Ads by Google Ads by Google

Fa’asala Fa’amasinoga le afioga Toeaina ma lana Loia Fautua


[ata: SN]
ausage@samoanews.com

E $600 le tupe na poloaina e le afioga i le Fa’amasino Sili ia Michael Kruse le afioga i le ali’i Faipule mai Manu’a #2 na te totogiina, ae $200 e totogi e lana Loia Fautua, ona o le la fa’atamala e tausisia poloaiga ua uma ona tuuina atu e le Vaega o Fa’amasinoga o Fanua ma Suafa.

 

O le vaiaso nei na fofogaina ai i luma o le Vaega o Fa’amasinoga o Fanua ma Suafa, o se lala lea o le Fa’amasinoga Maualuga a Amerika Samoa le mataupu i le va o “Matt Toeaina Le’i ma Albert Toeaina mo i laua lava, faasaga i le aiga o Toeaina i Ofu, Manu’a, ae faapito augafa i le afioga a Toeaina, o ia lea o le Sa’o o le aiga Sa Toeaina i Ofu, Manu’a.

 

O le ali’i loia ia Marcellus T. Uiagalelei na tula’i mo Matt ma Albert, ae o le susuga i le ali’i loia ia Matailupevao Leupolu Jr na tula’i mo Toeaina, e le gata o ia o le Sa’o o le aiga, ae o ia fo’i o lo o umia le tofi Faipule mo le Itumalo o Manu’a #2 i le Maota o Sui.

 

O le afioga i le ali’i Fa’amasino Sili na taulimaina lenei mataupu, ae lagolagosua i ai afioga i ali’i Fa’amasino Lagolago ia Fa’amausili Pomele ma Muasau T. Tofili.

 

O le talosaga na fa’aulu e le itu a Matt ma Albert fa’asaga ia Toeaina, i lona le usitaia o se poloaiga sa tuuina atu e le Fa’amasinoga o Fanua ma Suafa, ina ia ona tuuina atu fa’amatalaga uma o loo mana’omia e le itu tagi, e tusa ai o se mataupu o lo o i luma nei o le Vaega o le Fa’amasinoga o Fanua ma Suafa.

 

Na taua e le loia a le itu tagi ia Uiagalelei e fa’apea, e lei usitaia e Toeaina le poloaiga a le Fa’amasinoga, e ala i le tuuina atu o tali mo ni isi o fesili o loo mana’omia e le itu tagi ona tali atu i ai. Na mae’a le 30 aso sa tuuina atu e le fa’amasinoga e tali atu ai Toeaina, peita’i latou te lei mauaina se tali.

 

Sa latou taumafai fo’i e faia ni isi uma gaioiga ina ia unaia ai o ia e tali atu, peita’i ua siliga taliiseu se taumafaiga. O le mafua’aga lea ua latou talosagaina ai loa se poloaiga a le fa’amasinoga, ina ia fa’asala ai Toeaina, i lona le usitaia o le poloaiga a le fa’amasinoga.

 

Na talosaga atili fo’i Uiagalelei i le fa’amasinoga, ina ia poloaina Toeaina na te totogi le $600 mo le totogi o le loia, atoa ai ma se fa’asalaga fa’a falepuipui pe a talafeagai ma le finagalo o le fa’amasinoga.

 

Na fesili Kruse i le ali’i loia ia Matailupevao, pe i ai sana tali e tusa ai o le talosaga a le itu tagi.

 

Na muamua fa’atoese Matailupevao e fai ai o ia ma sui o Toeaina, ona o le le mafai lea ona tuuina atu tali e pei ona talosagaina e le itu tagi. Na taua atili e Matailupevao e fa’apea, sa ia tauaao aloaia atu i le afioga a Toeaina le lisi o fesili o loo mana’o le itu tagi e tali atu ai.

 

“Sa tali e Toeaina isi fesili, ae o isi fesili na te lei taliina,” o le saunoaga lea a Matailupevao. “E i ai mafua’aga na le mafai ai ona tali e Toeaina isi fesili, e mafua mai i le tulaga lea, o i latou o loo tagi i lenei mataupu, e le o ni suli tau toto o le aiga o Toeaina. E le tali Toeaina i ni tagata e le o ni sui tau toto o le aiga.”

