Ads by Google Ads by Google

Fa’ataua le Soifua ua Fa’aumauina - Tautua & Sailiga o le Saogalemu


Le sao o le UCEDD o lo ua latou saunia ai Fu’a a’o le isi itu o le fu’a ua fa’apipi’ia ai suafa o i latou ua mae’a faia tui puipuia a o latou aiga i Amerika Samoa nei, ma ua oo mai fo’i i le Malae a le VA mo lea fa’amoemoe. Ua taua’aoina ia i latou se fu’a e fa’amanatu ai latou fitafita o taua ua maliliu. O le fu’a lenei mo le ali’i o Anthony Fuga, ua tusia ai le suafa o lona tua’a ua maliu, ma sa fe’au aualofa mo ia. [ata: Leua Aiono Frost]

Le vaega a le VA ma fitafita fo’i o le USArmy Reserve o lo ua tapena mo le fa’amoemoe e fa’amanatuina ai le aso Maliu tautua uma a Vetereni ua mapu mai i Ti’asa. [ata: Leua Aiono Frost]

O le vaega o le sauniga fa’amanatu o e ua maliliu ua fa’apapa fa’atolu ai fana o le fa’ailo. [ata: Leua Aiono Frost]

Pago Pago, AMERIKA SAMOA

 

Na ala usu le afioga le Kovana sili Lemanu Peleti.S. Mauga fa’apea fo’i le afioga le Lutena Kovana Talauega Eleasalo Va’alele Ale ina ia fa’ataunuu le fa’amoemoe, ia fa’amanatu i latou na o fitafita tuai, ae maise o le vasega o tagata lautele uma sa gasemaolo latou folauga i lenei soifuaga i  le moana sausau.

 

Ua faapea fo’i ona asia nofoaga o lo ua falelauasi ai o nisi o Toa o le atunuu, o tua’a sa loto ina ia sa’oloto ma saogalemu Amerika Samoa, ao nisi sa saili malo mo se fa’aea i aiga, ekalesia ma le tatou Malo.

 

O le asia ai o le sami loloa sa malaga fa’apitoa ai lana susuga le Sui Kovana ma le faletua fa’apea le Fa’afeagaiga CCJS Pago Pago, Rev Patolo Mageo na te ta’ita’ia le sauniga mamalu ona lafoa’i lea o le pale fugala’au manogi e fa’ailoa ma fa’amanatu ai pea le agaga alolofa o le tatou atunuu atoa faapea le pa’ia o aiga ma pelega a i latou uma, na maliliu i le Sami loloa a’o nisi ua avea mo latou oliolisaga tumau ua filifilia e tusa o latou mana’o tupito.

 

Peita’i o le Taiulu o le malo sa avea ma sui mamalu na te asia le Faga i Faga’alu, o le nofoaga sa amia ai le soifua a’o galuea’ina ina a mafai ona fa’ataoto tapenaga ina ne’i sofa’i le saogalemu o le atunuu, e vasega au na fa’aolioli e tu’ia atumotu o le Atu Samoa i le 1941-1942.

 

Ua mae’a ona fa’ata’atitia ai pale fugala’au manogi, aua e manogi lelei le saogalemu sa manatu i ai tua’a ua faiilagi le faigamalaga i le olaga nei, ao taumafai ona fa’atumau le saogalemu o le lautele o le atunuu.

 

Ua mae’a fo’i ona fa’ataoto e lana afioga le Kovana Sili le pale fugala’au manogi i le Nofoaga o le Tramway poo le Ato i luga o le mauga i Utulei, i le itula e 7:00 i le taeao na fa’ataunuu ai lena tulaga ma tapena ai loa le sauniga i le fanua tanu poo le Oliolisaga Tumau o le to’atele o Fitafita, e le o ni o tatou tagata, ae ua afu le latou tautua i lo tatou Malo ma o tatou tagatanuu. O le tu’uina ai o le Teu Fugala’au manogi sasala, o le nanamu lea o le latou fa’afetai e si’i pea i aso uma o lo tatou ola, aua o le latou soifua sa fa’amaumau mo le tautuaina o i tatou uma.

