Ads by Google Ads by Google

Falepuipui le ali’i na ia osofaia ni fale se 2 i Malaeimi


[ata: foa'i]
ausage@samoanews.com

Ua faasalaina i le toese i Tafuna e le Fa’amasinoga Maualuga le ali’i e 26 tausaga le matua lea na ia osofaia ni fale o ni aiga se 2 i Malaeimi, ina ua ta’usala o ia i le moliaga mamafa o le gaoi.

 

O le fa’asalaga fa’a falepuipui e 28 masina ua tu’uina atu mo Ameperosa Mika, o se tasi lea o tuutuuga o lana nofovaavaaia e 7 tausaga. Ua poloaina fo’i o ia na te toe totogi le tupe e $1,089 mo le tau o mea totino sa ia gaoia ma fa’aleagaina i le taimi o lana solitulafono.

 

Na ulua’i molia e le malo ia Mika i moliaga mamafa e 3 e aofia ai le gaoi, talepe falei le tulaga muamua, faapea ai ma le fa’aoso o se tamaititi e laititi i lalo o le tulafono e fa’atino le solitulafono o le goai.

 

Ae i lalo o se maliliega na sainia e Mika ma le malo, lea fo’i na talia e le fa’amasinoga i le vaiaso na te’a nei, na ia tali ioe i le moliaga o le gaoi, ae solofua ai e le Fa’amasinoga isi moliaga o lo o totoe.

 

I le tali ioe ai o Mika i le moliaga o le gaoi, sa ia ta’utino ai e fa’apea, i se taimi o le po o le aso 13 o Novema 2017, sa la osofaia ai ma se tamaitiiti e 16 tausaga le matua ni fale o ni aiga se to’alua.

 

E 2 itula na umi na va ai le taimi na osofa’i ai e le ua molia ma le tamaititi laititi na la to’alua le fale muamua, ae osofaia loa fo’i ma le fale lona lua.

 

A o i ai Mika i totonu o le fale muamua, sa ia gaoia ai ni telefoni feavea’i, o ni pea seevae faapea ai ma lavalava sa i totonu o le potu. Sa ia gaoia fo’i ni meatotino e alu i le uila e pei o se DVD player, o ni DVDs, o remote control faapea ai ma se uati auro sa i luga o le pusa tu o loo i luma o le potu malolo.

 

I le fale lona lua, na ioe Mika i le fa’amasinoga, sa ia fa’atonuina le ali’i talavou na la to’alua e talepe le faitoto’a pito i tua o le fale, ma maua ai loa le avanoa e ulufale ai o i totonu, ae faatonu le tamaititi talavou e tu i fafo e vaai se tagata e alu atu.

 

A o i ai i totonu o le fale o le aiga lona 2 na a’afia, na ta’utino Mika e fa’apea, sa ia gaoia se laptop atoa ai ma totoga uma e fa’aaoga i lea masini sa i totonu o se ato. Sa ia faaleagaina fo’i le TV sa i luma o le potu malolo. faapea ai ma lona gaoia o se tinoitupe e $79.

 

O le tau o mea totino sa faaleagaina ma gaoia i le fale o le aiga lona 2 na a’afia e silia i le $300 e pei ona taua e le malo i le latou tagi.

 

Ina ua maua le avanoa o Mika mai le fa’amasinoga, sa ia fa’atoese ai e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua i lona aiga e tausi ona matua ma fai sona aoga i lona aiga, nu’u ma le ekalesia.

 

“Ou te ta’utino atu i lau afioga i le Fa’amasino, ua lagona lo’u salamo moni e tusa ai o la’u solitulafono sa faia, ua ou lelava nofo pologa i totonu o le falepuipui, e le gata e le lelei le tausiga o pagota, ae le maua fo’i se sa’olotoga moni e pei ona maua i tua i le aiga. Faamolemole, pe maua se avanoa se tasi mo a’u ou te toe fo’i atu ai i tua e saili sa’u galuega e totogi ai la’u salatupe ma fai se isi suiga fou i lo’u olaga,” o le talosaga lea a Mika i le fa’amasinoga.

 

Na tutu fa’atasi loia a itu e lua e talosaga i le fa’amasinoga mo se fa’asalaga faanofovaavaaia, e aofia ai ma se taimi e tuli i le falepuipui ina ia fai ma lesona i le olaga o Mika, e le o se mea lelei le soli o le tulafono.

 

Na talosaga le loia ai Mika ia Rob McNeill i le fa’amasinoga ina ia fa’aaoga masina e 15 lea na taofia ai Mika i le toese e fa’atali ai se fa’aiuga o lana mataupu e fai ma ana fa’asalaga .

 

Na talosaga le itu a le malo, ina ia aofia i sana faaiuga le faatonuina lea o Mika e toe totogi le tupe mo mea totino sa gaoia ma fa’aleagaina. Na faamanino atili fo’i e le itu a le malo e fa’apea, ua uma ona faila moliaga faasaga i le tamaititi e 16 tausaga na to’alua ma Mika i lenei osofaiga, ma o lo o fa’agasolo lana mataupu i luma o le Fa’amasinoga mo fanau laiti.

 

I le mae’a ai ona iloilo e le fa’amasinoga o faamaumauga uma e uiga i lenei mataupu, na latou tuuina mai ai loa le fa’asalaga mo le ua molia. E manatu le fa’amasinoga, o le tulaga matuia o le gaioiga sa faia e Mika, o lona fa’atonuina lea o se tamaititi e talavou la te fa’atino fa’atasi se solitulafono.

 

E 7 tausaga na manatu le fa’amasinoga e fa’asala ai Mika i le toese, peita’i ua fa’amalumalu le tuliina o lea fa’asalaga, ae ua faanofovaavaaia mo le 7 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o masina e 28 i le falepuipui, e aofia ai ma le silia i le 14 masina lea ua uma ona ia tuliina i le taimi nei. E$1,000 le salatupe na te totogiina, atoa ai ma le toe totogi o le tupe e $1,089 mo le tau o meatotino sa gaoia ma faaleagaina.

 

Ua poloaina e le fa’amasinoga le ua molia ina ia aua ne’i ona toe taumafai e fa’afesoota’i le tamaititi talavou sa la to’alua i lenei solitulafono, aua ne’i ona toe tagofia le ‘ava malosi, a ia avea o ia ma tagatanu’u e tausi i tulafono ma usita’i i tuutuuga o lana nofovaavaaia.

 

Afai ae magalo le ua molia mai le toese, ua poloaina e le fa’amasinoga lona tuua loa o le teritori ae toe fo’i atu i lona atunu’u na malaga mai ai, ma nofo mau ai mo le umi o lana nofovaavaaia. Peita’i o lea tuutuuga o le a taofi lona faataunu’uina, fuafua lava i lona usitaia o tuutuuga o lana nofovaavaaia.