Ads by Google Ads by Google

Faate’a le Faiaoga mai Faasao Marist i lona faaoolima i se tamaitiiti aoga


[ata: foa'i]
ausage@samoanews.com

Pago Pago, AMERIKA SAMOA

 

Ua tasi le faafitiga o aleaga i le Komiti Faafoe o le Pulega a le Aoga Maualuga a le Ekalesia Katoliko i Amerika Samoa, le aoga a Faasao Marist e faamalolo le ali’i faiaoga lea na faaoolima i se tamaitiiti aoga, ina ua faasalalau e se tasi o tamaitiiti o le vaega se ata sa pu’e i se telefoni feavea’i, o loo manino ai le faaoolima o le ali’i faiaoga i le tamaitiiti aoga na aafia. 

 

O se pepa o faamatalaga na tuuina mai e le Pulega a le Aoga a le Ekalesia i le taeao o le aso Gafua na te’a nei, na faamaonia mai ai le faaiuga ua faia e faamalolo ai le ali’i faiaoga o loo aafia i lenei mataupu. O lea pepa o faamatalaga na tuuina mai e le Pulega a le aoga ina ua mae’a ona fesiligia e le Samoa News i so latou finagalo e tusa ai o lenei mataupu. 

 

E le o manino i le taimi nei le taimi tonu ma le aso na tula’i mai ai lenei mataupu, ae pau le itu ua manino, o le faaiuga o le vaiaso na te’a nei na salalau solo ai i luga o fesootaiga faaonaponei (Facebook) le ata video o le ali’i faiaoga o loo faaoolima i le tamaitiiti aoga. 

 

Na aofia ai ma le Samoa News i le lisi o i latou na faasoa atu i ai e sui o le aiga o le tamaitiiti na aafia se kopi o se tusi mai le aiga, e talosagaina ai ta’ita’i o aoga a le malo ma le Ekalesia, ina ia silasila toto’a i le mataupu na faia i ai se faaiuga. O i latou na tufa i ai kopi o le tusi mai le aiga o le tamaitiiti na aafia e aofia ai le Faatonusili o Aoga a le malo, susuga Dr. Asaeli Samasoni; o le afioga i le Tamaitai Faipule i le Laumua i Uosigitone ia Aumua Amata; o le Ofisa o le Loia Sili a le malo; o le Komiti Faafoe e Pulea Aoga a le Ekalesia Katoliko faapea ai ma le Samoa News.

 

Na faamaonia mai e se sui o le aiga o le tamaitiiti aoga na afia i le Samoa News, le mae’a lea ona tuu aloaia atu o se latou tagi i le Ofisa o Leoleo ina ia suesueina le mataupu ma faila ni moliaga fa’asaga i le ali’i faiaoga. Na taua e le sui o le aiga sa latou fesootaiga ma Leoleo mai le Ofisa o Leoleo i Leone e uiga i lenei mataupu, ma fautuaina ai loa i latou e le Ofisa o Leoleo ina ia tuuina atu se faamatalaga tusitusia a le tamaitiiti na aafia e tusa ai o le faalavelave na tula’i mai, ina ia fesoasoani i le amataina o le latou suesuega.

 

“Ua mae’a ona tau aao atu i le Ofisa o Leoleo le faamatalaga tusitusia a lo’u tuagane na aafia, o lo o faatali le matou aiga i se isi fesootaiga mai le Ofisa o Leoleo e tusa ai o le isi laasaga o lenei mataupu,” o se faamatalaga lea mai le tuafafine o le ali’i na aafia i lenei mataupu, i se fetusiaiga ma le Samoa News i luga o le imeli i le vaiaso nei.

 

O le vaiaso na te’a nei na tuua ai e le tamaitiiti aoga na aafia le atunu’u ma ua faatasi atu nei o ia i lona aiga i Amerika. O lea tulaga na faamaonia mai e lona aiga i se tusi na tuuina atu i le Faatonusili o Aoga a le malo, o le Pulega a le Aoga a Faasao Marisi, e pei ona talosagaina ai se latou feiloaiga e soalaupule ai lenei mataupu. Ua faamoemoe le aiga e faatasi atu i lea fonotaga i luga o fesootaiga faaonaponei sui o le aiga faatasi ai ma le latou Loia ua fuafua e tula’i mo le aiga. O le kopi o lea tusi mai le aiga na mafai ona latou tuuina mai i le Samoa News.

 

Na taua e le aiga i le tusi sa tuuina atu i le Ofisa o Aoga a le malo ma le Pulega o Aoga a le Ekalesia Katoliko le leai o so latou silafia e faatatau i lenei mataupu, sei vagana ai lava le taimi na taunuu atu ai le ali’i na aafia i le vaiaso na te’a nei na latou mafuta i Amerika, o iina lea na faatoa alia’e ai loa faamatalaga e uiga i lenei mataupu. O le taimi tonu fo’i lava fo’i lea na faatoa faalauiloa ai e le tamaitiiti aoga na pu’e ina le ata le video i luga o le Facebook.

