O se tasi o alo o le atunu'u, Mark Jason Solofa ua fa'amanuiaina ana taumafaiga i a'oa'oga fa'apitoa fa'apisinisi, ona toe fa'amanuina fo'i lea o ana taumafaiga i lana taleni ua ia manatu e fiafia e tautua ai i le lautele pisinisi Oti Ulu ua fa'aigoaina "Men's Grooming!"

I lenei tausaga fou ua ia tula'i mai ma fa'alautele lana tautua i le fa'atuina o lona faleoti ulu lona tolu i le Danville, Kalefonia, ae o le igoa lava e tasi ua ia fa'aaogaina. Peita'i o lana lala lea ua ia manatu, o le a feso'ota'i tele ai o ia, ma tagatanu'u o le atumotu i le Pasefika, mai Hawaii, Tonga ma Samoa lona nu'u pele.

O le auau o lona manatu fa'aalia, ua ia fa'apea ai, "E leai se mea e tusa ma le tagata manumalo ma fa'aeaina aua sa ia galue punoua'i i ai, nai lo le tagata sa na'o na tu'ulima atu i ai e fa'aauau."

O sana fa'amatalaga tusitusia sa ia fa'ailoa, “O a'u o se tamaitiiti Samoa ma ou te mitamita tele i lo'u olaga ma o se tama Samoa moni, ae i ai fo'i ma so'u gafa e tau i le malo o Tonga."

"Na ou ola a'e i Niu Sila o i'ina na amata mai ai le matou olaga ma o'u matua, Lemalu Mark Solofa, ua tu'ua le malo, ma Cecilia Solofa si o'u tina pele. O le valu o o'u tausaga, na si'itia atoa mai ai le matou aiga, o ou matua, ma ou tuafafine e to'atolu i Samoa Tuto'atasi ma fa'amautu ai."

“O iina sa ou ola a'e ai i le aganu'u, ma va'ai ou mata i le tele o fe'au e ao ina faia e fanau talavou Samoa i so'o se taimi ae maise i taimi o fa'atasiga a aiga mo fa'alavelave o so'o se ituaiga, ma ou te fiafia i ai i lena vaega tele o lo'u olaga."

"Ono tausaga na mulimuli ane, ae toe si'itia loa i matou uma lava i Amerika Samoa ae ua matua lelei lava la'u tautala ma le tusitusi i le fa'asamoa, ma o le tele o taimi ua tautala lava na'o le gagana Samoa, ae ua le toe fa'apalagi so'o."

Na fa'aauau a'oga i Samoana High mo le lua tausaga ma fa'au'u i le tausaga 1997, toe maua ma lana avanoa e a'oga ai i Chaminade University i Hawaii, lea na matua umi ai lona taimi i ana a'oga ma se tasi o lona aiga ma le nu'u moni i ona lagona. O lona uiga, ua lua atunu'u ua ia fa'aigoaina o lona Aiga, Samoa ma Hawaii.

"E 10 lelei tausaga na tu'ua ai Amerika Samoa, fa'ato'a toe taliu atu e asi si o'u aiga. Peita'i, na ou manatu e fa'aauau le taumafaiga i Kalefonia ma ou tu'ua ai nai o'u atunu'u nei e lua, ae fa'amautu loa i Kalefonia, ina ua ou naunau e tulitulimatagau le taleni ua naunau i ai e fa'aaoga fo'i i ai ma tusi pasi ua umia i tomai fa'apisinisi mai le Iunivesite Chaminade i Hawaii, [BA - Business Administration]."

"Po'o fea lava ou te alu i ai, ae ou te misia lava lo'u Aiga ma le atunuu na ou ola a'e ai. Ou te misia le olaga fa'atalavou i le atumotu, ma olaga Fa'aleaganu'u Fa'asamoa sa masani ona fa'atino ai. Po'o le a lava le leva ona alu ese mai ai, ae le mafai ona galo, e le mafai fo'i ona mou ese le iloa ona tu ma aga e tatau ona faia, pe a toe taliu atu i ai i so'o se taimi,” o sana fa'amatalaga umi lea.

"Na muamua ave a'u mataupu tau le matata Fa'afuga o Ao o ali'i fa'apea ma latou Soesa. O le fa'amatagofieina o foliga o le laumua lava lea o le tagata soifua."

Na a'oga o ia i le Paul Mitchell The School - East Bay, Pleasant Hill, California mai le 2007-2009, ma sa fa'amanuiaina lona taumafai.

A'oga fa'apitoa lea i le Fa'afugaina o le Ao Ali'i ma fa'amae'a lelei e ia le 400 itula lautogia mo i latou e fia ausia tomai maualuluga i lea matata. Ua faigaluega ma fa'ata'ita'ia uma tiute e ao ina faia a'o e tautuaina se tasi, ma mae'a ia Oketopa 2009.

Ona toe avea lea o isi ana kosi fa'apitoa ina ia avea o ia ma Faia'oga i lea matata o le Oti Ulu i Hinton Baber College - Valljo, California, ma mae'a lelei lana 600 itula mo lena a'oga ma taua'ao ai lona tusi pasi ia Fepuari 2010.

Ia Iuni 2010 na maua ai fo'i lona tusi pasi e fa'amaonia ai lona tomai fa'apitoa e fa'afuga ai ao ma tautuaina Ali'i. Ua avea fo'i o ia ma faia'oga i mataupu e aoga i le taleni ua agavaa ai, ma ua fa'amaonia uma fo'i ona tomai sa tausailia i ona tusi pasi ua taua'aoina mai Hinton Barber College - Vallejo, CA. Fepuari 2010 - Me 2010.

Mai le masina o Oketopa 2011 se'ia o'o ia Aokuso 2012 na matua fuli ai o ia e faia lana taleni ma ua lagolagoina malosi o ia e le to'atele o ali'i e alaala i lea setete, i latou ua masani ia te ia ma lona agava'a ae maise lona tausa'afia a'o fa'atino lana taleni e tautua ai le mamalu na gasolo atu i le latou faleoti ulu sa galue ai i Dan's Barber Shop, Pleasanton, California. Jan 1 20111 - Aug 2012.

Mai le masina o Novema 2012 seia pa'ia i le tausaga nei 2019, ua tula'i Solofa o se faipisinisi i lana taleni o le Oti Ulu ma Soesa [Ava] mo Ali'i, ma ua ia lu'ia uma le vasega o tama Samoa i lea setete, e asiasi ane i ana pisinisi e tolu ua fa'atutuina. O le igoa o nei pisinisi "Men's Grooming". O isi lala e lua i lo’o i Berkeley ma Pleasanton i le setete o Kalefonia.