 

Na faauilavea Kruse ma saunoa atu ia Matailupevao e fa’apea, “Ae o le tiute o Toeaina o le usita’i lea i le poloaiga a le Fa’amasinoga.”

 

O le mae’a ai o le saunoaga a Kruse, na ia poloaina ai loa le afioga a Toeaina ina ia aga’i i luga o le nofoa molimau se’i fa’atauto o ia mo lana molimau.

 

Ina ua fesiligia Toeaina e lana loia e tusa ai o fesili na te lei taliina, na saunoa ai le Sa’o o le Aiga Sa Toeaina e fa’apea, na mafua ona ia le talia isi fesili, ona o fesili ia e fitoitonu lava ia te ia ma lona aiga.  Sa ia saunoa atili e fa’apea, o i latou o loo tagi i lenei mataupu, e le o ni suli tau toto o le aiga Sa Toeaina.

 

Na muta faafuase’i le saunoaga a Toeaina ina ua faauilavea Kruse ma saunoa e fa’apea, “O le mataupu e fa’atatau i le itu tagi, poo i latou o ni suli tau toto pe leai, e le o i luma o le fa’amasinoga lena mataupu.”

 

Na fesili Kruse ia Toeaina, poo le a le uiga o lana saunoaga, o isi fesili na te lei taliina e fitoitonu lea i le latou aiga. Ae na toe saunoa Toeaina e fa’apea, o le uiga o lana molimau, e i ai fa’amatalaga o loo aofia i totonu o fesili sa avatu, e le tatau ona soona tuuina atu i tua, ona o fesili ia ma fa’amatalaga e patino lava i suli tau toto o le Aiga Sa Toeaina i Ofu, Manu’a.

 

E le i malolo ai iina le afioga Kruse, ae sa ia toe saunoa atu faapea ia Toeaina, “E pei ona ou fai atu muamua, o le mataupu e uiga i le itu tagi poo i laua o ni suli tau toto o le Aiga Sa Toeaina, e le o i ai lena mataupu i luma o le Fa’amasinoga i le taimi nei.”

 

Na toe faailoa e Kruse ia Toeaina, pau le itu o loo fia fa’afofoga i ai le fa’amasinoga, o le mafua’aga ua ia le usitaia ai lana poloaiga. Ae na tali Toeaina e fa’apea, na te lei mauaina se poloaiga a le fa’amasinoga, na o le lisi o fesili sa tuuina atu ia te ia.

 

Na faatonu e Kruse le Failautusi a le Fa’amasinoga e ave le kopi o le poloaiga a le fa’amasinoga e faitau ai Toeaina. Ina ua mae’a ona faitau Toeaina i le pepa sa tuuina atu ia te ia, sa ia faailoa ai loa i le fa’amasinoga, e le i tuuina atu e lana loia le pepa lea ia te ia.

 

“Afai e te lei mauaina le kopi o le poloaiga a le fa’amasinoga, e mafua mai i le fa’amatala o lau loia,” o le saunoaga lea a Kruse.

 

Na fesili Kruse ia Matailupevao poo le a sana tali, ae na faatoese le ali’i loia ma saunoa e fa’apea, e ui na te lei tuuina atu le kopi o le poloaiga a le fa’amasinoga ia Toeaina, ae sa ia faailoa lava i ai o loo i ai le poloaiga a le fa’amasinoga ua mae’a ona tuuina atu.

 

O le mae’a ai o le saunoaga a le ali’i loia, na poloaina ai loa e Kruse ia Toeaina na te totogi le $600 mo le totogi o le loia a le itu tagi. Ua tuuina atu fo’i aso e 14 na te tali mai ai i fesili e pei ona tuuina atu e le itu tagi. Afai e leai, e ono faasala o ia i lona le usitaia o le poloaiga a le fa’amasinoga.

 

Na mae’a le faaiuga fa’asaga ia Toeaina, ona poloaina lea e Kruse le ali’i loia ia Matailupevao, na te totogi le $200 i le fa’amasinoga, o lana faasalaga lea i lona faatamala e tuuina atu le kopi o le poloaiga a le fa’ amasinoga ia Toeaina.

 

O le aso 5 Iulai lea ua faamoemoe e toe valaau ai le mataupu i luma o le fa’amasinoga.