Pago Pago - AMERIKA SAMOA

E 20 masina ua faasala faafalepuipui ai e le afioga i le alii faamasino ia Elvis Patea, o le Faamasinoga Maualuga, ia se fafine Saina na maliu ai se teineititi e 2 tausaga.

Na ta’ua e le loia a le ua molia, o David Vargas, ua lagona e lenei fafine lona salamo faamaoni I le faalavelave ua tupu, ua faamuta faafuasei ai le soifua o si nei alualutoto.  Ma o se tulaga, o le a ia le toe faagaloina.

Sa molimau foi le susuga I le Faafeagaia ia Aifa Tanuvasa mai I le Ekalesia Molimau a Ieova I Fagaima, mo le ua molia, ma na ia faatoese e tusa ai ma le faalavelave ua tupu, ma e ui e le mafai ai ona toe tu mai ai le ua maliu, ae peitai, sa ia tauanau I luma o le faamasinoga, mo seisi avanoa mo lenei mamoe o lana ekalesia.

 I le faatoesega a Chen I luma o le faamasinoga, e ala mai I se faaliliu upu Saina, sa ia fa’atoese ai I le aiga o le ‘alu’alutoto ua maliu ma faaalia lona agaga salamo e tusa ai ma lenei faalavelave sa tula’I mai.

Ae e pei ona sa molimau le tina o le teineititi ua maliu, e le mafai ona toe faaola mai lona alo I le faatoesega a le ua molia.  E ui ina ua ia faamagaloina lenei tamaitai na tupu ai le faalavelave, ae o lo o ia manaomia pea le faamasinoga tonu mo lona alo.

Na ta’ua foi e le tina faanoanoa, e le’I o’o atu foi le fafine Saina lea (Chen) e faatoese I lona aiga pe ofoina atu se fesoasoani I lona aiga.  Na saunoa le tina mafatia, e le o manao I se mea mai I le fafine Saina ae e tatau pea ona faia le faamasinoga tonu ona o le maliu o lona alo.

Sa ta’ua e le loia a le malo ia Angela Drummond, I le taimi na tupu ai le faalavelave, na moe Chen a’o ia faafoeina lana taavale, ma o le mafuaaga lea na tula’I mai ai le faalavelave, lea ua maliu ai si nei alualutoto e 2 tausaga.

Na saunoa Drummond, o le tiute a le ave taavale o le faamaonia, o lo’o saogalemu lona fealua’I I luga o le alatele ma o lona tiute foi, le faamautuina o lo’o saogalemu le taavale o lo’o ia faafoeina I luga o le alatele, ae peitai, e le I faataunuuina e le mafine Saina ona tiute.

Na saunoa le afioga I le alii faamasino ia Patea, ua iai nei ni matua ua le toe maua mai lo la alo ona ua fasiotia o ia.

Sa le’I manino I le alii faamasino le vaega o le molimau a le tina o le teineititi ua maliu, lea na faatatau I le ‘toe totogi atu e le na mafua ai le faalavelave lona aiga’, ae peitai, na saunoa Patea, o tulaga faapea, e le mafai ona sui tulaga I le soifua o le tagata ua ma’umau.  Ae e iai vaega o le Tulafono, e mafai ona uia e le aiga o le ua maliu, e saili ai se faaiuga e faamalieina ai le aiga.

I le faaiuga o lenei faamasinoga, ua faasala ai Chen I le falepuipui mo le 12 masina ma se sala tupe e $1,000 ona o moliaga o le Faao’olima (third-degree assault).  I moliaga o le fasioti tagata e ala I le faaaogaina o se taavale (vehicular homicide), ua faasala ai Chen I le 5 tausaga I le falepuipui ma le sala tupe e $5,000.

Ae peitai, o le taofia le faasalaga o le 5 tausaga I le falepuipui, ae o le a faanofo vaavaaia Chen mo le 5 tausaga, e aofia ai ma aiaiga ina ia avea ma tagata nu’u tausi Tulafono, ae ua se’I lona laisene avetaavale ma ua faasa ona ia toe faafoeina se taavale.  Faatasi ai ma lona faasalaga faafalepuipui I le 20 masina, o se vaega o lona nofo vaavaaia. O nei faasalaga e ao ona faia I le taimi e tasi.  Ma a’o iai o ia I le falepuipui, o le a le mafai ona maua e ia le avanoa e tatala mai ai e galue.

Ua faatonuina foi e le faamasinoga le toe tu’ua e Chen o Amerika Samoa pe a maea lona faasalaga faafalepuipui e 20 masina ma ua faasa ona ia toe tuvae mai I laueleele o Amerika Samoa I le atoaga o tausaga o le a nofo vaavaaia ai o ia.

O lenei faalavelave na tupu ia Aperila 14, 2021 ina ua faafesootai e nisi mai I Nu’uuli le ofisa o leoleo, ona o se taavale ua oso I totonu o le fale o se aiga.  Na faamatala e molimau I leoleo, ina ua maea ona tupu le faalavelave, na oso I fafo Chen ma savali ese mai I le nofoaga na tupu ai le faalavelave.

O I latou na a’afia I lenei faalavelave, o se tina talavou e 30 tausaga ma nai ona alo tamaitai e toalua – o le tasi e 2 tausaga (lea ua maliu) ma se pepe e 11 masina.

Na vaaia e leoleo le taatia o le teineititi e 2 tausaga I lalo o le pa’u pito I luma o le taavale.  

Ina ua maea ona fesiligia e leoleo ia molimau sa iai I le taimi o le faalavelave, na o latou aga’I atu loa mo le tau sailiga o le “tamaitai Saina” lea na ta’ua e molimau sa faafoeina le taavale.  Na maua atu lenei mafine o lafi I totonu o se faleaiga e le mamao mai I le nofoaga na tupu ai le faalavelave ma lokaina mai ai loa o ia.

Na faamatala e Chen I leoleo, na moe o ia I le taimi sa ave ai lana taavale, ma oso ese ai loa le taavale mai I luga o le alatele ma oso I totonu o le fale o le aiga.  Sa taua e Chen lona sola ese mai I le nofoaga na tupu ai le faalavelave, ona o lona fefe ina ne’I fasi o ia e seisi.