Ads by Google Ads by Google

Falepuipui le ali’i Inisinia na ta’usala i le faatau atu o fualaau faasaina


[ata: SN]
ausage@samoanews.com

Pago Pago, AMERIKA SAMOA

O le vaiaso na te’a nei na tula’i ai Timoteo Fa’aaliga i luma o le Fa’amasinoga Maualuga mo le lauina o lona fa’asalaga, ina ua faamaonia ona moliaga mamafa o le umia faasolitulafono o vaega o le pauta faasaina, o le Aisa.

 Talu mai le taimi na pu’e faapagota ai e Leoleo ia Fa’aaliga, ia Iulai 2019, sa lokaina o ia i le Toese i Tafuna e le i mafai ona ia totogi le $15,000 na faatulaga e tatala ai o ia i tua.

Ma e 20 masina lea ua faasala ai e le Fa’amasinoga Maualuga lenei ali’i Inisinia i le Toese i Tafuna, ae ua faamalumalu le toe fa’afo’I o ia I Samoa mo le nofomau ai I le 5 tausaga, fuafua lava I lona usita’ia o poloaiga a le Fa’amasinoga.

Na ulua’i molia e le malo ia Fa’aaliga i moliaga mamafa o le umia faasolitulafono o vaega o le pauta faasaina o le Aisa faapea ma Mariuana, ma le faamoemoe e faatau atu i isi tagata; atoa ai ma le moliaga e tasi o le umia faasolitulafono o se aupega e le i lesitalaina.

A e i lalo o se maliliega na sainia e Fa’aaliga ma le malo, lea fo’i na talia e le Fa’amasinoga i le 2 masina talu ai, na malie ai Fa’aaliga e tali ioe i le moliaga muamua lea na toe teuteu e le malo, ina ia faailoa ai le solitulafono o le umia faasolitulafono o vaega o le pauta faasaina o le aisa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, po o le faasala i faasalaga uma ia e lua.

I le ioeina e Fa’aaliga o nei solitulafono, sa ia ta’utino ai e fa’apea, i le taeao po o le aso 21 o Iulai 2019, na ia umia faasolitulafono ai vaega o le pauta faasaina o le aisa, i totonu o lana ta’avale, ina ua taofi e Leoleo lana ta’avale i le saoasaoa i luga o le alatele.

Na faatoese Fa’aaliga I le faamasinoga e tusa ai o lana solitulafono ma ia talosagaina ai se avanoa e toe fo’i atu ai i tua e saili sana galuega e tausi ai lona to’alua ma lana fanau. 

Sa faamatalaina e Fa’aaliga I le Fa’amasinoga le tala o lona olaga atoa ai ma le ulua’i taimi na faatoa taunu’u mai ai mai Samoa. Na taua e Fa’aaliga e fa’apea, e tasi lava le mafua’aga na ala ai ona tuua lona aiga i Samoa ae ulufale mai i Amerika Samoa, o le tau sailiga lea o se manuia mo nai ona matua ma nai ona tei o lo o faamuli mai i Samoa, aemaise ai fo’i lona to’alua ma lana fanau.

Sa ia toe manatua le ulua’i taimi na faatoa taunuu mai ai i le atunu’u, ma amata ai loa ona galue i le galuega Ta i’a ma ia maua ai le totogi e $70 i le vaiaso. Sa lava ma totoe lea tupe mo ia ma lona aiga. Tuana’i tausaga e 2 talu ona galue i galuega Ta i’a ae maua loa lona avanoa i le Kamupani i’a ina ua mae’a ona pu’e lona ID.

Sa ia vaaia le manaia o le olaga galue ma tausi le aiga. Ae i le tausaga e 2017, na suia ai loa le auala na ui ai lona olaga, ina ua ia filifili e mafuta atu i tagata o lo o latou umia ma faatauina atu fualaau faasaina i isi tagata. Sa ia naunau e fia avea ma tagata e tele ni tupe, ma i’u ina nofo ai loa mai le Kamupani i’a ae faatino ana galuega inisinia i lona fale.