 

O le faigamalaga i luga o le sami, sa fa’ae’e lea i le itula e 6:30 i le taeao na tete’e ese atu ai le va’a mai le uafu i Fagatogo ma aga’i atu mo le fa’amoemoe, 5 maila i le gataifale, ma faataunuu loa le sauniga pu’upu’u ma lafoa’i ia le pale fugala’au manogi e fa’afetaia ai le tautua sa fa’atino ma i’u ai le soifua i le tu’ugamau suavai.

 

Ina ua poto mai nei mamalu e lua i le Malae i Tafuna, o iina sa fa’atasi ai le lasilasi o le atunuu mo le toe mafutaga fa’ailogaina o le Aso e Manatua ai i latou o pelega ua tu’ua i tatou, ma ua malolo mai galuega e tele.

 

O le malae o le Ofisa Autu o le Vetereni, lea sa faia ai le fa’amoemoe ma sa tapena mai ai fo’i le taumafataga matagofie o le Malu o le Teao i mea tausami Samoa, ae maise o ona teuteuga uma seia oo i le mea tausami mamafa mo le aoauli.

 

Na tuai amata le polokalama i Tafuna ona e tele nofoaga sa faia ai sauniga uma aua lenei aso fa’amanatu mo pelega ua malolo mai galuega tiga e tele, ma o le lauga fa’apitoa a le afioga le Kovana Sili, sa aotelega uma ai lana faasoa ma le fa’afetai tele mo i latou uma sa asia i lenei taeao, fa’atasi ai ma pelega a aiga uma o Amerika Samoa ma le malo tele o Amerika, o lo ua fa’ata’atitia ai teu fugala’au manogi ma teuteuga felanulanua’i, e toe manatua ai pea i latou e i tatou i lenei olaga.

 

“Aua ne’i galo ia te outou lo latou sao i le tatou olaga o soifua ai nei. Aua ne’i misia la outou fa’afetai i le Atua ona o i latou, o ni meaalofa taua mo i tatou i le olaga nei. Ia tatou manatua pea i latou uma ma lo latou tautiga i le taumafaiga ina ia tatou manuia, ma soifua sa’oloto.”

 

Sa saunoa fa’apitoa o ia e tusa o le auaunaga a Fitafita Tuai i tafa o taua, ma ia fa’ailoa ai lona taofi, “O le vasega fo’i o Fitafita Tuai uma ua fa’amaumauina le soifua, ona o le taumafaiga ina ia tatou nonofo saogalemu ma le filemu i o tatou laueleele ma laufanua uma o le Iunaite Setete o Amerika, fa’afetai mo lo outou taga’i mamao i lenei vaitau, ua matou o ola ai pea o le saogalemu sa outou fitaituga ai i nofoaga o vevesi ma tafa o taua.”

 

“O nisi o i latou o tama fanau a Samoa sa tau ma le loto Ina ia tatou saogaleu ma nonofo filemu, ua le toe fo’i mai, ua amia le soifua a’o tautua tuavae i le vaega au, o nisi ua le iloa o latou tino ma ua lagomau ai pea i nofoaga o vevesi ma tafa o taua, a’o nisi fa’afetai ua toe mafai ona fa’afo’i mai o latou tino i aiga. Pe o tatou manatunatu ea i le tau sa latou fa’atino mo lo tatou saogalemu. Ua tatau ai ia i latou uma ona manatua pea i latou. Ua alagatatau ai foi ona si’i a’e le fa’afetai i le Atua, aua ua amia lo latou ola, ae ua ausia ona mautu lo tatou saogalemu ma le nofo filemu.”

