Pago Pago, AMERIKA SAMOA

Ua molia nei se alii e 38 tausaga, I lona umia faasolitulafono o vaega o le pauta faasaina o le Aisa, ina ua pu’e faapagota e leoleo ona o lona sauaina o lona to’alua, ma maua ai e leoleo ni sikaleti mariuana e tolu (3).

E lua (2) vaiaso talu ona tula’I mai le faalavelave lea ua molia ai Ameko Leu I le faaoolima I lona to’alua, ae fa’atoa pu’e faapagota o ia e leoleo, I le fale o se tasi o ona tausoga.

E to’atele Leoleo na tali atu i le valaau ina ua talosagaina e se tama’ita’i se fesoasoani, ona o le ua molia ua ia faaoolima i lona to’alua. O le tama’ita’i na ia faafesootaia Leoleo, o le uso laititi lea o le to’alua a Ameko, lea e latou te nonofo faatasi i le fale e tasi ma le la fanau tama’ita’i e to’atolu.

E pei ona taua e Leoleo i le latou tagi e faapea, o le afiafi po o le aso 19 o Iuni o le tausaga nei na telefoni mai ai se tama’ita’i talavou i Tafeta, e talosagaina se fesoasoani mo lona uso matua o lo o fasi tigaina e lona to’alua. Na taunu’u Leoleo ma fa’ailoa iai e lenei tamaitai  lona uso o lo o i totonu o le fale o lo o manu’a lona tino e aofia ai lona ulu ma ona foliga.

Na aga’i atu Leoleo ma latou molimauina le Tina na aafia o lo o saofa’i mai i totonu o le potu, o lo o tagi ma foliga gatete lona tino i le fefe, ae o loo tafe mai le toto i lona ulu ma ona foliga. Na vave gaioiga a Leoleo ma mafai ai loa ona ofo atu se fesoasoani mo ia, e faatali ai le taunu’u ane o le ta’avale Falema’i (EMS).

Na taua e le uso o le Tina na aafia, ina ua fesiligia e Leoleo, lona vaaia o le ua molia o ia faaoolima i lona uso, e ala i le toso solo o ia i luga o le sima ma tatu’i ona foliga. Sa ia vaaia fo’i le faaaoga e Ameko o le ‘au malo o le pulumu salu fale ma sasa ai le ulu ma le papatua o le na aafia, a o ta’atia i lalo ma e e i lona fia maua o se fesoasoani.

Na taua foi e le tamaitai lea i Leoleo, le faasaina o ia ma lana fanau laiti e to’atolu, e le ua molia, ona alu ese se isi ma le potu, peita’i na mafai lava ona ia sola mai i fafo o le potu ma ia vilia ai loa Leoleo mo se fesoasoani. O le taimi lava na iloa ai e le ua molia ua uma ona vili Leoleo, na ia sola ese ai loa mai le fale.

Na fesiligia e Leoleo le afafine matua a le ua molia, e 13 tausaga, lea fo’i sa i ai i le taimi na tula’i mai ai le fa’alavelave. Na taua e le tama’ita’i lea lona vaai tino i le taimi na fasi ai e lona Tama lona Tina, e ala i le tu’i, kiki, faapea ai ma lona fa’aaoga o le au u’amea o le pulumu salu fale e sasa ai le tino o lona Tina. Sa ia lagonaina le e’e o lona Tina i le fia maua o se fesoasoani, a o le taimi lea o lo o futi ai e le ua molia lona ulu ma toso solo o ia i totonu o le fale, amata mai i tua o le umukuka ma faasolo mai ai i le potu malolo.

Na taua e le afafine matua a le ua molia i Leoleo e fa’apea, sa i ai le taimi na ia lagonaina ai le ee leotele o lona Tina, ma ia manatu ai, atonu ua tupu se tulaga matuia ia te ia, peitai na musu e alu e fesoasoani ona o lona fefe i fasi atu ai ma ia e lona Tama.

Sa ia ta’ua foi, le folafola atu e lona Tama ia i latou, na te fasia le tagata e oso atu i totonu o le potu, pe alu ese foi ma totonu o le fale. 

Na maua le avanoa e fesiligia ai e Leoleo le Tina na aafia e tusa ai o lenei fa’alavelave, ina ua mae’a ona togafitia o ia i le Falema’i ma ua tulaga manuia fo’i le malosi o lona Tino. 

