Faia saofa’i alo o Amerika Samoa i Sapapali’i Savai’i, “Seiuli & Sala’a”
Le Aiga Potopoto i lea fo’i fuaiala o le Aiga Sa Malietoa, ua auai fa’atasi ma le fiafia e molimauina le fa’afotutupu a afioga i Usoali’i Seiuli ma Seiuli ma Sala’a i le fa’aiuga o le vaiaso ua te’a, Sapapali’i Savaii. [ata: foa’i]
Afioga i Usoali’i Seiuli Etenauga Leota Voigt ma Seiuli Elinor Lutu - McMoore ua pu’e le latou ata ma le afioga le Usoali’i Sala’a Tuanei Leota Voigt, lea e suia e si ona Tina, le susuga le Fa’atonu o Galuega a le Malo o Amerika Samoa, Faleosina Faiai Voigt, e tapaipu ai i le afio’aga o Sapapali’i Savaii i le fa’aiuga o le vaiaso na te’a. Ua fa’ailoa fo’i le finagalo malie atoatoa o le Pa’ia o le Aiga Sa Malietoa i lo latou auai uma e molimauina lo latou aso fa’amauina o tautua i le Aiga Potopoto ae maise o le afio’aga ma le itumalo o Fa’asaleleaga, Savaii. [ata: foai]
Pago Pago - AMERIKA SAMOA
O Ianuari 07, 2023 ua amatalia ai le tausaga fou e le tama’ita’i pule sili o le Ofisa o Va’ai Tau i Amerika Samoa, i le fa’amauina o lona suafa matai, mai le Aiga Sa Malietoa i Sapapali’i.
O le afioga le Usoali’i Elinor Lutu McMoore fa’atasi ma nisi o tamaitai o le latou Aiga, Etenauga Voigt ma Tuanei Voigt lea sa tapa ipu i suafa matai o le Seiuli ma le Sala’a mai le Aiga o nai lo latou tina matutua, o latou tupuaga mai le Aiga Sa Malietoa i Sapapali’i, Fa’asalele’aga, Savaii.
O afioga i Ma’opu, Seiuli Etenauga Voigt ma Sala’a Tuanei Voigt o alo ia e fa’asino i le afioga Leota Abraham Voight ma Faleosina Faiai Voigt, le fa’atonu sili o le Matagaluega o Galuega a le Malo o Amerika Samoa.
Ona sa le mafai ona auai mai Sala’a Tuanei Voigt e tapa ipu mo lona suafa i le pa’ia o aiga, ona sui tulaga ai lea o le susuga le fa’atonu o Galuega a le tatou malo mo lea sauniga mamalu ma ua fa’aatoa ai le to’atolu o i latou e tapa ipu i le fa’aiuga o le vaiaso na te’a.
O le afioga le Usoali’i, Seiuli Elinor McMoore o se alo e fa’asio i le afioga le Aloali’i Afoa Moega Lutu ma le faletua Etenauga Lam Yuen Lutu, lea e ona tua’a ua ai le gafa i le pa’ia o Aiga Sa Malietoa.
O lo’o tula’i mai o ia o le Pule o le Ofisa o Va’ai Tau a le NOAA i Amerika Samoa. O lo ua avea fo’i o ia o se totino malosi a le A.B.L.E lea ua tele fo’i so latou sao i ni mea fou o lo ua faaalia i totonu o le atunuu. Peita’i o ia fo’i o se tasi o totino iloga i le fa’atula’ia o le Fa’alapotopotoga e Taualoaina Galuega Tima’i mo le Gasegase o le Alzeihmers i le Teritori.
Ua fa’ailoa mai se lagona o aiga, “O le toe taumafaiga lea a le pa’ia o Aiga, ina ia aputiputi mai uma alo o aiga o e o nonofo mamao mai, o le latou aia tatau i suafa ma meatotino a aiga e le fa’aititia, ma ua tapena fo’i le matou aiga aua le lumana’i o lenei folauga.”
“O le fa’amauga lenei o lo latou tupuaga, ua fa’amautuina atili i lo latou sao i mea e fai a aiga e ala i latou monotaga ma saoga e fai i so’o se fa’alavelave lava o aiga e fai. O le tele fo’i o lima e mama ai se avega. I totonu o le Aiga fa’apea le afio’aga, e i ai lo latou leo e saunoa ai aua o lo’o faia monotaga.” O se saunoaga lea a Li’omatua Siaosi Sala’a, sui o le aiga Sa Malietoa i Sapapali’i.