Ads by Google Ads by Google

Faatonu e le Fa’amasinoga se ali’i e toe totogi meatotino na ia gaoia

ausage@samoanews.com

O se tasi o tuutuuga o le nofovaavaaia e 7 tausaga a le ali’i lea na ta’usala i lona gaoia lea o ni oloa mai se faleoloa, o le poloaina lea o ia e le Fa’amasinoga Maualuga e toe totogi le tau o oloa sa ia ave faagaoi e aunoa ma se fa’atanaga fa’aletulafono.

 

E 2 tagi eseese sa tu’uaia ai e le malo le ali’i o Aneti Valaau. I le tagi muamua, na tu’uaia ai o i ai i moliaga mamafa e lua o le gaoi ma le talepe fale i le tulaga lua. O ia moliaga na afua mai i le mataupu lea na tula’i mai i le aso 26 o Tesema o le 2018 i Pava’ia’i, ina ua talepe e le ua molia se fale o se aiga i le po ae gaoi le tele o meaaoga sa i ai i totonu ae fa’atau atu i se tasi o ali’i ave pasi.

 

I le tagi lona lua, sa tu’uaia ai e le malo Valaau i moliaga e 3, e aofia ai moliaga mamafa e 2 o le gaoi ma le talepe fale i le tulaga muamua, faapea ai ma le moliaga mama e tasi o le faaleaga meatotino i le tulaga tolu.

 

O ia moliaga na afua mai i le fa’alavelave lea na tula’i mai i le aso 12 o Ianuari o le 2019, ina ua osofa’i e le ua molia ma se isi ali’i talavou se faleoloa e pulea e se tagata faipisinisi mai Asia i Ottoville, ae ave faagaoi le tele o oloa ma se tinoitupe e $316 sa i totonu o se tama’i pusa u’amea sa i lalo o le fata o lo o i ai le masini talitupea le faleoloa.

 

Ae i lalo o le maliliega ua sainia e Valaau ma le malo, lea fo’i ua talia e le fa’amasinoga maualuga, na tali ioe ai le ua molia i moliaga mamafa e 2 o le gaoi, ae solofua e le fa’amasinoga isi moliaga uma o lo o totoe ai i le tagi sa fa’aulu e le malo fa’asaga ia e ia.

 

I le tali ioe ai o Valaau i le moliaga muamua o le gaoi, sa ia ta’utino ai e fa’apea, i le aso 26 o Tesema o le 2018, na ia osofaia ai se fale o se aiga i Pava’ia’i e ala i lona oso i le fa’amalama ma alu atu ai i totonu o le fale ma le fa’amoemoe e fa’ataunu’u ai se solitulafono.

 

A o i ai i totonu o le fale, sa ia gaoia ai ni lavalava, o pea seevae, faapea ai taulima iila mai totonu o le potu o le fale. Sa ia gaoia fo’i se telefoni feavea’i; o ni oloa e alu i le eletise; o se laptop ma ni DVD sa i luga o le laulau. Na ta’utino atili Valaau e fa’apea, o mea totino sa ia gaoia mai le fale o le aiga na a’afia, na ia fa’atauina atu i se tasi o ali’i ua toe malaga atu nei i Samoa.

 

I le tali ioe ai o le ua molia i le moliaga lona lua o le gaoi, sa ia ta’utino ai e fa’apea, i le po o le aso 12 o Ianuari o le tausaga na te’a nei, na ia osofaia ai se faleoloa e pulea e se tagata Asia i Petesa ma le fa’amoemoe e gaoi mai ai ni meaai i totonu, faatasi ai ma le fesoasoani a se ali’i talavou sa la to’alua i lea po.

 

Na ta’utino Valaau e faapea, sa ia talepe le faamalama i le pito i tua o le faleoloa, ma maua ai loa le avanoa e ulufale atu ai i totonu ma ia gaoia le tele o taumafa e pei o mea’ai tuuapa ma se mata’i fagu sa i ai se tinoitupe e tusa ma le $219.

 

E pei ona taua i tuutuuga o le maliliega a le malo ma le ua molia e fa’apea, e silia i le 3 masina o tau saili e Leoleo le tagata na ia osofaia le fale o le aiga na aafia faapea ai ma le faleoloa.

 

I le mataupu e fa’atatau i le fale o le aiga, na taua ai e le malo e fa’apea, sa tu’ufua le fale o le aiga na a’afia i le taimi na osofa’i ai e le ua molia, ona sa malaga le ulugali’i i Amerika ma a laua talavai.

 

O le po timuga o le aso Sa na osofa’i ai e le ua molia le fale, ae taunu’u mai le ulugali’i i le atunu’u i le po o le aso Tofi o le vaiaso lava lea, ma la maitauina ai loa le fa’amalama o le potu pito i tua ua matala, atoa ai ma le gasu solo totonu o le fale. Na logo e le ulugali’i Leoleo ma se fesoasoani, ma amata ai loa suesuega a Leoleo.

