Pago Pago - AMERIKA SAMOA

Ae e le’i malolo le fono faitulafono o i le vaiaso ua tuanai, mo le fa vaiaso, sa pasia e le Maota o le Senate ia se I’ugafono e tu’uina atu ai le faatagana i le Komiti Su’esu’e Filifilia a le Senate (SSIC), e faia ai se iloiloga i le $4.5 miliona a le LBJ lea faapea na ave sese i se faletupe i atunu’u i fafo.

Na faapea foi ona tu’uina atu le faatagana a le Senate i le SSIC e fa’avae ai ni puipuiga ina ia le toe tupu mai lenei fa’afitauli i le lumanai.

I se iloiloga na faia ia Setema 2023, na fesiligia ai e le Peresetene o le Senate, le afioga i le Senatoa ia Tuaolo Manaia Fruean, ia le Tausitupe a le malo, ia Malemo Tausaga, i le a’afiaga a lo latou ofisa i le taumafaiga fa’asese lea na mafua ai ona aveina atu se vaegatupe e $4.5 miliona mai i le LBJ, ma teuina i se tusi tupe i Florida.

Sa fa’amatalaina e Malemo, le mauaina e lo latou ofisa se tusi mai i le LBJ, na fa’atonuina ai le aveina o lenei vaegatupe ma teu i se tusi tupe i le faletupe a le Wells Fargo, lea na o latou usitaia vave.  Na ia fa’amaonia foi, o lenei tusi mai i le LBJ sa tusia i luga o pepa o lo’o iai le fa’ailo a le LBJ ma sa sainia e totino uma o le komiti faafoe a le LBJ.

Ae peitai, sa toe maua e le Tausitupe, i se taimi mulimuli ane, le le moni o lenei tusi ma e le’i sau mai i le LBJ, e o’o lava foi i suafa na sainia ai, e pepelo le sainiga.  Sa fa’ailoa atu e Malemo i le Senate i lena iloiloga, o lo’o iai pea lea vaegatupe i le puleaga a le Iunaite Setete, ma o lo’o su’esu’eina e le FBI lea mataupu.  

Ma na fa’aalia ai foi e Malemo i lena vaitaimi, le lata i le $300,000 lea ua mafai ona toe maua mai.

 O lo’o ua ta’ua i totonu o le I’ugafono lenei ua pasia e le Senate e faapea, ua silia ma le tausaga talu ona fa’ailoa mai e Malemo lea tulaga i le Senate, ma e o’o mai i le taimi nei, e le i toe iai seisi fa’aaliga lata mai, e tusa ai ma lenei mataupu.

O lea ua atugalu ai le maota maualuga, o le a le toe maua mai nei vaegatupe feterale, pe afai ae le tulitulia.

O lo’o ta’ua foi i le I’ugafono le tatau ona fa’ao’oina mai e le Tausitupe i Senatoa le tulaga ua o’o iai lenei mataupu, po o le a se faamatalaga po o se tusitusiga foi, ua maua mai i le FBI e tusa ai ma le latou su’esu’ega sa faia.

O lo’o ta’ua foi i totonu o le I’ugafono nisi o iloiloga sa faia i taimi ua tuanai, sa fa’ailoa atu ai e le pulega a le LBJ i afioga i Senatoa, ua mae’a ona toe fa’afo’i atu le tupe atoa a le LBJ.  O lo’o mana’omia e le Senate se fa’amaoniga o lea tulaga, mai i le LBJ ma le Ofisa o Tupe a le malo.

I se iloiloga a le Senate sa faia ia Ianuari o le tausaga nei, na molimau ai Malemo le sui Faatonusili o le TBAS, o Owen Peery ma sa ta’ua ai e Malemo, le toe maua mai o le $957,192 ia Aukuso 25 o le tausaga ua tuanai, ae na toe maua mai le $3.4 miliona ia Tesema 12, 2023.

Ma sa ia fa’ao’oina atu se kopi o se siaki e $3.4 mai i le faletupe a le Wells Fargo e faamaonia ai lea tulaga.

Na fesiligia e le Taitaifono o le Komiti o Paketi ma Tupe Faasoasoa a le Senate, le afioga i le Senatoa ia Utu Sila Poasa, ia Malemo, pe aisea ua taofiofi ai e le faletupe ia le $100,210.  Ae sa tali Malemo, e tusa ai ma se faamatalaga mai i le FBI, o le $100,210 o lo’o misi mai i le $4.5 miliona.

Sa molimau Malemo, na iai le $4.5 miliona ina ua amata le suesuega a le FBI, ma sa tatau ona toe fa’afo’i mai le aofaiga atoa.

