Pago Pago - AMERIKA SAMOA

O le sosaiete, Samoa mo Samoa Community of Alaska, lea sa fa’ato’a fa’atula’ia i le fa’aiuga o le vaiaso na te’a, Tesema 10. 2022 le latou ulua’i sailiga tupe, ua fa’ailoa mai nei fo’i, ua mae’a umia le latou Tusi Pasi 501[c] e mafai ai ona talosagaina e i latou ni a latou fa’atupega toina mai le tele o alagatupe e fa’atulaga mo Sosaiete eseese e agaga i galuega fa’atino e manuia ai nu’u ma afio’aga o alaala ai nisi e to’atele.

O le fa’alapotopotoga lea e ta’ita’ia lea e le susuga Ropeti “Rob” Tofaeono, o le sui ta’ita’i o Enele Lefano, Teutupe o May Levasa, ta’ita’i o polokalama fa’atautaia, Aganuu ma le Gagana Samoa, Safotulafai Roman Uelese  ma le tofa Tuisamanu Autiu Peter Mata’utia. Ua i ai fo’i lona sui faufautua fa’apitoa o le susuga lea Matauaina Moe Tali, lea ua faiilagi lana folauga, ma ua fa’amoemoe fo’i o le isi fonotaga lata mai a le Samoa mo Samoa i Alaska o le a toe fili fa’apitoa ai se sui faufautua e tua i ai le Fa’alapotopotoga i ana galuega fa’atino mo le mamalu lautele o tagata Samoa o alaala i Alaska.

O le Tusi Pasi 501[C] e toina mai lea e le IRS ma ua fa’amauina ma toe fa’alauiloa ai le Fa’alapotopotoga a Tagata Samoa mo Samoa i Alaska, ua agava’a e saili tupe ma fa’atino galuega lelei uma e aoga mo le soifuaga o tagata Samoa o alaala i Alaska, ma e mafai fo’i ona talosaga i ni tupe toina mai nisi o vaega o le Malo Tele e agaga i nei ituaiga o galuega fa’atino mo le leleiga o tagata lautele Samoa o lo’o ua i soo se vaipanoa o le Setete o Alaska.

O se tala fiafia mai se sui iloga o lea Komiti sa ia fa’ailoa ai, “Mai le ulua’i taumafaiga e saili tupe a le Samoa mo Samoa i Alaska ua mautu mai ai le vaega tupe e $10,000.+ ma ua fa’afiafiaina fo’i le fa’alapotopotoga ona o le a’ao foa’i ma le agaga fa’amaopoopo ae maise le agaga Samoa moni o le tausi aiga aua ua iloga le to’atele sa masii mai isi vaipanoa o Alaska ina ia sapaia nai o latou aiga i lenei Tauvaga Tausala mo Aiga uma o le Fa’alapotopotoga. Fa’afetai tele lava le alofa!”

O nisi o sui iloga sa auai e aofia ai le susuga le Faife’au Toeaina Niutunu Faiupu ma le mamalu o le Ekalesia i Anchorage, le susuga le tamaitai pese lauiloa i le tatou atunuu Miriama Tavita Samuelu ma le tamaitai Tausala Lalelei Filifilia a Samoa i Alaska, Ms Titilupe Manuma Sappa Matautia.

O lo ua fa’ailoa mai o le vaega tupe na aoina mai lenei fa’amoemoe, o le a fa’atino ai nisi o tapenaga o galuega fa’atino e fa’amalosia ai le agaga o tagata Samoa ina ia fa’atumauina le silafia lelei ona tautatala ma tusitusi Fanau Samoa i Alaska i le Gagana Samoa, ma toe fa’atino ai fo’i nisi tapenaga o fa’atupega e moomia lava mo le atina’e atili pea o nisi tautua mo tagata lautele o Samoa o loo alaala i Alaska.