Pago Pago, AMERIKA SAMOA

E to’atele faiaoga mo Aoga Amata (Early Childhood Education-ECE) ua fa’aalia o latou lagona faasea ma le le fiafia i le tuai lea ona maua o latou totogi mo vaiaso e 4 sa galulue ai i polokalame o le summer o le tausaga nei.

Na fuafua se vaega o nei faiaoga mo se solo tete’e i le aso Faraile o le vaiaso na te’a nei, e faaleo atili ai o latou lagona le fiafia, peita’i e le i mafai ona faataunuuina lea solo tete’e, ina ua manatu nisi o i latou e toe tolopo te isi lea fuafuaga seia i ai i se taimi.

Na taua e nisi o nei faiaoga i le Samoa News e faapea, ua tele vaiaso o olegia i latou e le Ofisa Autu a le ECE e uiga i lenei mataupu. O nisi o taimi e fa’aali atu uiga le fiafia o le Ofisa Autu pe a latou fesiligia soo le mataupu e fa’atatau i a latou siaki mo vaiaso e 4 o le summer.

Na taua e se tasi o tamaitai faiaoga ua silia i le 10 tausaga o lana auaunaga e faapea, e le malamalama i le mafua’aga ua ala ai ona tuai na maua a latou siaki, a o lea ua  maua siaki a faiaoga o aoga maualuluga ma aoga tulaga muamua sa latou galulue faatasi i le polokalame o le summer.

Na taua e le isi tamaitai faiaoga ua silia i le 15 tausaga o lana tautua e faapea, ua uma ona faia lana sailiiliga e uiga i lenei mataupu, ma ua faamaonia ai, e leai ni pepa ua faila atu i le Ofisa o le Tupe e faamaonia ai e ono maua ni o latou totogi.

“O le mae’a ai ona faia o la’u sailiiliga i lenei mataupu, na ou manatu ai loa e sili pe a taoto atu le mataupu i la’u Loia na te tauaveina, ona e i ai o’u masalosaloga e i ai mea faaletonu ua mafua ai ona tuai na maua a matou siaki,” o le faamatalaga lea a le tamaitai faiaoga lea.

O nisi o faiaoga na fuafua e auai i le solo tete’e, na latou fa’ailoa i le Samoa News le faateia o i latou ina ua latou maua faamatalaga e faatatau i le fonotaga faanatinati a faiaoga o le ECE lea na faia i le taeao lava o le aso Faraile na te’a nei. 

Na taua e le to’atele o faiaoga le faateia o i latou ina ua maua faamatalaga e ese le nofoaga ua ave i ai le Fonotaga a le Ofisa e faia ai. O le Fonotaga faalemasina lea e masani lava ona faia i le potu fono i le nofoaga autu a le ECE i Utulei, peita’i na faataunuuina lea Fonotaga i le maota o le Faatonu o le Ofisa o le ECE ia Milaneta P. Tinitali i Vaitogi.

Na taunuu le Samoa News i le nofoaga autu o le Ofisa o le ECE i Utulei i le taeao o le aso Faraile na faamaonia mai ai e nisi o faiaoga sa i ai, o le Fonotaga e faia i Vaitogi. Na maua le avanoa e fesiligia ai le Faatonu o le ECE e uiga i lenei mataupu. 

Ina ua fesiligia i le mafua’aga ua faia ai le Fonotaga i lona maota i Vaitogi ae ua le faia i le potu fono masani a le ECE i Utulei, o le tali muamua lava a le Faletua ia Tinitali, sa ia saunoa mai e faapea, “E leai se feau a faiaoga latou te fesiligia ai le nofoaga e faia ai le Fonotaga, o le matafaioi lena a a’u le Faatonu.”

Saunoa Tinitali e faapea, e i ai le potu fono masani a le ECE i Utulei, ae talu ai e le o ola le ea malulu o le potu fono, na ia manatu ai loa e sui le nofoaga e faia ai le Fonotaga, ona o le vevela ma le tulaga faaletonu o le potu fono mo faiaoga.

Sa faatulaga le Fonotaga e faia i le potu fono a le Faletalimalo o le Tradewinds, peita’i o le aso Lulu o le vaiaso na te’a nei na toe logoina ai o ia e le aufaigaluega a le Faletalimalo, ua le avanoa le potufono mo le latou faamoemoe, ma ia faia ai loa le faaiuga e ave le Fonotaga e faia i lona maota i Vaitogi.

Ina ua fesiligia i sona finagalo e faatatau i le mataupu o loo faasea ai faiaoga, i le le maua lea o latou totogi mo vaiaso e 4 na galulue ai i le polokalame o le summer, na saunoa le tamaitai Faatonu o le ECE ia Tinitali e faapea, ua uma lelei ona faamalamalama i faiaoga le mafua’aga o le tuai ona maua o siaki, e le o se faaletonu o le Ofisa a le ECE, ae o le tuai ai lava o se tali mai le Ofisa o le HeadStart lea e aumai ai le tupe e totogi ai latou.