O lo’o ua ta’ua foi i totonu o le I’ugafono se mana’oga a le Senate e fia iloa, po o iai se fuafuaga a le Ofisa o Tupe, e fa’amaonia ai le moni o talosaga mai i faletupe i fafo, ae e le’i vaea atu ai nisi o vaegatupe.  Ma po o le fea le vaega a le Ofisa o Tupe e mataituina lea tulaga.  Ae le gata i lea, o lo’o fia malamalama le Senate po o ai i le LBJ e fegalegalea’i ma le Ofisa o Tupe e tusa ai ma tupe a le LBJ.

Ma o lo’o aofia foi i totonu o le I’ugafono ni fesili, e pei o le fia malamalama po o ai faletupe i atunu’u i fafo, o faia fegalegalea’iga ma le Ofisa o Tupe e tusa ai ma tupe a le malo, ma po o ai foi i le Ofisa o Tupe, o lo’o mataituina lea tulaga.

O lo’o fesiligia ai foi le matafaioi a le Ofisa o Tupe o lo’o faatinoina e fesoasoani ai i le su’esu’ega o lo’o faia a le FBI.

E le gata i lea o lo’o fia malamalama le Senate, po o ua su’esu’eina e le FBI ia le aufaigaluega a le Ofisa o Tupe a le malo, ma pe ua taua’aoina atu e le Ofisa o Tupe ia ni fa’amaumauga i le FBI e fesoasoani ai i le latou su’esu’ega.

O lo’o ua fesiligia ai foi po o ai i totonu o le FBI o lo’o gafa ma le su’esu’eina o lenei mataupu ma o lo’o finagalo afioga i Senatoa ina ia fa’ao’oina mai a latou fa’amaumauga mo feso’ota’iga.

O lo’o ua fesiligia ai foi le Ofisa o Tupe pe sa iai se taimi, i luma mai, pe talu ona tupu lenei faafitauli, na tupu ai seisi faafitauli faapenei.

Ma o lo’o fia malamalama foi le Senate pe ua fa’atulagaina e le vaega o le IT a le Ofisa o Tupe ia ni pa pupuni e puipui malu ai le Ofisa o Tupe, mai i nei ituaiga faafitauli.  Afai e leai, o lo’o fia malamalama le Senate, i le mafua’aga ua le faia ai.

O le aso Faraile o le vaiaso nei, Oketopa 11, 2024, ua fa’atulagaina ai e le Taitaifono a le SSIC, le afioga i le Senatoa ia Togiola T.A. Tulafono, ia sa latou iloiloga e soalaupuleina I lenei mataupu.

TALA’AGA

O le taimi mulimuli na tupu ai se tulaga faapenei, ua aveina atu ai se vaegatupe mai i le tusitupe a le malo, ma teuina i se faletupe i fafo, o Aukuso 2011, ina ua maua e le malo le faia o se tulaga fa’asolitulafono, e ala i le uaeaina o se vaegatupe e $1.2 miliona, mai i le tusi tupe a le malo, i se tusi tupe i le faletupe a le Vietnam International (VIB).  

Na tupu lea tulaga i le taimi a’o kovana ia Togiola, lea ua avea nei ma taitaifono a le SSIC.

Sa ripotia e le Samoa News ia Iulai 2012, le ta’ua e Togiola i lena vaitaimi o avea o ia ma kovana, o lenei ituaiga faatinoga faasolitulafono, o se ‘cyber-crime’ ma sa mafai ona galulue faatasi ia le malo ma le pulega o le faletupe a Hawaii ma le faletupe a VIB, ma taofi ai le tupe, a’o faia se su’esu’ega aufaatasi a le Interpol Vietnam ma le FBI.

Sa faapea foi ona ripotia ai e le Samoa News i le 2012,  le a’apa atu o le malo ia Oketopa 2011, i le afioga i le sui Faipule o Amerika Samoa i na vaitaimi, le afioga Faleomavaega Eni, mo sana fesoasoani ina ia mafai ona toe fa’afo’i mai le tupe a le malo.

I le 2014, sa ripotia ai e le Radio NZ le le’i maua o se faaiuga i le mataupu lea na ave fa’agaoia o vaegatupe feterale mai i le tusi tupe a le malo o Amerika Samoa ma teuina i le faletupe a le VIB.  Ae o le taimi lea ua kovana ia le afioga Lolo M. Moliga, ma sa tusi mai Faleomavaega ia Lolo, ma fa’ailoa mai iai le galulue faatasi o le Ofisa o Faamasinoga a Amerika ma le malo o Vietnam ina ia mafai ona toe fa’afo’i vave mai le tupe.

Ae peitai, e o’o mai i lenei vaitaimi, e le’i toe maua mai se faaiuga o lea mataupu, ma e le o iloa pe ua toe maua lea tupe mai i le faletupe a le VIB.