Pago Pago, AMERIKA SAMOA

E 7 tausaga lea ua faasala ai e le Faamasinoga Maualuga se ali’i e nofosala ai i le Toese i Tafuna, ina ua faamaonia e le Faamasinoga le moliaga mamafa o le faaoolima i le tulaga lua e aofia ai ma le faia o sauaga faasaga i le tamaitai sa avea ma lana paaga, o ia fo’i lea o le  Tina o lona alo e to’atasi o loo i ai.

E le i faigata i le Faamasinoga Maualuga ona tuuina atu sana faaiuga faasaga i le susuga a Martin Sega, ina ua tula’i i luma o le faamasinoga i le vaiaso na te’a nei mo le lauina o lana faasalaga. 

Saunoa le afioga i le ali’i Faamasino Sili lagolago ia Fiti Sunia e faapea, o mau faamaonia e faatatau i le faalavelave sa tula’i mai, atoa ai ma faamaumauga a la Faamasinoga e faatatau i le tala’aga o le susuga a Sega, ua manatu ai le Fa’amasinoga e le toe aoga se faasalaga faanofovaavaaia mo le ua molia, se’i vagana ai se faasalaga faa falepuipui mo se taimi umi.

Talu mai le taimi na pu’e faapagota ai le ua molia e Leoleo i le tausaga na te’a nei, sa taofia pea lava o ia i le Toese seia oo mai i le vaiaso na te’a nei na lau ai lana faasalaga. O le ali’i Loia Fautua lagolago ia Ryan Anderson na tula’i mo le ua molia, ae o le tamaitai loia sili lagolago ia Kristine Soule na tula’i mo le malo.

Na molia e le malo le susuga a Sega i le moliaga mamafa o le faaoolima i le tulaga muamua, o le vaega A lea o solitulafono mamafa, ae i lalo o se maliliega na sainia e le malo ma le ua molia, lea fo’i na talia e le Faamasinoga, na malie ai le ua molia e tali ioe i le moliaga na toe teuteu e le malo, le solitulafono o le faaoolima i le tulaga 2, e aofia ai sau’aga i totonu o aiga, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, ma le salatupe e le sili atu i le $5,000, pe faasala foi i faasalaga uma ia e 2.

I le tali ioe ai o Sega i le moliaga e pei ona ta’usala ai o ia e le Faamasinoga, na ia ta’utino ai e faapea, i se taimi o le tausaga na te’a nei, 2020 i Amerika Samoa, na ia faaoolima ai i lana uo tamaitai, poo le Tina o lona atalii e ala i lona faaaoga o se popo e tu’i ai lona ulu.

Na ta’utino atili le ua molia e faapea, o lana gaioiga sa faia i lea aso, sa le tusa lea ma ala o le tulafono.

Ina ua maua lona avanoa mai le Faamasinoga, na faatoese ai loa le ua molia e tusa ai o lana solitulafono sa faia, ma ia talosagaina ai se isi avanoa se tasi mo ia se’i toe fo’i atu ai i tua i lona aiga e tausi ona matua faapea lana fanau. 

Na ta’utino le ua molia i le Faamasinoga, na te le toe solia se tulafono a le malo, ae laa usita’i i tuutuuga uma lava o lana nofovaavaaia. Sa ia taua fo’i le aoga o masina e tele na taofia ai o ia i le Toese, lea ua mafai ai ona ia aoaoina se lesona taua mo loa olaga i le lumana’i, ma ua ia malamalama ai, e le o se mea lelei le solitulafono.

Na talosaga le loia a le ua molia ia Anderson i le Faamasinoga mo se faasalaga mama e aunoa ma le toe tuuina atu i ai o se isi faasalaga faa falepuipui. O le silia ai i le 452 aso lea na taofia ai le ua molia i le Toese, na talitonu ai Anderson, ua lava lea faasalaga e aoaoina ai lona mafaufau. 

Na faailoa e Anderson i le Faamasinoga e faapea, ua tele le suiga o le olaga ma le amio a le ua molia talu ona tula’i mai lenei mataupu, e le gata ua faatagata matua lona mafaufau, ae ua ia lagona fo’i le sese o lana solitulafono sa faia.

E ui i isi ana solitulafono na faamaonia e le Faamasinoga i tausaga ua mavae, peita’i na taua e Anderson e faapea, e i ai lona talitonuga e agavaa ona faasala le ua molia i se faasalaga faanofovaavaaia, ina ia maua ai le avanoa e fo’i atu ai i tua e tautua lona aiga ma saili se isi lumana’i lelei mo ia i le lumana’i.

Na lagolagoina e le loia a le malo ia Soule le talosaga mo se faasalaga faanofovaavaaia, peita’i sa ia finau i le Faamasinoga ina ia toe tuu se isi faasalaga faa falepuipui e tuli e le ua molia, ona o le matuia o le gaioiga sa ia faia.

