Pago Pago - AMERIKA SAMOA

O le ta o le 11 i le taeao nei, i le Malaeoletalu i Fagatogo, o le a faapea ona fa’apa’iana ai le afioga i le Kovana fou a Amerika Samoa, ia Pulaalii Nikolao Pula ma le Lutena Kovana fou, le afioga Pulu Ae Ae Jr.

O le talosaga amata o le sauniga, o le a fofogaina e le susuga i le Fitugafulu ia Fa’apito Auapaau, o le Ekalesia a Iesu Keriso o le Au Paia o Aso e Gata Ai.  Ona soso’o ai lea ma le taua’aoina e le afioga Dr. Lealofi Uiagalelei, le Komesina o le Ofisa Palota, ia ‘Certificates of Offices’.

Ona soso’o ai lea ma le Faatautoga e le Faamasino Sili, le afioga Lealaialoa Michael Kruse..

O le susuga i le Faifeau Toeaina Faaeteete Saifoloi, le Taitaifono o le Ekalesia Faapotopotoga Kerisiano a Amerika Samoa, o le a fofogaina upu mai i le Afioga Paia a le Atua, ona soso’o ai lea ma se mafaufauga fa’aleagaga mai i le susuga i le Faafeagaiga Lagofaatasi Ae, o le Ekalesia Penetekoso.

I le mae’a ai o le sauniga lotu amata, ona faapea loa lea ona fa’apaiaina le nofoaiga fou, e ta’ita’i e to’a 12 mai i Ekalesa ‘ese’ese.

Ona soso’o ai lea ma le ulua’i saunoaga fa’aleKovana a le afioga Pulaalii.

O le talosaga fa’ai’u, o le a faaleoina e le afioga i le Faifeau Toeaina ia Samuelu Faagogo, le peresetene o le Ekalesia First Samoan Gospel, pe a mae’a se saunoaga a le afioga i le Lutena Kovana Pulu Ae Ae Jr.

O viiga o le aso, ua saunia e le Assembly of God mai i Pago Pago, EFKAS Fagatogo ma le Ekalesia Metotisi Fagatogo.

O le vi’i o le tagavai a le Iunaite Setete, o le a faapea ona usuina e le tamaitai o Simenesa Ofeira Loia ae o le tamaitai o Naomi Matagi, o le a na ia usuina le vi’i o le tagavai a Amerika Samoa.

O le afiafi o le aso To’ona’i a taeao, o le a faataunu’uina ai le taumafataga ma le siva a le kovana (Governor’s State Dinner & Ball), ona fa’amae’aina lea i se sauniga lotu i le aoauli o le aso Sa, i le malumalu ale EFKAS i Fagatogo.