E 20 masina lea ua fa’asala ai e le Fa’amasinoga Maualuga se ali’i e 29 tausaga le matua mai Pago Pago, e taofia ai i le toese i Tafuna, ina ua fa’amaonia moliaga o lona umia fa’asolitulafono lea o vaega o le pauta oona o le aisa.

O le fa’asalaga fa’a falepuipui ua tuuina atu i le ali’i o Tinojaylann Fa’avi, o se tasi lea o tuutuuga o lana nofovaavaaia e 5 tausaga. O le afioga i le Fa’amasino Sili Lagolago ia Elvis P. Patea na tuuina atu le fa’asalaga a Fa’avi i le vaiaso na te’a nei, fa’atasi ai ma le lagolagosua a afioga i ali’i Fa’amasino Lagolago ia Su’apaia Pereira ma Paepae I. Faiai.

O le tama’ita’i loia sili lagolago ia Christy Dunn na tula’i mo le malo, ae o le ali’i loia fautua ia Michael White na tula’i mo Fa’avi, lea na taofia mai lava i le toese talu mai le taimi na pu’e fa’apagota ai o ia e Leoleo i le masina o Tesema o le tausaga na te’a nei.

O le susuga a Fa’avi na ulua’i tu’uaia o ia i le moliaga pito sili ona mamafa o le umia fa’asolitulafono lea o vaega o le pauta oona o le aisa. O lea moliaga, e mafai ona fa’asala ai o ia i le toese mo le umi e le itiiti ifo i le 5 tausaga ae le sili atu i le 10 tausaga, poo le fa’asala fo’i i le salatupe e le itiiti ifo i le $5,000 ae le sili atui le $20,000.

Ae i lalo o se maliliega na sainia e le ua molia ma le malo, lea fo’i na talia e le fa’amasinoga, na tali ioe ai Fa’avi i le moliaga feololo, o le umia faasolitulafono o le pauta o le ‘aisa, lea e mafai ona fa’asala ai o ia i le toese mo le umi e oo atu i le 5 tausaga, pe fa’asala fo’i i le salatupe e oo atu i le $,5000.

I le tali ioe ai o Faavi i le moliaga e pei ona ta’usala ai o ia, na ia ta’utino ai e fa’apea, i se taimi o le masina o Tesema o le tausaga na te’a nei, na maua ai e Leoleo ia te ia se paipa tioata o loo i ai i totonu vaega o le pauta oona o le aisa.

Na fa’atoese le ua molia i le fa’amasinoga e tusa ai ma lana solitulafono, ma ia talosagaina ai fo’i se isi avanoa mo ia, se’i fo’i atu i tua e tausi lona Tama. Na ta’utino le ua molia i le fa’amasinoga, ua lagona lona salamo moni e tusa ai o lana solitulafono, na te le toe faia fo’i lenei solitulafono i le lumana’i.

Na valaau e le loia a Fa’avi le Tama o le ua molia mo le tuuina atu o sana molimau e tusa ai o le la mafutaga ma lona atali’i.

Na taua e le Tama i luma o le fa’amasinoga ina ua mae’a ona fa’atauto o ia, o ia o se tasi o Pulenu’u o le afioaga i Pago Pago, ma o le ua molia, o le lona tolu lea o lana fanau. Na taua e le Tama e fa’apea, o le ali’i o Tinojaylann, o lona lima taumatau lea i le fa’atinoina o lona tofi fa’a Pulenu’u i totonu o le afioaga aemaise ai fo’i le aiga.

Sa ia talosaga i le fa’amasinoga mo se avanoa e toe fo’i atu ai lona atali’i, e fa’aauau lana galuega o le fesoasoani lea ia te ia i lona tofiga fa’a Pulenu’u.

Ina ua fesiligia e White le Tama pe sa i ai se fa’asalaga a le nu’u mo lona atali’i, na saunoa ai le ali’i Pulenu’u e fa’apea, ua mae’a ona fa’asala e le Puleaga a ali’i ma faipule o Pago Pago ia Tinojaylann i le $1,000, atoa ai ma sua sa ta’i i ta’ita’i o le nu’u.

Na tutu fa’atasi loia e finau i le fa’amasinoga ina ia fa’asala le ua molia i se fa’asalaga faanofovaavaaia.

Pau le tulaga na fa’amamafa e le loia a le malo, o le matuia lea o le gaioiga sa faia e le ua molia, i lona tufatufaina atu o le fualaau oona o le aisa i fanau laiti i totonu o le afioaga. Na taua e Dunn e faapea, ina ua fesiligia e Leoleo tamaiti laiti sa maua i ai le fualaau oona o le aisa, poo fea na latou aumaia ai nei fualaau, ae tali tamaiti laiti nei, na avatu e le ua molia ia te i laetou.

Na aga’i Leoleo e saili le ua molia, ae ina ua maua o ia, na maua ai e Leoleo se paipa o loo i ai vaega o le pauta oona o le aisa, ma ua atili fa’amausali ai tu’uaiga o ia lea na tufatufaina atu aisa i tamaiti laiti.

E 5 tausaga na manatu le fa’amasinoga e faasala ai Fa’avi i le toese, peita’i o le a fa’amalumalu lona tuliina o lea fa’asalaga, ae o le a faanofovaavaaia ai o ia i lalo o tuutuuga e ao ona ia usitaia.

O se tasi o tuutuuga, o lona tuliina lea o masina e 20 i le toese, ma totogi le salatupe e $1,000. Ae talu ai o lea ua uma ona fa’asala o ia e le afioaga i Pago Pago i le $1,000, o le a fa’amalumalu ai lona totogiina o le salatupe a le fa’amasinoga, fuafua lava i lona usitaia o poloaiga ua tuuina atu ia te ia.

O ni isi o poloaiga a le fa’amasinoga e aofia ai le faasa lea ona toe tagofia e le ua molia fualaau faasaina ma le ava malosi, o le a mafai fo’i ona faia ni suegai lona tino ina ia faamaonia ai o loo ia usitaia lea tuutuuga.