Sa i ai le manatu e fa’aaoga le isi a latou grant e taua o le ‘basic grant’ e totogi ai faiaoga, peita’i na fautuaina i latou e le Ofisa o le Tupe a le tatou malo, e le tatau ona faia lea tulaga, ae faatali pea i le tupe mai le Ofisa o le HeadStart e totogi ai faiaoga.

Na faamaonia atili e Tinitali i le Samoa News e faapea, ua mae’a ona tuuina atu pepa uma lava e manaomia mo le totogiina o faiaoga. Sa ave fo’i le tusi i le HeadStart ma faailoa i ai tulaga uma lava.

O le vaiaso na te’a nei na maua mai ai le imeli mai le sui o le Ofisa o le HeadStart, ma talosaga mai ai mo se vaiaso e faamae’a ai gaioiga o loo faagasolo ona faamatuu mai ai loa lea o le vaega tupe e totogi ai faiaoga ma faatino ai isi auaunaga a le Ofisa o le ECE i Amerika Samoa.

Na taua e Tinitali le faanoanoa o lona loto ina ua faitau i tusitusiga a nisi o faiaoga o loo aafia i le to’atele e lei maua totogi o faia i luga o le Facebook e faaleaga ai le Ofisa o le ECE. E le gata fo’i i lea, sa ia lagona fo’i le faanoanoa ona o le solo tete’e e pei ona faalogo atu o loo fuafua nisi o faiaoga e fa’ataunuu. 

I lona lagona o ia o le Faatonu o le ECE, e le o le auala lea e foia ai faafitauli faapenei pe a tutupu. 

“Afai e i ai se mea e fia malamalama ai susuga i faiaoga, o loo avanoa lo’u ofisa e susu mai ai matou te faasoa ma talanoa, nai lo le ave uma o a latou manatu ma faasea i le Taitaifono o le Komiti o Ta’iala a le ECE (Policy Council), ae le o ia lea e maua i ai le tali atoatoa o le faafitauli,” o le saunoaga lea a Tinitali.

O le Taitaifono o le Policy Counsil (PC), o le fetalaiga a Fauaa Lokeni.

O le faafitauli ua mafua ai ona manatu faiaoga ua le totogia i latou, ona ua aga’i faiaoga ma faaleo o latou faafitauli ia Fauaa, e pei ona saunoa Tinitali. E le i oo atu Fauaa la te faasoa, ae ua alu ma fai ana lava ia suesuega i le Ofisa o le Tupe, ma faalele ai loa le tala e le o faia se galuega a le Ofisa o le ECE.

Saunoa Tilitali e faapea, e le popole pe faataunuu le solo tetee pe leai, pau lona popolega, o le a vaavaai mai ai le Ofisa a le malo tele o loo auala mai ai tupe e faatupe ai gauega a le ECE ma faapea, e le mafai e le ECE ona pulea lona lava loto i fale.

E lei maua mai se saunoaga mai le Faatonusili o Aoga a le malo ia Dr. Ruth Matagi-Tofiga e tusa ai o le imeli a le Samoa News mo sona finagalo e uiga i lenei mataupu. Ae na maua le avanoa e tali mai ai le Sui Faatonusili o Aoga, susuga Faauifono Vaitautolu.

I lana saunoaga, sa ia faamaonia ai le saunoaga a Tinitali e faatatau i le mae’a lea ona tuuina atu pepa e totogi ai faiaoga mo le polokalame o le summer. O le faafitauli o loo i ai e pei ona saunoa Vaitautolu, o loo faatali le faamatuu mai e le Ofisa o le malo tele o tupe e totogi ai faiaoga.

Sa ia taua atili fo’i e faapea, e le na o faiaoga ECE o loo aafia i le faafitauli lea, ae i ai fo’i faiaoga o aoga maualuluga faapea ai ma faiaoga o aoga tulaga muamua e le i maua foi a latou totogi.

Na teena e le Taitaifono o le PC ripoti fai mai ua uma ona tuuina atu pepa mo le totogiina o faiaoga. Sa ia taua e faapea, e leai ma ni pepa ua tuuina atu. Sa faia lana suesuega ma faamaonia ai lea tulaga. Sa ia taua atili fo’i e faapea, e na o faiaoga ECE lea e le o maua ni totogi, ae ua maua uma totogi o faiaoga o aoga maualuluga ma aoga tulaga muamua mo vaiaso e 4 sa galulue ai i le polokalame o le summer.