Pago Pago - AMERIKA SAMOA

O le aso 11 o Aperila, 2024 na fa’amae’aina ai le fa’amasinoga o le susuga ia Semi Sago ma ua fa’amaonia ai ona moliaga o le umia faasolitulafono o se vaega o fuala’au faasaina (aisa), ma se faamoemoega e fa’atauina atu i tagata faapea ma le moliaga o le umia o se vaega o fualaau faasaina (aisa).

Ma ua mae’a nei ona lauina lona fa’asalaga, o le lokaina o ia mo le 20 tausaga faapea ma se sala tupe e $20,000 mo le moliaga o le umia faasolitulafono o se vaega o fualaau faasaina (aisa); ae 10 tausaga faapea ma se sala tupe e o’o atu i le $20,000, i moliaga o le umia fa’asolitulafono o se vaega o fualaau faasaina (aisa).

O nei fa’asalaga o le a tuli pe faataunuuina i le taimi e tasi.

E tusa ai ma fa’amaumauga a le faamasinoga, na osofaia e se vaega faapitoa a le ofisa a leoleo (Vice and Narcotics) ia le maota o Sago i Aua, aua le sailiga o ni fualaau faasaina ma a’upega malolosi, i le taeao o le aso 27 o Setema, 2022.

Na maua atu e leoleo ia Sego o lo’o moe i totonu o lona potu moe, ae ina ua te’i mai o ia i luga, sa a’apa mo se mea na i tafatafa o lona faamalama ma o le mea lea na lokaina mai ai o ia e leoleo, aua le puipuiga o lo latou saogalemu.

Ina ua suesueina le potu moe a Sego, sa fa’aaogaina se taifau faapitoa a leoleo (K-9), ma mauaina ai se pusa o iai totonu se tinoitupe e $860 ma ni ‘straws’ tipitipi o lo’o tumu i se vaega o fualaau faasaina.  O ni isi tulaga sa maua i totonu o le potu moe, na aofia ai se paipa mata’eta’e, o ni tama’i taga pepa i’ila ma ni tusi (notebooks).

Na aveina atu fualaau faasaina sa mauaina i totonu o le potu o lenei alii, ma fa’ataunuuina ai su’esu’ega ma sa fa’amaonia, o se vaega o fualaau faasaina o le Aisa.

 O le aso 12 o Iuni, 2024 sa lauina ai le fa’asalaga a Sago ma e tusa ai ma le saunoaga a le sui Loia Sili ia Roy J.D. Hall, Jr., lea na tula’i mo le malo i lenei mataupu, i luma o le faamasinoga, o lo’o iai se talitonuga, o le ulua’i taimi lenei ua fa’asala ai se tasi i le falepuipui, i le silia ma le 10 tausaga, ona o moliaga i fualaau faasaina.