Ads by Google Ads by Google

Faasala Manu Lefatia i le Toese i Tafuna mo le 15 tausaga

ausage@samoanews.com

O le ali’i pagota o lo o tuli sona fa’asalaga i le Toese i Tafuna, lea na sola i tua i le masina o Aokuso 2018 ma fana se ali’i i le afioaga o Leone, ua faasalaina nei o ia e le Fa’amasinoga Maualuga e taofia i le Toese mo le 15 tausaga.

 

O le susuga a Manu Lefatia, lea o lo o mau i faamaumauga a le Fa’amasinioga tala’aga o ana mau solitulafono eseese, na tula’i i luma o le afioga i le ali’i Fa’amasino Sili ia Michael Kruse i le vaiaso na te’a nei mo le lauina o lana fa’asalaga.

 

O le susuga i le alii Loia Sili lagolago ia Doug Lowe na tula’i mo le itu a le malo, ae o le ali’i Loia tua ia Marcellus Talaimalo Uiagalelei na tula’i mo Lefatia.

 

E 4 tagi eseese na faila e le malo fa’asaga ia Lefatia. I le tagi muamua, na tu’uaia aio ia i moliaga e 2 o le faaoolima i le tulaga muamua; tasi le moliaga o le taumafai e faaoo le oti i se isi tagata; 2 moliaga o le fa’aaoga faasolitulafono o se a’upega; ma le moliaga e tasi o le sola i tua mai le falepuipui, o moliaga mamafa uma ia sa faia faasaga ia te ia.

 

I le tagi lona lua a le malo, sa molia ai Lefatia i le moliaga mamafa o le sola ese mai le toese, faapea ai ma le moliaga o le faaoolima i le tulaga lua. I le tagi lona 3 a le malo, na molia ai Lefatia i le sola ese mai le toese faapea ai ma le umia faasolitulafono o vaega o le laau fa’asaina o le mariuana. Ae i le tagi lona fa, sa tu’uaia ai e le malo ia Lefatia i le moliaga o le sola ese i tua mai le falepuipui.

 

Ae i lalo o le maliliega aufaatasi lea na sainia e Lefatia ma le malo i le tausaga na te’a nei, lea fo’i na talia e le Fa’amasinoga Maualuga, na malie ai Lefatia e tali ioe i moliaga mamafa e 3 e aofia ai le moliaga e tasi o le faaoolima i le tulaga 2, faapea ai ma moliaga e 2 o le sola ese mai le falepuipui ao taofia faapagota ai o ia.

 

I le tali ioe ai o Lefatia i le moliaga o le faaoolima i le tulaga lua, sa ia ta’utino ai e fa’apea, i le vaveao o le aso 12 o Aokuso 2018, a o taofia faapagota ai o ia i le toese, na ia sola ai i tua ma le fa’amoemoe e fa’ataunu’u le solitulafono o le faaoolima lea i se ali’i i Leone.

 

Ina ua ia sola i tua, sa ia aga’i atu ma faaoo manu’a i le susuga a Sopi Senio e ala i lona fa’aaogaina o se fana e faaoo ai manu’a i lona tino, ma ia faatinoina ai le solitulafono o le faaoolima i le tulaga lua.

 

Na toe tautino fo’i Lefatia e fa’apea, i se tasi o po i le masina o Mati 2019, a o taofia faapagota ai o ia i le Toese le tumau i Fagatogo, le nofoaga o lo o i ai le Ofisa Autu o Leoleo, sa ia sola ai i tua e aunoa ma se fa’atanaga a le Fa’amasinoga.

 

Na ta’utino atili Lefatia e fa’apea, pe tusa o le itula e 9:00 i le po e pei ona tula’i mai ai lenei faalavelave, na ia tuua ai le nofoaga sa taofia faapagota ai o ia, ina ua faataga e le alii Leoleo sa tiute i lea po ia Tuluiga R. Salanoa o ia e alu i tua e vaai lona aiga ona toe fo’i atu ai lea i totonu.

