Pago Pago - AMERIKA SAMOA

O le aso 8 o Me, na faauluina ai e loia a Setope Faalata se tagi e $1.5 miliona faatasi ma pili falemai, e faasaga i le Malo o Amerika Samoa, ona o moliaga faasaga i ni leoleo a le teritori, o lo o masalomia na faaoolima ia te ia.

Na ta’ua e le loia a Faalata, ua iai nei i le ofisa a le Loia Sili a Amerika Samoa ma le Loia Sili, le susuga ia Fainu’ulelei Falefatu Ala’ilima-Utu, ia le tagi a Faalata ma ua maea foi ona failaina i le faamasinoga maualuga.

O lenei tagi e faasaga i le malo o Amerika Samoa ma ni leoleo, ona o lo latou solia o aia tatau a le alii o Faalata, e pei ona sa ta’ua i le lomiga a le Samoa News i le Aso Lulu o le vaiaso ua tuanai.

O lo o ta’ua i le tagi le faia e le malo o Amerika Samoa se tulaga e ono lamatia ai le soifua o se tagata, e ala lea i gaioiga sa o latou faia faasaga ia Faalata.  

O lo o aofia i le tagi a Faalata le malolosi o sauaga a leoleo sa faia ia Faalata, o le molia sese o ia, o le lokaina o ia, faia o moliaga le moni e faasaga ia te ia, faapea ma le le amanaiaina o sana talosaga faafomai ao iai o ia i lalo o le vaavaaiga a leoleo.

Ua ta’ua i le tagi a Faalata le le amanaiaina e le Malo ma ana tagata faigaluega ia tulaga e ono lepetia ai le soifua o le ua tagi, e ala lea i le le aoaoina lelei, o le vaavaaiga ma le mataituina o tiute a leoleo sa aafia i lenei faalavelave.

E le gata i lea, e pei ona ta’ua i totonu o le tagi a Faalata, sa iai se mafutaga taua i le va o le malo ma Faalata, ona sa iai o ia i latou o le latou vaavaaiga ma la latou pule, i le taimi sa lokaina ai o ia ma feavea’i ai o ia I nofoaga eseese.  Ma o gaioiga a le Malo o Amerika Samoa faapea ana leoleo, na a’afia ai le soifua o Faalata, e aofia ai manu’a i lona tino, o mafatiaga faalemafaufau faapea tupe fa’aalu mo lana loia.

E tolu ni vaega eseese o le faalavelave na aofia i totonu o le tagi sa faapea ona faaooina atu i le Loia Sili;

• O le faaoolima ma ona vaega eseese, e $500,000
• Le amanaia o se talosaga faafomai ma ona vaega eseese, e $500,000
• Tuuaiga o taumafaiga e nana mea tonu na tutupu i lenei faalavelave ma ona vaega eseese, e $500,000

Na ta’ua e le loia a Faalata, o lenei aofaiga e $1.5 miliona faatasi ma pili falemai, e le o aofia ai se tagi e faasaga i leoleo taitoatasi, o lo o aafia i lenei mataupu.