e toatolu i latou sa nofoia le le nofoaga mo suesuega i Leone a’o le’i to’ai taunuu mai le isi to’avalu ua taofia nei, peita’i e to’atasi o i latou ua atoa le 14 aso ma ua tatala mai i tua ua saogalemu lona masalomia o maua i le Coronavirus, ma ua lava ai moega mo le isi to’avalu ua fa’aopoopo atu.

Pe afai e saogalemu pea le isi to’alua sa taofia fa’atasi ma le sui ua tatala i tua, e tatala fo’i i la’ua nei ae lei mae’a lenei vaiaso.

E na’o le 10 lava moega e mafai ona taofia ai nisi i le tatou falema’i i Leone, ae ua taumafai nei le Kovana e fa’avave ona fausia se isi fale fou ina ia maua ai le isi 10 moega fa’aopoopo aua  nisi e toatele o le a toe fa’aopoopo mai pe a o’o i le aso Tofi ae toe sau fo’i le Hawaiian Air ma nisi Saina poo i latou sa malaga i malo ua lisia ua mae’a maua ai le Coronavirus.