 

O le vaiaso lava lea ao fa’agasolo suesuega a Leoleo, ae latou mauaina fo’i se ripoti mai le pule o se Faleoloa Asia i totonu lava o Petesa, e fa’atatau i lana faleoloa na talepe e se tagata i le po o le aso Faraile o le vaiaso lava lea na amata ai a latou suesuega i le fale o le aiga na a’afia.

 

O ni molimau se to’alua na fesiligia e Leoleo, sa laua taua ai lo la vaaia o Valaau o savali mai i le pito i tua o le fale o le aiga na a’afia ma se ato lanu meamata tele lava. Mulimuli ane manino i suesuega a Leoleo, o Valaau lava le tagata lea ua to’atele molimau ua latou taua lona igoa.

 

Ina ua fesiligia e Leoleo ia Valaau, sa ia ta’utino ai, e sa’o o ia na osofaia le fale o le aiga na aafia faapea ai ma le faleoloa. Na taua e Valaau e fa’apea, o mea totino uma na ia gaoia mai le fale o le aiga na a’afia, sa ia foa’i ma lana uo ua toe malaga atu nei i Samoa, ae o oloa uma na ia gaoia mai le faleoloa Asia, sa ia tufatufa atu i isi ana uo.

 

Mulimuli ane i suesuegaa Leoleo na latou maua ai, o le tele o meatotino sa gaoia na fa’atau solo e le ua molia i nisi o tagata e masani ai ae aumai tupe e fa’atau ai pusa pia mo ia ma ana uo.

 

O le vaiaso na te’a nei na tula’i ai Valaau i luma o le fa’amasinoga mo le lauina o lana fa’asalaga. Ina ua maua le avanoa e fa’atoese ai, sa ia talosaga ai i le fa’amasinoga mo se avanoa e toe fo’i atu ai i tua e tausi ona matua faapea le tau sailiina o sana galuega e maua ai se tupe e totogi ai lana sala mai le fa’amasinoga.

 

Na ta’utino le ua molia e fa’apea, ua avea le malosi o faaosoosoga a le fili atoa ai ma lona fia maua o se tupe e inu ai ma ana uo ma auala ua ia soli ai le tulafono.

 

“Ou te ta’utino atu i lau afioga i le Fa’amasino Sili, ou te le toe solia se tulafono a le malo, ae o le a fa’aaoga aso o lo o totoe o lo’u ola ou te tautua ai mo lo’u aiga aemaise lo’u nu’u ma le ekalesia,” o le ta’utinoga lea a Valaau.

 

Na finau lana loia fautua ina ia tu’u se avanoa mo le ua molia, ia ia toe aoaoina ai lona olaga mai le mea sese sa ia faia. Na taua e le ali’i loia fautua lagolago ia Rob McNeill e faapea, e ui i le matuia o le gaoiga sa faia e Valaau, ae ua ia lagona lona salamo moni.

 

Na lagolagoina fo’i e le loia a le malo ia Laura Garvey le talosaga ina ia faanofovaavaaia le ua molia, atoa ai ma le fa’atonuina o ia e toe totogi le tau o oloa uma sa ia gaoia.

 

O nisi o tuutuuga o le nofovaavaaia a le ua molia e 7 tausaga, o lona tuliina lea o masina e 28 i le toese i Tafuna. O le a fa’aaoga le 12 masina lea sa taofia ai o ia i le toese e fai ma ana faasalaga i lenei mataupu, ae o le 16 masina o lo o totoe o lana fa’asalaga faa falepuipui e 28 masina, o le a faamalumalu e le fa’amasinoga lona tuliina i le taimi nei, se’i vagana ua toe tuuina mai se isi poloaiga a le fa’amasinoga.

 

Ua fa’asa le ua molia ona ia toe fesoota’i atu i ana uo sa masani ona latou inupia, fa’asa ona ia toe tagofia le ‘ava malosi poo fualaau fa’asaina, a ia avea o ia ma tagatanu’u e tausisi i tulafono a le malo.

 

Ua faatonuina le ua molia e totogi le salatupe e $1,000, faapea ai ma le totogi o taui o mea sa ia gaoia i le aofaiga e $1,521.

 

I le tausaga e 2017, na ta’usala ai e le Fa’amasinoga Faaitumalo ia Valaau i le moliaga  mama o le gaoi, i lalo o se maliliega sa latou sainia ma le malo. E pei ona taua e le malo i le latou tagi e fa’apea, na osofa’i e Valaau se taxi sa paka i luma o se faleoloa i Fagaima, a o alu le ave ta’avale i totonu e fai lana fa’atau.

 

Na gaoia e le ua molia le $74 sa i totonu o le ta’avale.