Ads by Google Ads by Google

Faasala Lyon Grey i le Toese i Tafuna mo le 10 tausaga

ausage@samoanews.com

E 10 tausaga lea ua fa’asala ai e le Fa’amasinoga Maualuga le susuga a Lyon Grey e nofosala ai i le Toese i Tafuna, ina ua ta’usala o ia i moliaga o le umia faasolitulafono o vaega o fualaau fa’asaina e le tusa ai ma le tulafono.

 

O Grey, o ia lea e to’atolu i ai i latou na pu’e faapagota e Leoleo ma molia i le umia faasolitulafono o fualaau fa’asaina, talu mai le taimi lea na osofa’i ai e Leoleo Suesue se fale i Pago Pago i le aso 15 o Me 2018, i lalo o se poloaiga mai le Fa’amasinoga, ina ua masalomia le avea o lea nofoaga ma nofoaga e tulei ma faatau ai fualaau fa’asaina.

 

O le vaiaso nei na tula’i ai Grey i luma o le afioga i le ali’i Fa’amasino Sili ia Michael Kruse mo le lauina o lana fa’asalaga. O le ali’i Loia Fautua lagolago ia Rob McNeill na tula’i mo Grey, ae o le ali’i Loia Sili lagolago ia Doug Lowe na tula’i mo le malo.

 

Talu mai le taimi na pu’e faapagota ai Grey e Leoleo, na taofia ai pea o ia i totonu o le Toese, ina ua le mafai ona ia totogi le tupe e $50,000 na fa’atulaga e le Fa’amasinoga.

 

E 4 moliaga mamafa na ulua’i tu’uaia ai e le malo ia Grey, e aofia ai le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le aisa ma le faamoemoe e tulei ma faatau atu i isi tagata; tasi le moliaga o le umia faasolitulafono o vaega o le mariuana; faapea ai ma le moliaga e tasi o le umia faasolitulafono o vaega o le mariuana ma le faamoemoe e tulei ma faatau atu i isi tagata.

 

Ae i lalo o se maliliega na sainia e Grey ma le malo, lea fo’i na talia e le Fa’amasinoga i le masina o Tesema 2019, na malie ai Grey e tali ioe i moliaga e 2 ua toe teuteu e le malo, le moliaga o le umia faasolitulafono o vaega o le pauta faasaina o le aisa; faapea ai ma le moliaga e tasi o le umia faasolitulafono lea o vaega o le laau faasaina o le mariuana, lea e mafai ona fa’asala ai se tasi i le Toese mo le umi e le silia i le 5 tausaga, pe faasala fo’i i le salatupe e le silia i le $5,000, pe faasala fo’i i faasalaga uma ia e lua.

 

I le tali ioe ai o Grey na ia ta’utino ai e fa’apea, i se taimi o le aso 15 o Me 2018 i Pago Pago, na ia umia faasolitulafono ai fualaau fa’asaina.

 

Ina ua maua lona avanoa mai le Fa’amasinoga, na faatoese ai Grey e tusa ai o lana solitulafono sa faia, ma ia talosagaina ai se isi avanoa mo ia sei toe fo’i atu ai i tua e mafua ma lona aiga.

 

Sa ia faatoese fo’i i tagata na aafia i lana solitulafono, e pei o lona aiga atoa ai ma le susuga a Sio Godinet, le ali’i e ana le fale lea na osofa’i e Leoleo ma maua atu ai o ia ma fualaau fa’asaina. Na faatoese faapitoa Grey ia Godinet ona o le aafia ai fua o ia i lenei mataupu.

 

Na faailoa e Grey i le Fa’amasinoga e fa’apea, o fualaau faasaina sa maua e Leoleo i le aso o le osofaiga, o mea totino uma ia a ia, e leai ma se mea e patino ia Godinet, e leai fo’i se sootaga o Godinet ma nei fualaau fa’asaina.

 

Na faauilavea Kruse ma fesili poo ai Godinet, ae na tali Lowe, o Godinet, o le isi lea e to’atolu i ai tagata na pu’e faapagota e Leoleo i le taimi o le osofaiga i Pago Pago i le aso 15 o Me i le tausaga e 2018.