 

I se pepa o faamatalaga na tuuina mai i le Pulega o le Aoga, na faamaonia mai ai le faaiuga ua faia e faamalolo ai le ali’i faiaoga na aafia i lenei mataupu. O le pepa o faamatalaga o loo saini ai Bishop Peter Brown, Faatonusili o Aoga a le Ekalesia ia Jeanette Alvarez, ma le Pulega Aoga fou a Faasao Marist ia Dr. Lina Scanlan.

 

“O se ata video na faalauiloa i luga o le Facebook, o loo faailoa mai ai se faiaoga mai le aoga a Faasao Marisi o loo ia faaoolima i se tamaitiiti aoga. O Faiga Favae ma tulafono tumau o aoga a le Ekalesia Katoliko, e matua faasaina ai le faia o nei ituaiga gaioiga e soo se tagata faigaluega faasaga i fanau aoga, ma e i ai fo’i faaiuga e mulimuli mai ai i tua poo se tasi e faia nei ituaiga e aofia ai ma le faate’a mai le galuega. Talu ai nei Tulafono ma Faiga Faavae, o le ali’i faiaoga lea na aafia i lenei mataupu, ua faamalolo nei o ia mai lana galuega,” o se vaega lea o le pepa o faamatalaga.

 

Na taua e le Pulega o Aoga a le Ekalesia le mae’a lea ona faia o ni fesootaiga i le va o le aiga o le tamaitiiti na aafia ma le Pulega a le Aoga, ma ua mae’a fo’i ona faatoese aloaia atu i ai le Pulega o Aoga a le  Ekalesia e tusa ai o le faalavelave e pei ona tula’i mai. Na faamaonia mai fo’i e le Pulega o Aoga a le Ekalesia le mae’a lea ona talosagaina e le aiga o le tamaitiiti na aafia o se avanoa e feiloa’i ai ma le Faatonusili o Aoga a le malo e talanoa ma soalaupule ai lenei mataupu. 

 

Na tuuina mai fo’i e le tuafafine o le alii na aafia se faamatalaga faalaua’itele e faatatau i lenei mataupu. Na taua e le tuafafine o le ali’i na aafia e faapea, o lona tuagane na aafia i lenei mataupu, o le ui’i lea o le fana e to’alima (5).

 

“O se taimi faigata lenei i lo matou aoga ona o le mataupu e pei ona aafia ai lo’u tuagane. O se tulaga matuia tele sa matou maitauina i luga o le video sa faasalalau solo i luga o le Facebook, o loo faailoa mai ai le ali’i faiaoga i le taimi na faaoolima ai i lo’u tuagane ao matamata i ai tamaiti o le vasega.”

 

Na taua e le aiga e faapea, e tusa ai ma faamatalaga mai tamaiti o le vasega, e le o se taimi muamua lenei ua faia ai e lenei ali’i faiaoga ituaiga gaioiga iea i totonu o le vasega. Na muamua ona ia fasia le isi tamaitiiti aoga ao lumana’i ai le faalavelave e pei ona vavao ai nei itu e 2.

 

“Na faaoolima le alii faiaoga i lo’u tuagane i luma o tamaiti aoga o le vasega, o se gaioiga e le tatau ona tuup. O tala mai isi tamai aoga o loo taua ai le faatele ona faia e lenei ali’i faiaoga o gaioiga nei faasaga i tamaiti aoga o le vasega.”

 

“O le itu e mata’utia ai i le faalogo, ua maua tala ua folafola e le Aoga le faate’a o le tamaitiiti aoga na puea le ata video ma faasalalau i luga o le Facebook. Ana leai le Facebook e le silafia e le Pulega o le aoga le ata video. E tatau i le Pule Aoga ona silafia lenei uiga ma amioga a Faiaoga. Ua tuuina atu atoatoa e matua le latou faatuatuaga ma le talitonuga i faiaoga mo le a’oa’oina o a latou fanau, ae le o le faia i ai o uiga masoa faapenei.”

 

Na taua e le tuafafine o le ali’i na aafia lona manaoga ina ia avea lenei mataupu ma auala e nofouta ai matua uma i totonu o Amerika Samoa i tulaga o loo faatinoina e nisi o faiaoga faasaga ia latou alo ma fanau. O ituaiga amioga nei e pei ona taua e le tuafafine o le alii na aafia, e le taliaina i totonu o le potu aoga, e le tatau fo’i ona galue se tagata i le galuega faa faifaiaoga pe afai e aafia o ia i ituaiga amioga nei.

 

Na taua e le tuafafine o le alii na aafia le sauni atu o le latou aiga e faia tulaga uma ina ia mautinoa e uia ala o le tulafono, ma faila ai moliaga faasaga i le ali’i faiaoga o loo tu’uaia i lenei mataupu. 

 

“Matou te le o faia lenei gaioiga ina ia toe taui atu ai le mea leaga sa faia e le faiaoga, a o se auala ina ia mafai ai ona a’oa’oina se lesona ma momoli atu ai le feau i faiaoga uma lava, e le o se mea tatau le faaoolima i fanau aoga.”

 

E ui i le tele o ripoti e faatatau i faiga saua faasaga i fanau aoga, o se taimi muamua lenei ua maitauina ai e le Samoa News se mataupu faapenei i se ata video ua pue i se faiaoga o loo faaoolima i se tamaitiiti aoga.