Pago Pago - AMERIKA SAMOA

O le iloiloga a le Komiti o le Soifua Maloloina a le Maota o Sui i le vaiaso na te’a nei i le Aso Lua, na amata ai i le talanoaina o tulaga o tausi soifua mai Fiti na faafaigaluega i le masina o Novema na te’a nei, lea na iloa ai e faipule mai le to’a 21 o tausi soifua na aumai, e na o le to’a 2 mai le to’a 5 tausimai na su’e i le su’ega National Council Licensure Examination (NCLEX) mo tausimai na pasia, ae o le isi 16 o loʻo totoe o loʻo sauni e suʻe le suʻega. Na ta‘ua fo‘i o le to‘a 3 e le‘i pasi o le a maua le avanoa e toe su‘e ai le su‘ega.

Peitai, i le taimi o le iloiloga, na saunoa ai le tamaitai o Lele Ah Mu Mageo, o ia lea o loo faauluulu i ai le polokalama aoaoga - Nursing Program - i le Kolisi Tuufaatasi o Amerika Samoa (ASCC), e le tatau ona toe vaai le falema’i i le tapenaina o tamaitai tausimai e lei pasi e toe nofoia le NCLEX ma fautuaina ai le taumafai e taulai atu i le sailia o tagata faigaluega mai tamaiti aoga i le lotoifale. 

O molimau sa auai i le iloiloga a le Maota o sui, e aofia ai le taitaifono o le Komiti Fa’afoe a le LBJ, Dr. Malomaua Tuiolosega, o le Pulesili o le LBJ Dr. Akapusi Ledua, ma sui sinia mai le Matagaluega o le Soifua Maloloina.

I le iloiloga, sa fa’alauiloa ai foi e le LBJ lana poloketi o le “Project Pasefika” atoa ai ma fuafuaga mo le fa’aleleia o le falema’i o le LB i le taimi nei.

Faaalia e le Samoa News, o lenei fuafuaga ua faaigoaina o le Project Pasefika, o se fuafuaga a le Komiti Faafoe o le LBJ e galulue faatasi ai ma faalapotopotoga tau aoaoga faaitulagi ma le lotoifale, e aofia ai ma le ASCC, ina ia tuuina atu ma faatuina polokalame ma aoaoga atoatoa, ma ia tuu ai foi tupe i aoaoga ma aoaoga o tagata faigaluega o loʻo iai nei ma faʻatupu avanoa fou mo tagata o loʻo nonofo i le lotoifale e ulufale ai i matata faʻalesoifua maloloina.

O le faamoemoe foi lea e foia ai le faaletonu o le aufaigaluega tausi soifua i le LBJ, e ala i le faafaigofieina o avanoa mo aoaoga maualuluga ma le faafaigofieina o le tapenaga o le suega o le NCLEX.

“O le Project. Pasefika o se poloketi na fa’alauiloa e le Komiti Fa’afoe a le LBJ, ma o le masina o Fepuari o le tausaga nei, e $300 miliona na fa’amatu’u mai e le ARPA [American Rescue Plan Act], ma e $100 miliona o lo’o fa’aagaaga mo le galuega fou a le falema’i. Ona fesootai lea o le komiti faafoe ma le Ofisa o le Kovana, i se taumafaiga ina ia faaaoga lenei $100 miliona mo le falemai [LBJ],” o le saunoaga lea a Dr. Tuiolosega i luma o le komiti a le Maota o Sui.

“O lo’o fa’apea lava le fa’amoemoe, o lo’o fa’aleleia ma atina’e le falema’i i totonu o le atunu’u. E lima vaega o le Poloketi Pasefika, o lo’o fa’amae’a le vaega muamua, ae o lea ua aga’i atu i le vaega lona lua,” o lana saunoaga lea, a’o le’i tu’uina atu le avanoa i le Pulesili o le LBJ, Dr. Ledua e fa’amalamalama atili ai le Project Pasefika.

O le isi galuega tele ua fuafua le Komiti Fa’afoe o le LBJ e ave i ai le fa’amuamua, o le fausia lea o se nofoaga fou mo a’oa’oga, ina ia fa’aauau pea a’oa’oga mo le atina’eina o tagata faigaluega, e mafai ai ona latou maua tusipasi, ma fa’aleleia atili ai le a’oa’oina o le tausiga o gasegase ma taunuuga.

“O se poloketi ua uma ona matou fuafuaina ma i le 3 vaiaso talu ai, sa faia ai le matou fonotaga ma se iunivesite i Hawaii e fausia ai se faiga faapaaga e aoaoina ai a matou tausi soifua, ina ia foia ai le faaletonu o tausi soifua o loo feagai nei ma le teritori,” o se tala lea a Dr. Ledua.

“Ua matou taumafai e fai se fofo vave e foia ai le faafitauli o le tausi soifua, a o matou faatali mo le atinaeina o le polokalame tausi soifua i le ASCC, ae ua matou lagona o le le lava o tausi soifua i le taimi nei, ua tatau ai ona saili vave se fofo e le mafai ona faatali mo le lua tausaga e foia ai lenei faafitauli, ma o lea ua matou faia ai lenei faiga faapaaga ma ua i ai i le vaega mulimuli o le sainia o se feagaiga o le maliega ma le Iunivesite o Chaminade i Hawaii, e maua ai le aoaoina ma le faaleleia o tomai ma tusipasi a matou tausimai, ma ia fesoasoani foi i le mauaina o nisi tausimai ina ia tatou le toe oo i se faaletonu o tausi soifua.”

Na faamalamalama atili e Dr. Ledua nisi fuafuaga e foia ai le faaletonu o tausi soifua o le a oo mai i ni nai masina.