 

“O lo’o tagi mai eleele o na atunuu mamao sa faatino ai le latou tautua tuavae mo le tatou malo, lo latou toto, ua tanumia ai ma o latou tino, ina ia sao ma uli le tatou folauga i le saogalemu ma le fiafia i le filemu ua tatou maua. Fa’ailoga lou fa’afetai i sau teu fugala’au e tapena e fa’aoo i o latou tuugamau, ma ia faia lava I tausaga uma lena fa’ailo o le alofa. O le fu’a mulimuli lea o le fa’asologa o tagavai ua mae’a sisi’i a’e i lenei taeao. O i latou na o atu ofitafita ua amia ai lo latou soifua, ae ua le toe fo’i mai e o’o fo’i i lona tino.”

 

“Mauga o Kilepoa e, aua ne’I toe pa’u le sau i ou atumauga, aua fo’i nei toe pa’u le ua i ou laufanua…. aua ua tiga a’u ona o Apisaloma…”

 

O le auau lea o le tautalaga faaumiumi a le susuga le Faifeau Taitai o le sauniga na tatala ai le fa’amoemoe mo le fa’amanatuga o i latou uma ua maliliu ma ua lagomau mai i ti’asa o le atunuu atoa, le susuga Rev. Asiata mai le EFKAS i Matuu ma Faganeanea. Ua talafeagai lea fa’amoemoe ma le alaga fa’anoanoa a Tavita le tupu o Isaraelu, ina ua maliu lana uo mamae lava o Apisaloma.

 

“O nisi o i matou sa va’ai ma auai i tafa o taua ma nofoaga o vevesi, sa matua va’ai patino i le fita o le maliliu mai o nisi a’o e pupula atu i ai, ma e taumafai e fa’asao mai le ola ma’ale’ale ona o manu’aga. Lea ua mae’a mai le tautua, ae o nisi ua matua le mafai ona toe saunoa i ai, pe toe fa’atepa i ai le mafaufau ma le va’ai, aua e le faigofie lava.”

 

“Peita’i o nisi e mafai ona toe fetufa’i ma talanoa aga’i i ai, aua o mea ia e mafai ona fa’ailoa atu ai i nisi le ogaoga o le tauto ai e tautua mi tafa o taua ma nofoaga o vevesi. I le va’ai atu i le tele o le toto masa’a, e matua le mailoa e lou sui o ola pea, pe fa’apefea ona tusa lea ma le saogalemu ua nonofo fiafia ai i tatou i lenei vaitau.”

 

“O le pese a Tavita ua fa’ailoa ai lona mafatia, ma o le ituaiga mafatia lea o lo’o a’afia ai i tatou i taimi uma e maliu ai se tasi e pele ia i tatou, aua o lo’o tautua fo’i o tatou tua’a i ala e tele, ina ia tatou soifua ma le saogalemu pe a mavae atu i latou. O ala sa latou sailia ai nei manuia, e le taitai ona gafatia e i tatou i lenei vaitau ona fa’atino.”

 

O le tatalo na saunia e ia ma faamatuu atu ai le avamoa mo le fa’asologa o le polokalama. O le tu fa’aaloalo sa saunia mo le Iliga o le pu ina ua mae’a ona faata’atia le Pale Fugala’au Manogi i luma o le ma’a fa’amanatu o fitafita Tuai ua ma ua fa’apapa fo’i fana fa’atolu, o le fa’ailo o fitafita tuai uma ua maliliu a’o fa’atino tautua i vaega au eseese o le malo tele. O lea tu fa’aaloalo sa tapena lea e le US Army Reserve i Amerika Samoa nei.

 

“O i latou fo’i nei sa nafa ma le sisiina ae o tagavai a le malo tele o Amerika, le Malo fa’ateritori o Amerika Samoa, ma Agiagia uma a Vaega Eseese o le Vaega Au e oo lava i le toe Fu’a mo i latou o lo’o fa’afalepuipuia ma leiloa atu ai lava o latou tino. Fa’atasi ai mai latou na fa’amaonia sa tiute i nofoaga o vevesi ma le ma tafa o taua, ma e le o toe maua mai lava latou tino.”

 

O le toega o le fa’amoemoe na lagia ai vi’iga o le Atua mo lenei sauniga mamalu e le EFKAS Matuu, ma fa’amae’a ai loa lava le latou aso fesilafai i le aiga o le aoauli.