Na ta’ua e Fa’aaliga i le Fa’amasinoga, o iina tonu lava na mafua ai ona tutupu le tele o faafitauli i lona olaga, seia oo ai lava ina pu’e faapagota o ia e Leoleo ma maua ai ia te ia fualaau faasaina ma aupega.

Sa ia ta’utino i le Fa’amasinoga, ua ia lagona lona salamo mai le mea sese sa ia faia, ma ua aoga masina e 17 lea na taofia ai o ia i le Toese ua ia aoaoina ai se lesona taua i lona olaga.

Na fesiligia e le Fa’amasinoga ia Fa’aaliga po o le a le mea sese matuia ua ia faia i lona olaga.  Na tali le ua molia, ua ia umia fualaau faasaina ma aupega mata’utia, ua avea foi o ia o se tagata e faatauina atu fualaau faasaina i isi tagata ina ia maua mai ai tupe mo ia ma lona aiga.

“O le a sau mea aoga na maua mai ai i lea olaga,” o le fesili fia malamalama lea a le Fa’amasinoga. 

Na tali Fa’aaliga, “E leai se mea aoga na maua mai ai, na o le faalumaina ma le motusia ai o le mafutaga ma le to’alua ma le fanau”.

Na talosaga le Loia Fautua a Fa’aaliga i le Fa’amasinoga mo se faasalaga faanofovaavaaia, ina ia mafai ai ona toe fo’i le ua molia i tua e saili sana galuega e tausi ai lona aiga. Na taua e lana Loia Fautua le salamo moni o Fa’aaliga mai lana mea sese sa faia.

Na lagolago e le Loia a le malo le faafinauga a le itu tete’e mo se faasalaga faanofovaavaaia mo Fa’aaliga.

A o le i tuuina mai le faaiuga a le Fa’amasinoga, na toe faatepa e le Fa’amasinoga itu e 2 o lenei mataupu i mau faamaonia na saunia e le malo e folasia i luma o le Vaega Iloilo Iuga pe ana faapea e taunu’u se faamasinoga autu o lenei mataupu.

Na taua e le Fa’amasinoga e fa’apea, o le taeao po lava o le aso 21 o Iulai 2018 na taofi ai e ni ali’i Leoleo se to’alua se ta’avale na faafoe e le ua molia, ona o le saoasaoa. 

A o talanoa Leoleo ia Fa’aaliga, na iloa atu e le isi Leoleo le ‘au o se fana o lo o afifi i se ‘ie solosolo, o lo o taatia i le nofoa pito i tua o le ta’avale. Na fesili Leoleo po o ai e ana le fana, ae na tali le ua molia, o le fana a lana uo o lo o alu e su’e se isi e fai ai ona ua leaga le kilipa.

Ina ua siaki e leoleo le ta’avale, na maua ai fualaau fa’asaina o le aisa ma le mariuana, ua uma ona utu i totonu o pepa iila laiti ma ua sauni e faatau atu i isi tagata. Sa maua ai fo’i se tinoitupe e $1,058 i totonu o le ta’avale a le ua molia.

Ina ua fesiligia Fa’aaliga e tusa ai o fualaau faasaina sa i totonu o le ta’avale, sa ia taua ai i Leoleo, ai o ni mea sa tuu e ana tama faigaluega i totonu o le ta’avale.

O ni isi o tuutuuga o le fa’asalaga a Fa’aaliga, e aofia ai lona tuliina o masina e 20 i le Toese i Tafuna, ae aofia ai ma masina e 17 lea na taofia ai o ia e faatalitali ai se faaiuga o lana mataupu. Lona uiga, toe 3 masina o lo o totoe ona tatala lea o Fa’aaliga i tua.

Ua poloaina le ua molia, e le tatau ona ia toe tagofia le ‘ava malosi, fualaau faasaina po o a’upega mata’utia, e mafai fo’i ona faia ni suega i lona tino ina ia faamaonia ai o lo o mama o ia mai fualaau faasaina.

Na fautuaina malosi foi e le Faamasinoga ia Fa’aaliga e aua ne’i ona toe oo mai i luma o le Fa’amasinoga mo se isi lava solitulafono, a ia tausi i lana folafolaga ua uma ona tuuina mai i luma o le Fa’amasinoga.