 

O le faaiuga o lea mataupu, ua molia ai nei e le malo ma le ali’i Leoleo ia Salanoa i le solitulafono mamafa o lona fa’ataga lea o se pagota e sola ese mai i tua mai le toese, e aunoa ma se fa’atanaga faaletulafono.

 

Na faailoa e Salanoa i Leoleo Suesue e faapea, o lona alofa i le augani soo atu o Lefatia ia te ia mo se avanoa e alu ai i tua e asi lona aiga, na mafua ai ona ia fa’atagaina le ali’i pagota e alu i tua a ia toe vave atu i totonu.

 

Na ta’utino atili Lefatia e fa’apea, i le aso 21 o Aokuso 2019, na ia sola ai i tua mai le nofoaga sa taofia ai o ia i Fagatogo e aunoa ma se faatanaga a le Fa’amasinoga.

 

O le faaiuga o le mataupu e pei ona sola ai Lefatia i tua, ua molia ai e le malo ma le susuga i le ali’i Leoleo ia Saito Pesaeli i le moliaga mamafa o lona fa’ataga lea o se pagota e sola i tua mai le nofoaga sa taofia ai o ia.

 

Na ta’utino Lefatia e fa’apea, na faataga e Pesaeli o ia e alu i tua e vaai lona atali’i sa ma’i.

 

O moliaga mamafa uma lava sa totoe ai i tagi sa faila e le malo fa’asaga ia Lefatia, ua solofua uma e le Fa’amasinoga, e tusa ai o tuutuuga o le maliliega aufaatasi na sainia e Lefatia ma le malo.

 

O se tasi o fesili sa fia malamalama i ai le Fa’amasinoga, o le mafua’aga ua ala ai ona talosaga le malo e solofua moliaga pito sili ona mamafa sa tu’uaia ai Lefatia, e pei o le faaoolima i le tulaga muamua ma le moliaga o le taumafai e faaoo le oti i se tagata.

 

E talitonu le Samoa News, o se tasi o mafua’aga na ala ai ona manatu le malo i le maliliega lenei, o le ali’i Leoleo Suesue sa autu i ai le suesueina uma o mataupu faasaga ia Lefatia, e le o toe galue o ia i le Ofisa o Leoleo, ae ua faamaloloina nei o ia, talu ai le mataupu e pei ona molia ai o ia i lona fa’aaoga faasolitulafono o se a’upega e tau pule ai i lona soifua, lea na mulimuli ane solofua e le Faamasinoga Faaitumalo lea mataupu.

 

Ina ua maua le avanoa o Lefatia e talanoa ai i le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua i lona aiga e fa’aleleia mea uma o loo faaletonu, ma tausi lana fanau.

 

Na talosaga Uiagalelei mo se faasalaga faanofovaavaaia, peita’i na finau le loia a le malo ia Lowe ina ia faasala Lefatia i le faasalaga pito sili ona umi. Na taua e Lowe e faapea, o Lefatia, o se tagata e matua mata’utia le faatupu vevesi, e ono lamatia ai le ola o tagata lautele.

 

Na talia e le Fa’amasinoga le faafinauga a le malo, ma tuuina mai ai loa le faasalaga lenei mo Lefatia.

 

Mo le moliaga o le faaoolima i le tulaga lua, e 5 tausaga ua faasala ai o ia i le Toese. Mo le moliaga o le sola ese mai le falepuipui, e 5 tausaga ua faasala ai o ia i le Toese. Mo le isi moliaga o le sola ese mai le falepuipui, e 5 fo’i tausaga e faasala ai o ia i le Toese. eO ia faasalaga e tuli eseese uma, a uma ona tuli le tasi faasalaga ona faatoa tuli lea o le isi faasalaga. Lona uiga, e 15 tausaga lea o le a tuli e Lefatia i le Toese i Tafuna.

 

O afioga i ali’i Fa’amasino Lagolago ia Faamausili Pomele ma Muasau T. Tofili na lagolago i le afioga i le Fa’amasino Sili i le tuuina mai o lenei fa’asalaga.