Pago Pago, AMERIKA SAMOA

I se pepa o fa’amatalaga mai le Komiti Fa’afoe o le Komiti Koviti-19, ua fa’ailoa ai tulaga o se fonotaga i le vaiaso lenei. 

Sa folasia e Kovana Lutena Talauega E.V. Ale i le Faatino Galuega o le COVID se vaaiga i ana faatinoga o le toe taliu mai. O le a faaitiitia lea faatinoga i ni nai masina o lumana’i a’o tagataga’i atu ta’ita’i e toe tatala tua’oi i lalo o ta’iala faamalosia ina ia faatumau le leai o se COVID i Amerika Samoa.  I le fono mulimuli a le Faatino Galuega ananafi, Aperila 26, na saunoa ai Talauega, le Sui Tofia o le Kovana (GAR) e faailoa le finagalo faafetai e fai ma sui o i la’ua ma le Afioga ia Kovana Lemanu ma galuega uma sa faatino e le Faatino Galuega i nai masina na se’i mavae atu. O ia faatinoga e aofia ai le toe aumaia saogalemu o le silia i le 600 o le mamalu o le atunuu mai Hawaii ma le konetineta o le Iunaite Setete.  Sa ia ta’ua suafa o i latou sa i le Faatino Galuega talu mai le tausaga ua te’a ma le tāua o le galulue faapaaga o sui o le malo ma sui o le itu e tuma’oti i le Faatino Galuega. Aepeita’i, sa ia saunoa o loo iai pea galuega e tatau ona faatino e la latou li’o, ma ia mataala totino uma ma taula’i i la latou manulauti o le taofia o le COVID ne’i ulu mai i Amerika Samoa.

“Ua tatou iloa e le na’o tatou, a’o le fesoasoani mai o lo tatou Alii le Atua – e a’o ina viia pea lona suafa i soo se mea tatou te faia – aua ua na’o tatou o ni mea faigaluega e auauna i o tatou tagata,” o le saunoaga lea a le Kovana Lutena.  Ina ua mae’a lana saunoaga puupuu, na faailoa ai e Talauega suiga i le faafoeina o aiaiga o le kuarenitini a’o lumana’i faigamalaga i Hawaii ma le toe faatele o tagata galulue i lo tatou lotoifale e faaagaaga mo malaga faaopoopo i masani o le tau mafanafana o loo lumana’i nei.  Sa avatu foi se finagalo faalu’itau o le Kovana Lutena i le Faatino Galuega ma le Matagaluega o le Soifua Maloloina ia tumau i le silafia o fautuaga mai le CDC ma tusitusiga tau tuipuipui e ono iloa ai ni suiga faamāmā o ni tulaga faamalosia o kuarenitini.

E tatau ona manatua o le malaga mulimuli nei o le toe taliu mai ia Aperila na faaitiitia ai mai le 12 i le 7 aso kuarenitini (quarantine) i Amerika Samoa o malaga toe taliu mai. O le malaga foi lea na faanofoesea ai se tama ma lona aiga sa maua i su’ega ae le o se tulaga e pipisi, ma o loo faatulagaina e toe faate’a i le vaiaso nei.   

O pasese uma sa malaga toe taliu mai i malaga e 3 ua mavae, ua tatala uma atu mai le kuarenitini ina ua mamā a latou su’ega o le COVID, se’i vagana si tama lea ma lona aiga afai e solo lelei uma e pei ona fuafuaina malaga toe taliu mai, ua saunoa Talauega o le a faataga le Hawaiian Airlines e tatala a latou galuega ma mafai ona tusi sa’o ai igoa o tagata fia malaga i lea kamupani vaalele tuma’oti. Aepeita’i, o tagata uma e fia malaga mai i Amerika Samoa e tatau ona aumai faamaoniga ua atoatoa ona tuipuipuia mai le COVID-19.

Saunoa foi Talauega o le a faaauau le faatapulaa o malaga a le Hawaiian Airlines ma o le a faafoe e le Faatino Galuega tulaga faamalosia o aiaia mo tagata malaga mai i Amerika Samoa. Na ia toe faamamafa le manatu sa ta’ua i fonotaga muamua: ua le mafai e le Faatino Galuega ona faaauau malaga toe taliu mai ona o le taugata.

Sa toe lapata’ia foi le Susuga i le GAR sui o le soifua maloloina ia mata’i pea tulaga faamalosia e le CDC ma ia atagia ia faamalosiga i se malosi e oo i ai Amerika Samoa, pe a manatu i le tulaga ese o Amerika Samoa mai isi setete ma teritori ona e leo iai se COVID.

LISI TOE TALIU MAI

Na saunoa foi le Kovana Lutena i le faasologa auaua’i o le faamautuina o malaga toe taliu mai. O lea faasologa e tali ai le faaseā mai o le mamalu lautele. O le lisi atoa ua resitala talosaga, e tusa ma le 2,000+. E su’e muamua e le Matagaluega o le Soifua Maloloina ia mautinoa ua usita’ia uma tulaga faamalosia tau foma’i. Ona faaoo lea o suafa i le Ofisa o le Loia Sili e iloilo atoa ai tulaga o le nofomau ma pepa malaga. O le laasaga mulimuli o le faaoo o le lisi i foma’i i Hawaii e faafesoota’ia pasese e uiga i tulaga o le kuarenitini i Hawaii.

Na saunoa foi Talaeuga i le faasea mai o nisi o le atunuu ona ua folafola atu e nisi o o latou aiga e sauna mai ua iai i le malaga e sosoo ai. Ae ina ua le maua atu se valaau i ia ufo mai le vaega galulue a le soifua maloloina i Hawaii, ona faasea mai lea i ofisa o le Kovana ma le Lutena Kovana.

Se’i vagana nai tagata to’aitiiti o le DOH ma le Ofisa o le Kovana, o le to’atele o totino o le Faatino Galuega latou te le o iloa le lisi ua mae’a ona uia laasaga uma ma aiaiga ua faaoo i le vaega o foma’i i Hawaii. Na folasia manino e Talauega i le Faatino Galuega e le mafai ona latou folafolaina se mea e le oo i ai lo latou malosi e faataunuu ai. E lelei pe a latou ta’utino i tagata le mea moni, na’o le pau le galuega a totino o le Faatino Galuega o le faamautinoa ua resitala le tagata fia malaga. E leai lava se manatu o le Faatino Galuega i tagata e talia i malaga ta’itasi.