E 10 tausaga lea ua fa’asala ai e le Fa’amasinoga Maualuga le ali’i na ia fa’aaoga lana ta’avale e fa’aoo ai manu’a i ni tagata se to’alua, ina ua ta’usala o ia i moliaga mamafa e 2 o le fa’aoolima i le tulaga lua.

O le vaiaso na te’a nei na tula’i ai le susuga a Falaniko Fetoai i luma o le afioga i le ali’i Fa’amasino Sili ia Michael Kruse mo le lauina o lana fa’asalaga. Sa tula’i mo ia le ali’i loia tua ia Marcellus Talaimalo Uiagalelei, ae o le tama’ita’i loia sili lagolago ia Christy Dunn na fai ma sui o le malo i lenei mataupu.

Na ulua’i tu’uaia Fetoai i moliaga mamafa e 2 o le faaoolima i le tulaga muamua, faapea ai ma le moliaga o le faaoolima i le tulaga lua, atoa ai ma moliaga tau solitulafono i luga o le alatele.

Ae i lalo o se maliliega na sainia e le ua molia ma le malo, na malie ai loa Fetoai e tali ioe i le moliaga muamua na toe teuteu e le malo, ina ia faailoa ai le moliaga o le faaoolima i le tulaga lua, atoa ai ma lona tali ioe fo’i i le moliaga lona lua o le faaoolima i le tulaga lua, o vaega D ia o solitulafono mamafa, lea e mafai ona fa’asala ai se tasi i le toese mo le umi e oo atu i le 5 tausaga, pe faasala fo’i i le salatupe e oo atu i le $5,000 i le moliaga e tasi.

I le tali ioe ai o Fetoai, sa ia ta’utino ai e fa’apea, i le afiafi o le aso 28 o Novema 2017 i Pago Pago, na ia faatupu ai manu’a i ni tagata se to’alua i se auala fa’atautala.

Na ta’utino Fetoai e fa’apea, sa ia fa’aaoga lana ta’avale e so’a ai se Tina ma se tamaitiiti, lea na mafua ai ona oo manu’a tuga i o la tino.

E to’alua molimau na valaau e le loia a Fetoai mo le tuuina atu o ni a laua fa’amatalaga i le fa’amasinoga e fa’atatau i le ua molia. O i laua ia o le faletua o Fetoai, ma le Faifeau o lo o fai ma Faufautua mo pagota i le toese i Tafuna, Rev. Faafetai Mulitauaopele Fuimaono.

Na taua e le faletua a le ua molia le tele o lu’itau ua fetaiai ma le la aiga, talu ona taofia lona to’alua i le toese mo le silia i le 11 masina. A o le i tula’i mai lenei fa’alavelave, o ia sa faigaluega mo le tausiga o lona to’alua ma le la fanau e to’afa.

“O ia o se Tama e galue malosi mo le tausiga o lona aiga, e naunau fo’i mo se mea lelei mo lana fanau. E loto alofa ia te a’u ma le ma fanau, ae sili ai fo’i lona alofa i lona aiga faapea lana Ekalesia,” o se vaega lea o le molimau a le to’alua a le ua molia.

Na taua e le fafine,  talu ona taofia Falaniko i le falepuipui, e leai lava se isi e maua mai ai se tupe e tausi ai lana fanau. E masani ona fesoasoani mai le aiga o Falaniko i le tausiga o lana fanau, peita’i e le o aso uma e maua mai ai lea fesoasoani.

“E i ai taimi e leai ai se mea’ai mo a’u ma le fanau i luga o le laulau. O nisi fo’i aso ua pe le uila, pe motusia fo’i le vai. A mama’i la’u fanau e fa’atali le pasi e momoli ai i le falema’i, o isi fo’i taimi ua ou maitauina ai tulaga faigata o le aiga, ona o le valavala ai ma le to’alua”.

Na talosaga le to’alua a le ua molia mo se avanoa e toe tatala mai ai i tua Falaniko, se’i fesoasoani i le tausiga o le la aiga.

Na taua e Rev. Fuimaono i lana molimau e fa’apea, talu mai masina e tele na la mafuta ai ma Falaniko i le toese, sa ia maitauina ai uiga lelei ia te ia. O se tagata e i ai taleni e tele, o ia fo’i o se ali’i sa lelei le fa’avaeina mai o lona olaga.

E talitonu le susuga Rev. Fuimaono, o le sasi e pei ona faaletonu ai le olaga o Falaniko, e mafua mai i lona faatamala, ae ua lagona lona salamo.

Ina ua maua le avanoa o le ua molia mai le fa’amasinoga, sa ia fa’atoese ai loa e tusa ai o lana solitulafono, ma ia talosagaina ai se isi avanoa mo ia sei fo’i atu ai i tua e tausi lona to’alua ma lana fanau, aemaise ai nai ona matua ma le ekalesia.

Sa ia faatoese i le aiga o i laua na a’afia i lana solitulafono, ina ia faamagalo sona sese atoa ai ma le gaioiga sa ia faia, na mafua ai ona oo manu’a ia te i laua.

Na talosaga Uiagalelei i le fa’amasinoga mo se faasalaga mama mo le ua molia. Na taua e Uiagalelei e fa’apea, o Falaniko, o ia o se ali’i e loto alofa ma naunau ia manuia lana fanau, ae o lona faatamala ua mafua ai ona tula’i mai lenei fa’alavelave.

Ae na taua e le tama’ita’i loia ia Dunn e faapea, e to’alua tagata na manunu’a i le gaioiga a le ua molia.

Na taua e Dunn e fa’apea, e ui na manu’a le ali’i talavou, ae sa mafai lava ona toe togafiti o ia ma toe te’a i tua, peita’i o manu’a tuga na aafia ai le Tina na lavea, e fai lava si ogaoga ma matuia.

E 2 vaiaso na taofia ai o ia i le falema’i i Faga’alu, ma i’u ina auina atu ai loa o ia i fafo mo togafitiga i lona soifua maloloina. O le taimi nei, ua faigata lava ona toe fo’i le malosi atoatoa i le Tina na a’afia, ma ua le toe tutusa lava lona mafaufau ma lona malosi i le taimi nei.

Na taua e Dunn e fa’apea, ua uma ona ia talanoa i aiga o i laua na a’afia, latou te le manana’o e totogi atu e le ua molia se tupe e taui ai tulaga uma e pei ona a’afia ai i laua e to’alua, pau le latou talosaga, ia tuuina atu e le fa’amasinoga se fa’asalaga faa falepuipui e talafeagai ma le gaioiga sa faia e le ua molia.

I le fa’aiuga a le fa’amasinoga, na saunoa Kruse e fa’apea, e ui ua toe malosi le ali’i talavou na a’afia, peita’i o le ripoti a le Ofisa Faanofovaavaaia, o lo o manino mai ai le tele o se faaletonu o lo o feagai ma le Tina na a’afia, e le gata ua le tutusa le malosi o lona tino sa i ai i le taimi muamua, ae ua oo lava fo’i i le malosi o lona mafaufau ua le atoatoa, talu mai lava le fa’alavelave na manu’a ai.

Mo le moliaga muamua o le faaoolima i le tulaga lua, e 5 tausaga ua faasala ai Fetoai i le falepuipui. Mo le moliaga lona lua o le faaoolima i le tulaga lua, e 5 fo’i tausaga ua faasala ai Fetoai i le falepuipui. O ia faasalaga e tuli eseese, lona uiga, e 10 tausaga lea ua faasala ai le ua molia i le toese i Tafuna.