Pago Pago - AMERIKA SAMOA

O le vaiaso ua mavae na amataina ai iloiloga a le Komiti Aufaatasi a le Senate, i lalo o le taitaiga a le afioga Senatoa Togiola Tulafono, e soalaupuleina ai le mataupu i le tu’uina atu o le aia tatau i tagata ua loa ona aumau i totonu o Amerika Samoa (long-term residents), e mafai ai ona palota i palotaga a le teritori.

Ae peitai, sa fa’aalia le tete’e o molimau muamua e toatolu, i le suiga o le Faavae ina ia mafai ai e tagata mai fafo ua silia ma le 20 tausaga talu ona aumau i totonu o Amerika Samoa, ona auai i palotaga ale teritori.  E le gata i le 20 tausaga, ae ia faaipoipo atu i tagatanu’u o Amerika Samoa ma ia totogi lafoga.

Sa faamanatu atu e Togiola i molimau, o lenei iugafono sa tu’ufaatasia e le gata i le Maota o le Senate ae faapea foi le Maota o Faipule.

Afai ae pasia mai e maota e lua, ona faaooina atu loa lea i le Kovana ina ia mafai ona aofia i totonu o palotaga a Tutuila ma Manu’a, i le tausaga palota fou.

Ma afai ae finagalo iai tagata palota o le teritori, ma pasiaina lenei suiga, o le a faapea loa ona faaooina atu i le Failautusi o le Initeria, ina ia mafai ona faaoo atu i luma o le Konekeresi a le Iunaite Setete mo le pasiaina, ona mafai lea ona suia le faavae.

Sa faamalamalamaina foi e Togiola, afai ae pasia lenei suiga, o le a iai ni suiga, po o ai o le a palota mo taitai o le teritori, e pei o le Kovana, Lutena Kovana ma Faipule, seia vagana ai le sui i le Konekeresi i Uosinitone.  E le palota ai i latou nei, ona o le tofi lea o se tofi feterale.

I le saunoaga a le afioga Pulu Ae Ae Jr., le uluai molimau, sa ia ta’ua ai e faapea, o le mafuaaga ua ia auai ai i le iloiloga lautele ona e popo’e lona loto i le lumanai o Tutuila ma Manu’a.  Sa ia ta’ua e faapea, o lenei faaiuga e tatau ona faia e taitai o le atunu’u, ae le o ona tagata.

Sa ta’ua e le afioga Pulu e faapea, na silia ma le 20 tausaga o tautua i totonu o le malo o Amerika, ae peitai, sa le mafai ona ia palota i palotaga a Amerika aua o ia o se ‘National’, ae le o se sitiseni o Amerika.  Sa le mafai foi ona palota a’o iai o ia i totonu o le militeri ona o lona tulaga o le ‘National’.

Na molimau le afioga Pulu, e toatasi sona alo sa fanau i Amerika ma o lo o mafai ona palota i totonu o Amerika, ae o lona aiga atoa lea na fananau i totonu o Amerika Samoa, o lo o tumau pea i latou, o ‘Nationals’.  Ma ua talitonu o ia, afai ua finagalo tagata mai i fafo e fia palota i totonu o Amerika Samoa, e tasi lava le auala e tatau ona fai e i latou ia, o le o lea i Amerika e avea ma sitiseni.

Sa saunoa foi le afioga Pulu e faapea, o lo o iai se tulafono e ao i tagata ona mulimulita’i iai, e alo ‘ese mai ai i le solia o le tulafono, pe a faia nei suiga.  Ma e toatele alo ma fanau a Amerika Samoa o lo o i atunu’u i fafo, o lo o fia palota, ma e seiloga e avea i latou ma sitiseni o Amerika, ona faato’a mafai lea ona palota.  Sa ia toe faamamafaina mai e faapea, o le I’uga o lenei mataupu, e tatau ona sau mai i taitai o le malo o lo o iai nei.

O le molimau lona lua o lenei iloiloga, o le tina ia Ruby Reid ma sa ia saunoa e faapea, “E le o talitonuina e lo’u tagata Amerika Samoa i tulaga o iai le immigration.”  Sa ia fa’aalia lona tete’e i lenei mau ina ia mafai e tagata mai atunu’u i fafo ona auai i palota a Amerika Samoa, ona i sona manatu fa’aalia, o lo o iai fanua ua o mai tagata mai atunu’u i fafo, ma pulea.  Ua talitonu Reid, o lo o totogi lafoga tagata nei, ona o avanoa ua mafai ona o latou maua e nonofo ma faamautu ai i totonu o Amerika Samoa.

O le molimau lona tolu, o le susuga Mamea Talamesi Ta’ala po o ‘Mr. T’.  O le susuga Mamea e malaga mai i Sasaai, Faasaleleaga, Savaii ma ua loa foi ona ia ola ma galue i totonu o Amerika Samoa.  Ua 40 tausaga talu ona faaipoipo atu i se tamaitai mai Manu’a, Ofu ma Olosega.  Ma o le auala lea na mafai ai e ia ona avea ma tagata nofo mau o Amerika Samoa ma mafai ona ia aumaia ni tagata mai atunu’u i fafo.

Na saunoa Mamea, sa malaga atu i Amerika ae sa le mafai e ia ona ‘sponsor’ nisi i Amerika ma sa le mafai foi ona galue i Amerika, e ui lava o lo o iai sona numera saogalemu (Social Security card). 

Ae i se taimi mulimuli ane, ina ua avea lona to’alua ma sitiseni o Amerika, ua mafai ai ona faia ona pepa ma avea ai foi o ia ma sitiseni o Amerika.

Sa faamaonia e Mamea ia le saunoaga a le afioga Pulu, i le malaga mai lea i Amerika e saili atu ai sitiseni, ina ia mafai ai ona auai i palotaga. 

Sa fa’aalia e Mamea lona foi tete’e i lenei fuafuaga mo le suia o le faavae.