 

Na faliu Kruse ma faailoa ia Grey e fa’apea, e leai se mea na te molimau ai fua e fa’atatau ia Godinet.

 

“E le o oe o le Loia a Godinet, o lo o i ai lava le Loia a Godinet e finau mo lona sa’olotoga. Molimau pea oe mo oe. Ia e manatua fo’i, e leai ma se vaega o lau faamatalaga lea ua tuuina mai i le Faamasinoga e ono fesoasoani ia Godinet i le aso o lona faamasingoa autu,” o le saunoaga lea a Kruse ia Grey.

 

Ina ua toe faaauau le faamatalaga a Grey, sa ia ta’utino ai i le Fa’amasinoga ua lagona lona salamo, ma ia talosagaina ai se avanoa e toe fo’i atu ai i tua e mafuta ma nai ona tei.

 

Na talosaga McNeill i le Fa’amasinoga mo se fa’asalaga mama mo Grey. E pei ona taua e McNeill, o Grey, o se ali’i talavou ua sese lana faaiuga ua fai, ae ua lagona lona salamo moni e tusa ai o le solitulafono sa ia faia.

 

Na finau Lowe mo se fa’asalaga faa falepuipui o lo o faatulaga mai e le Tulafono. Na taua e Lowe e fa’apea, e pei ona taua i le Ripoti a le Ofisa Nofovaavaaia, o le solitulafono o le umia o fualaau fa’asaina, o se tasi lea o solitulafono ua mata’utia le faatupulaia i Amerika Samoa i le taimi nei, ma ua tatau fo’i i le Faamasinoga ona faia se auala e taofia ai le faatupulaia o lenei solitulafono.

 

I le mae’a ai ona iloilo e le Fa’amasinoga o faafinauga a loia atoa ai ma le ripoti a le Ofisa Faanofovaavaaia e faatatau i lenei mataupu, na manatu ai loa le Fa’amasinoga e tuuina mai se faaiuga e fesoasoani i taumafaiga ina ia faaitiitia le faafitauli o le fualaau fa’asaina i le atunu’u.

 

Mo le moliaga o le umia faasolitulafono o vaega o le pauta o le aisa, e 5 tausaga lea ua fa’asala ai Grey i le Toese. Mo le moliaga o le umia faasolitulafono o vaega o le laau fa’asaina o le mariuana, e 5 tausaga lea ua faasala ai Grey i le Toese.

 

O ia faasalaga e lua e tuli eseese, lona uiga, faatoa tuli le isi 5 tausaga pe afai e mae’a ona tuli le isi 5 tausaga. Lona uiga, e 10 tausaga lea ua faasala ai Grey i le Toese.

 

Saunoa atili fo’i Kruse e fa’apea, o le talosaga a Grey mo se avanoa e toe fo’i atu ai i tua i lona aiga, e mafai ona tuuina atu lea talosaga i le Komiti o le Palola, peita’i o le faasalaga ua tuuina atu, e manatu le Fa’amasinoga ua talafeagai ma le solitulafono.

 

O le afioga i le ali’i Fa’amasino Lagolago ia Faamausili Pomele ma Tunupopo Alalafaga Tunupopo na lagolago ia Kruse i le tuuina mai o lenei fa’asalaga.

 

AMATAGA O LENEI MATAUPU

 

E pei ona taua e le malo i le latou tagi, o lenei mataupu na amata mai ina ua tuuina atu e se molimau faatuatuaina ni faamatalaga i Leoleo e fa’atatau i se tama’i pisinisi tau fualaau fa’asaina o lo o faamautu i le fale o Godinet i Pago Pago.

 

E lei maua Godinet i totonu o le faletuutua na maua ai fualaau fa’asaina, ae sa maua oia i totonu o lona fale, se’i vagana ai Grey ma le tamaitai o Lomu na maua i totonu o le fale tuufua na i ai fualaau fa’asaina.