Na toe faatepa e le tamaitai loia a le malo le silasila a le Faamasinoga i faamaumauga a le ua molia o loo i luma o le Faamasinoga, lea o loo taua ai, e faa 5 ona nofosala o ia i le moliaga o le faaoolima. E le gata o luma o le Faamasinoga Faaitumalo ao lea fo’i ua i ai ma le faamaumauga o lona nofosala i luma o le Faamasinoga Maualuga.

Mai taimi e 5 na ta’usala ai le ua molia i le solitulafono lenei o le faaoolima, o le faa 2 o ia taimi e aofia ai le tamaitai lea fo’i ua mafua ai ona ta’usala o ia i le solitulafono mulimuli lenei. 

Na taua e le ua molia lona aoaoina o se lesona taua mai le silia ai i le tausaga lea na taofia ai o ia i le Toese, peita’i na taua e le loia a le malo e faapea, sa faasala foi e le faaamasinoga faaitumalo le ua molia e nofosala i le toese mo le tausaga atoa, ia ua ta’usala o ia i le faaoolima, ae foliga mai e le o i ai lava se lesona aoga o aoaoina mai ai e le a molia.

Na faamanino e le loia a le malo i le Faamasinoga e faapea, o le tausaga e 2013 na amata aafia mai ai le ua molia i solitulafono seia oo mai lava i le taimi nei. Na amata ana faasalaga i le 90 aso o le Toese, sosoo aima le 4 masina, sosoo mai ai ma le 12 masina, a o lenei lava e fa’aauau pea ona faatino e lenei ali’i le solitulafono o le faaoolima.

O le mae’a ai ona iloilo e ali’i Faamasino o faamaumauga a le faamasinoga e faatatau i lenei mataupu, na tuuina mai ai loa e le  Faamasinoga lana faaiuga e tusa ai o le mataupu ua nofosala ai le ua molia.  

Saunoa le afioga i le ali’i Faamasino Sili lagolago ia Fiti Sunia e faapea, e tusa ai o faamaumauga a le Faamasinoga, ua tele tausaga talu ona aafia le ua molia i solitulafono eseese. O ia taimi uma lava molia ma ta’usala ai o ia i le solitulafono o le faaoolima. O nisi o ana solitulafono sa aafia ai isi tagata ae o isi solitulafono sa aafia ai le tamaitai sa avea ma ana paaga.

E manatu le Faamasinoga, sa tuuina atu muamua le faasalaga faanofovaavaaia mo le ua molia i se taimi ua te’a, ma le faanaunauga na te a’oa’oina ai se lesona taua i lona olaga, peita’i e foliga mai ua mae’a ona faatinoina lea tulaga, ae o loo fa’aauau pea ona aafia o ia i lenei lava solitulafono.

O le finagalo o le Faamasinoga, e le toe aoga se isi faasalaga faanofovaavaaia mo le ua molia, ae ua tatau loa ona tuuina atu i ai se faasalaga faa falepuipui e aoaoina ai lona mafaufau. 

E 7 tausaga lea ua faasala ai le ua molia i le Toese i Tafuna e aunoa ma le tatalaina i tua, faatasi ai ma le salatupe e $2,000.

ISI SOLITULAFONO

E pei ona taua i faamaumauga a le Faamasinoga, o le tausaga e 2013 na molia ma ta’usala ai e le Faamasinoga Faaitumalo le ua molia i le moliaga o le faaoolima i le tulaga tolu, ma poloaina ai o ia na te tulia aso e 90 i le Toese i Tafuna, o se tasi lea o tuutuuga o lana nofovaavaai e 12 masina.

O lea solitulafono na alia’e mai ao taofia ai le ua molia i le Toese e faatali ai se faaiuga o le isi mataupu sa tu’uaia ai o ia ma lona uso, i le faia o uiga mataga i se tamaitiiti e 6 tausaga le matua, e aofia ai ma le faamatamata o le tamaitiiti i ata leaga. 

Ao taofia ai le ua molia i le Toese ona o lea mataupu, sa ia faaoolima ai i se alii pagota, ma ta’usala ai loa o ia i le moliaga o le faaoolimai le tulaga tolu.

I le tausaga e 2016, na faasala ai e le Faamasinoga Faaitumalo le ua molia e tuli le 4 masia i le Toese i Tafuna, ina ua ta’usala o ia i le moliaga o le faaoolima i le tulaga tolu. O se faalavelave na tula’i mai i le va o le ua molia ma lana uo tamaitai, lea na ia faaoolima ai loa i lana uo tamaitai, ae pulu misa ai lona Tina. 

O afioga i ali’i Faamasino Lagolago ia Mamea Sala Jr ma Tunupopo Alalafaga Tunupopo na lagolago i le afioga a  Sunia i lenei mataupu.