Ads by Google Ads by Google

Faate’ia se alii faipisinisi ina ua taofia i le malae vaalele


[ata: foa'i]

Pago Pago - AMERIKA SAMOA

I le aso Lua o le vaiaso ua tuanai, sa sauni malaga atu ai se alii faipisinisi mo Samoa, ae peitai, sa fa’ate’ia o ia ina ua fa’ailoa atu iai e le ofisa vaalele, se fa’atonuga mai i le Ofisa a le Loia Sili, e faasa pe taofia ai o ia mai lona malaga ese atu mai i le teritori.

I se faatalanoaga a le sui o le Samoa News ma le faletua o lenei alii faipisinisi, sa fa’aalia ai e le faletua le fa’ate’ia tele o i la’ua uma ona o lenei faatonuga mai i le ofisa a le Loia Sili, ae e leai se fa’aaliga ua o’o atu ia i la’ua e uiga i lenei mataupu, po o se faamaninoga i le mafuaaga ua taofia ai lona toalua mai le faimalaga atu i Samoa.

O le masani o mataupu faapenei, e mafua ona taofia se tagata e le malo mai i le faimalaga ese atu mai i le teritori, ona o se a’afia i tulaga o le tulafono.

Ae peitai, na saunoa le faletua, ua faatonuina lona toalua e le ofisa vaalele, ina ia fa’afeso’ota’i le ofisa a le Loia Sili, mo se faatanaga e mafai ai ona malaga atu i Samoa, ona o lea ua iai se faatonuga e taofia ai o ia mai i le tu’ua o le teritori.

Na ta’ua foi e le faletua, sa o la o’o atu i le ofisa a le loia sili, ae na o le kopi o le faatonuga lea sa tu’uina atu ia te i la’ua.

Na fesiligia le faletua i le mafuaaga o le faigamalaga a lona toalua, ae na tali o ia, sa fuafua e malaga atu I se faalavelave faaleaiga, ona toe fo’i mai lea i le faaiuga o le vaiaso, ma ua mae’a ona totogi lona pasese e toe fo’i mai ai.

Ua sulufai atu nei lenei ulugalii i le la loia mo se fesoasoani, i lenei mataupu.

I se faatalanoaga a le Samoa News ma le taitai leoleo, le susuga ia Pouu’amea Tuaolo Supapo, ua mae’a ona faia sa latou suesuega ma ua fa’ao’oina uma atu faaiuga o a latou suesuega i le ofisa a le Loia Sili.

O lo o iai se talitonuga a le Samoa News, o le mataupu ua a’afia ai lenei faipisinisi, na afua mai i se fe’ese’esea’iga ma se leoleo i se fale kalapu i Tafuna ia Oketopa 27.  Na ta’ua foi e Supapo, o le leoleo o lo o a’afia i lenei mataupu, o lo o livi i le taimi nei, ma e le o mautinoa pe ua malaga i atunu’u i fafo.

Sa le mafai ona saunoa auiliili mai le susuga i le taitai leoleo e uiga i lenei faalavelave na fa’ata’otolia ai le leoleo i le falemai mo togafitiga, seia vagana le faamanino mai, e le o le leoleo o lo o molia i lenei mataupu.