Sa ta'i lua moliaga na tu'ua'ia ai la'ua, e aofia ai le umia faasolitulafono o vaega o fualaau faasaina, o le Aisa ma le umia faasolitulafono o vaega o fualaau faasaina, o Mariuana.  O nei solitulafono, o ni solitulafono mamafa, e mafai ona lokaina ai i le va o le lima ma le sefulu tausaga, i le moliaga e tasi, po o se sala tupe e i le va o le $5,000 ma le $20,000; po o faasalaga uma e lua.

E tusa ai ma fa'amaumauga a le malo, o lo'o ta'ua ai le faatuina e leoleo o le taavale sa faafoeina e Marble i le 4:40 i le vaveao o le aso 21 o Me, i Malaeimi, ona o le saoasaoa o le alu o le taavale.  Ina ua faatuina e leoleo ia le taavale, na va'aia le togiina e le tagata sa nofo i le itu o le pasese, ia se mea i fafo o le faamalama o le taavale.  Ina ua pikiina mai e leoleo lea mea, sa iloa ai, o se paipa mata'eta'e, o loo iai se pauta pa'epa'e i totonu.

Na maua ai foi i le faatuina o le taavale, le leai o se laisene avetaavale a Marble, lea na faafoeina le taavale ma o lea, na fa'ailoa atu ai e leoleo ia Marble, o le a su'esu'eina atoa totonu o le taavale.

Sa maua ai e leoleo i le latou suesuega o totonu o le taavale, ia se afa sikaleti mariuana ma se ato, lea sa ta'ua e Marble, o lana ato.  I totonu o le ato, na maua ai se sikaleti ta'ai o iai ni laula'au lanumeamata i totonu faapea ma se paipa mata'eta'e o iai ni pauta pa'epa'e i totonu.

Na umia foi e le alii pasese (Ese) ia se ato, na iai i totonu se afa sikaleti ta'ai, na iai ni laula'au meamata i totonu.

Sa logoina e leoleo ia le vaega o le ofisa a leoleo, e gafa ma fualaau faasaina, mo le faataunuuina o suesuega i mea sa maua mai i totonu o le taavale a Marble.  Lea na faamaonia ai, o laula'au meamata na maua i totonu o ato a Ese ma Marble, o se vaega o fualaau faasaina, o le Mariuana.

Na faamatalaina e Marble i leoleo e faapea, o ia, e le ula Aisa, ae na o Mariuana ma o le paipa sa maua i lana ato, o se paipa a sana uo, o lo'o ia taofia.  Ma na ta'ua foi e Marble, lona va'aia o togi i fafo e Ese ia se paipa, ina ua faatuina le la taavale e leoleo.

Ae i le faamatalaga a Ese i leoleo, ona o lona fefe tele ina ua fa'atuina e leoleo le la taavale, sa ia togiina ai i fafo o le faamalama ia le paipa, ona e le o fia mana'o e lokaina o ia.  Sa ia faamaonia i leoleo, o le paipa lea na maua, o lana meatotino, faatasi ai ma le afa sikaleti ta'ai.

E ta'i $5,000 le vaegatupe sa faatulagaina e mafai ona tatalaina ai i la'ua ua molia, e faatalitali ai o la faamasinoga.