Pago Pago - AMERIKA SAMOA

Ua faamaonia e le Loia Sili, le susuga Fainuulelei Falefatu Alailima-Utu, le le'i lisiina i se isi le fale na iai le faletupe o le ANZ i Tafuna, ona o loo faia feutanaiga i le taimi nei ma le Faletupe e Inisua e le Malo Feterale i fafo, e faatu se faleoloa i le teritori.
"O loo matou taofia pea le fale o le ANZ i Tafuna mo lesi faletupe, e inisua e le malo feterale, ia talosia afai ae o mai, e mafai ona latou faaaogaina le fale," pei ona saunoa le Loia Sili i le mataupu lea i totonu o le maota I le vaiaso nei.
E le'i tele nisi faamatalaga a le Loia Sili, i le mataupu lea, talu ai o lo o faia "feutanaiga" i le taimi nei.
Saunoa Fainuulelei, "E le tatau ona o'u faailoa faalaua'itele auiliiliga o le feutana'iga. Talu ai, e ma'ale'ale le mataupu, ae e tatau lava ona faailoa atu i le taimi talafeagai, aemaise ai lava pe 'afai ae faamautu se maliega, ae mo le taimi nei, o lo o faagasolo pea faatalanoaga. "  
O le taimi nei , i le saunoaga a le Loia Sili, o lo o faatali I le "tusi ofo" ona faatalanoa loa lea o le Malo o Amerika Samoa ma le faletupe i le latou tusi ofo, ma nisi aiaiga e latou te mana'omia a'o le'i omai i Amerika Samoa.
Na laga le mataupu lea i le Maota o Sui, ina ua faatalanoa le pili e teuteu ai le tulafono 28.0214 e sootaga i teuga tupe a le malo Amerika Samoa ma le Faletupe a le Teritori a Amerika Samoa (TBAS), pei ona faamauina I le taimi na faatu ai le faletupe mai le 2015.
O le mataupu lea i le fale o le ANZ na laga e le afioga I le Faipule ia Avagafono Tuavao Vaimaga Maiava, talu le uumi o laina i le TBAS
Na ia faamanatu ane foi, o lo o iai fale i Fagatogo ma Tafuna sa faaaoga e le ANZ Amerika Samoa Bank, ma ia fesiligia pe o iai se manatu o le TBAS e faaaoga fale na e lua mo le siitia o le auaunaga.
Saunoa Avagafono: "Pau le itu ua laga ai le mataupu lea, talu o aso uma lava e vaaia ai le uumi o laina . Ae o iai se isi tou fuafuaga e tatala se isi lala?"
Ae ole tala a le Pule o le TBAS David Buehler o lo o su'e se isi o latou fale.  "Sa matou fesiligia le malo fatatau i le fale o le ANZ i Tafuna, ae o le tala mai o lo o taofi e faatali ai lesi faletupe , ma e le o avanoa, peita'i sa ofo mai Fagatogo lea e faia iai le fuafuaga mo le faletupe i lea foi itu o le taulaga. "
Peita'i na saunoa Fainuulelei, e na te le o mautinoa po o ai na ofoina le fale o le ANZ  i Fagatogo i le TBAS ma Buehler.  "O a'u lesi sui o le Komiti o le faletupe a le ASG ae matou te le i ofoina, vagana o se isi tagata na ofoina le fale. O le mea tonu lava ia, ou te manatu o la lava e faaaoga le fale. Ua uma ona faailoa mai e latou te mana'omia lava le fale, o le latou fuafuaga i lo'u talitonuga o le aso 31 o Ianuari le latou aso mulimuli i le fale tonu lena.  O lo'u iloa o lo o tilotilo le TBAS ia eseese ni fale e o iai, ma e ono fau foi se fale i Tafuna mo le TBAS”.
Na ta’ua foi e Fainu’ulelei, o lo o faatali le fale o le ANZ i Tafuna mo le faletupe e inisiua e le malo feterale ma le faamoemoe afai e omai, e mafai ona latou faaaogaina le fale lena.  Peita'i afai e le fetaui na fuafuaga, e mautinoa lava le amanaia o le talosaga a Buehler e faaaoga le fale lena.
Ua uma ona faailoa manino mai e le Loia Sili, o le fanua ma le fale o lo o fesiligia, o mea totino a le malo "e latou te le tau aumaia fua se mea - o mea na a tatou pe a o’o i le taimi o le a o ese.  O faaupuga na o loo tusia i lisi e lua”.
Sa faailoa mai foi e le Loia Sili le taua o le iai o faletupe e inisiua e le malo feterale, ma le  mafuaaga o le tilotilo i se isi faletupe lona lua.
" Muamua, e mafai ona faamautinoa, i le iai loa o teugatupe a tagata e oo atu i le $250,000, e taua tele le itu lena, e mafai ai ona inisiua teugatupe a le 90% o tagata o nofomau i Amerika Samoa.  Lona lua, o le lape o le malo feterale.  E taua ai tele le i ai o lape o le malo, e mautinoa ai le puipuia o tagata ae o le saogalemu o le pulega ole faletupe e faatulafonoina ele FDIC ma vaavaai.  O loo iai foi isi ala ga tupe i le teritori. Pei o le Navy Fed, e inisiua e le malo feterale, peita'i o lo o i fafo atu o Amerika Samoa.  E le o maua i le teritori, ina ia mafai ai e tagata iinei ona faia faaiuga i talosaga mo na alagatupe. O se mataupu taua tele le mafai ai ona mau auala le au fai pisinisi ma tagata i alagatupe- o auala na e faatupula'ia ai le tamaoaiga.  Ae afai foi e iai faletupe e inisiua e le malo feterale, e mafai ona maulalo a latou “credit fees”, taugofie ma pa'u ana tului - e sili atu foi lena ona taua mo tagata, ma faaaoga ai loa le “investment act” mo faletupe iinei, ma o le latou matafaioi o le aumaia o le auaunaga talafegai i o tatou tagata”.