Ads by Google Ads by Google

Fa’atulaga e Sunia le $100k e tatala ai i tua Steven Tuatoo

ausage@samoanews.com

E $100,000 le tinoitupe lea ua fa’atulaga e le afioga i le ali’i fa’amasino ia Fiti Sunia e totogi, ona fa’atoa mafai lea ona tatala le susuga a Steven Tuatoo i tua mai le toese i Tafuna, e fa’atalitali ai taualumaga o lana mataupu lea ua tofu atu i luma o le Fa’amasinoga Maualuga.

 

E ui i le malosi o le tete’e mai le loia a le malo ia Woodrow Pengelly i le vaiaso na te’a nei ina ua fa’aleo e le loia a Tuatoo ia Ryan Anderson le talosaga, ina ia fa’atulaga se tupe e tatala ai i tua le ua molia, peita’i na faia lava e le afioga i le ali’i fa’amasino le fa’aiuga, fa’avae lea i mau sa tuuina atu e itu e lua o lenei mataupu.

 

O le aso Faraile na te’a nei na fa’atulaga e faia ai le ulua’i iloiloga o le mataupu a Tuatoo i luma o le Fa’amasinoga Fa’aitumalo. Ina ua valaau le mataupu, na muamua fa’aleo e le loia a Tuatoo ia Anderson le talosaga ina ia fa’atulaga se tupe e tatala ai i tua le ua molia.

 

E leai se tupe na fa’atulaga e le fa’amasinoga e tatala ai i tua Tuatoo, ina ua tula’i i luma o le fa’amasinoga fa’aitumalo mo le ulua’i taimi i le masina na tea nei.

 

Na taua e Anderson i le fa’amasinoga e fa’apea, talu ai o lea ua mae’a ona fa’atulaga e le fa’amasinoga tupe e totogi ona mafai ai lea ona tatala isi ali’i e to’alua o loo tu’uaia fa’atasi ma Tuatoo i lenei mataupu, e alaga tatau ai i le fa’amasinoga ona faia fo’i le tulaga lava lea e tasi ia Tuatoo.

 

Na faailoa e le loia a Tuatoo e fa’apea, e ui o lea na toe fa’afo’i mai Tuatoo mai Uosigitone i Amerika e tali i ona moliaga, peita’i e foliga mai i lana fa’alogologo atu i le la talanoaga ma Tuatoo, sa i ai se tulaga le femalamalamaa’i i le va o Tuatoo ma le itu a le malo i le taimi na faila ai e le malo le latou tagi fa’asaga ia Tuatoo i le masina o Novema o le tausaga a te’a nei.

 

Na faailoa e Anderson i le fa’amasinoga e fa’apea, afai ae talia le talosaga e faatulaga ai se tupe e tatala ai i tua le ua molia, o le a la galulue fa’atasi ina ia mautinoa e auai o ia i soo se taimi e valaau ai lana mataupu.

 

Na matua tete’e lava le loia a le malo i le talosaga a Tuatoo ma lana loia. Na taua e Pengelly i le fa’amasinoga e fa’apea, talu ai na sola i fafo ia Tuatoo i le taimi na sauni ai le malo e faila moliaga fa’asaga ia te ia, e manatu ai le malo, afai ae toe tatala i tua o ia, e tele le avanoa e toe sola ese ai o ia ma le atunu’u.

 

Na taua atili e Pengelly e fa’apea, e i ai mafua’aga e ala ai ona manatu le malo e le tatau ona fa’atulaga e le fa’amasinoga se tupe e tatala ai Tuatoo i tua. O se tasi o mafua’aga, o lea na toe fa’afo’i mai o ia mai Uosigitone i lalo o se talosaga a le Kovana o Amerika Samoa, i le mae’a ai lea ona loka o ia e Leoleo i Uosigitone ma molia i lona faaoolima fa’alua i lona to’alua.

 

Na faailoa e le malo i le fa’amasinoga moliaga mamafa o loo tu’uaia ai Tuatoo, lea e aofia ai le umia faasolitulafono o fualaau fa’asaina o le aisa ma le mariuana, umia faasolitulafono o se a’upega fa’asaina, atoa ai ma le sola ese ma le atunu’u ina ia le mafai ai ona molia o ia.

 

Na toe faamanatu e Pengelly i le fa’amasinoga e faapea, o le masina na te’a nei na aumai faamalosi ai Tuatoo i lalo o se tusi saisai sa talosagaina e le kovana, ina ia tali i moliaga fa’asaga ia te ia i Amerika Samoa nei.

 

Na fesili Sunia i lona fia malamalama atili lea i le mataupu e pei ona molia ai Tuatoo i le aai o Uosigitone.

 

Na faailoa i ai e Pengelly e faapea, e fa’alua ona loka e Leoleo ia Tuatoo ao i ai i Uosigitone, ona o tu’uaiga i lona faaoolima lea i lona to’alua. Na faamaonia lea moliaga ma faasala ai o ia i le umi lea na loka ai o ia i le falepuipui.

 

O le mae’a ai ona fa’afofoga o le fa’amasinoga i fa’afinauga a loia mai itu e lua, na talia ai loa e Sunia le talosaga a le itu tete’e, ma ia fa’atulaga ai loa le tupe e $100,000 e totogi ona fa’atoa mafai lea ona tatala Tuatoo i tua.

 

O Tuatoo, o se ali’i sa avea ma Leoleo a le malo o Amerika Samoa, o ia lea e to’atolu i ai latou na pu’e faapagota ma molia e le malo, e mafua mai i se osofaiga sa faia e Leoleo i le aso 9 Novema 2017, lea na sailia ai se fale i Taputimu, o le fale o Tuatoo i Alofau, ma se ali’i ave tasi sa pue faapagota i luga o le alatele.

 

O le mae’a’ ai o itula e 48 na loka ai Tuatoo, na tatala ai loa o ia e leoleo o le falepuipui ina ua mae’a le taimi fa’atulaga e tatau ona loka ai o ia, ae o le taimi lea e lei faila e le malo le latou tagi fa’asaga ia te ia.

 

O le taimi lava na tatala ai Tuatoo i tua, na ia tuua ai loa le atunu’u, ma ui atu i Samoa, mulimuli ane taunuu o ia i Amerika.

 

O le masina o Aperila o le tausaga nei na loka ai o ia e Leoleo i le setete o Uosigitone i Amerika ona o le faalavelave na ia faaoolima ai i lona to’alua, ma mafua ai loa ona toe fa’afo’i mai o ia i le masina na te’a nei e tali i ona moliaga.