Na taua e le Tina e faapea, na lelei lava mea uma i le la talanoaga ma lona to’alua i le afiafi na tula’i mai ai le fa’alavelave ina ua faatoa manava atu i le Fale. Sa ia fa’aaoga lea avanoa e fautua ma talanoa ai ia te ia e faatatau i le tele o tupe o loo ma’imau i le pia. Sa ia fai i ai, ana tuu lana pia atonu ua tele nisi mea aoga a lo latou aiga e mafai ona faatino i lona totogi. 

O le ua molia e pei ona taua e lona to’alua i Leoleo, e galue o se Kamuta i se tasi o Kamupani Fau Fale  mo le silia i le 5 tausaga. E $280 lona totogi e maua i le vaiaso e tasi, lea e talitonu le na aafia, e lava ma totoe lea tupe e faasoasoa i manaoga o le aiga. Ae o le faafitauli e pei ona taua e le Tina, o le afa o le totogi a lona to’alua e alu e faatau ai pia ma ana uo, ma ua aga’i atu fo’i le olaga o lona to’alua i lona tagofia lea o fualaau fa’asaina. 

A o faagasolo le la talanoaga, na faafuase’i ona ita lona to’alua i ana fautuaga sa avatu i ai, ma ia tula’i ai loa i luga ma kola lona ofu, sosoo atu ai ma le titina o lona ua, seia oo lava i lona tu’i o ona foliga ma una’i o ia i lalo. Na ia kiki lona tua ma toso solo o ia i totonu o le fale, ma faai’u ai loa i lona faaaoga o le au malo o le pulumu salu fale e sa ai lona ulu ma lona papatua, ma mafua ai loa ona manu’a lona ulu.

Na taua e le Tina lona fefe i lona saogalemu atoa ai ma le saogalemu a lana fanau, ma ua ia manatu ua tatau ona faia se faaiuga ina ia faaletulafono loa le la teteaga ma lona to’alua, pe afai ae mae’a ona faagasolo lana mataupu i luma o le Fa’amasinoga.

Na aga’i atu Leoleo i le fale o le tausoga a le ua molia i Tafuna ina ua latou maua se ripoti o iina o lo o nofo ai o ia, ma latou pu’e faapagota ai loa le ua molia ma auina atu i le Ofisa i Tafuna mo suesuega. A o le i auina atu o ia i le Ofisa i Tafuna, na muamua saili lona tino ma maua ai sikaleti mariuana e 3 i totonu o lana taga. 

Ina ua fesiligia e Leoleo le ua molia e uiga i lenei mataupu, na ia ioeina lona faaoolima i lona to’alua, e mafua mai i lona le fiafia i le tele atu o ana faamatalaga ia te ia. Sa ia taua fo’i e faapea, ua silia ma le 3 masina talu ona ia tagofia fualaau fa’asaina, pau lea o le auala na te maua ai le malosi e fa’atino ai galuega kamuta i le vevela o le la.

O sikaleti mariuana na maua ia Ameko, sa ia taua i Leoleo e fa’apea, o sikaleti na ia faatau mai i se tasi o ana uo ave taxi i le $30.

O le masina na te’a nei na tula’i ai Ameko i luma o le Fa’amasinoga Faaitumalo. Ua molia nei o ia i le moliaga o le umia faasolitulafono o vaega o le laau faasaina o le mariuana; tasi le moliaga o le faaoolima i le tulaga 2 faapea ai ma le moliaga mama e tasi o le faatupu vevesi i totonu o lona aiga. 

E $10,000 lea ua fa’atulaga e tatala ai i tua le ua molia. O le aso Tofi o le vaiaso fou lea ua fa’atulaga e faia ai lana ulua’i iloiloga i luma o le Fa’amasinoga Fa’aitumalo.

Afai ae tatala Ameko i tua mai le Toese i Tafua, e le mafai ona ia toe faafesoota’i lona to’alua poo lana fanau, e le tatau fo’i ona toe nofo i lo latou fale, ae tatau ona saili se isi nofoaga e nofo ai.

Ua fautuaina fo’i e le Fa’amasinoga Ameko e totogi ana salatupe na faatonu e le Faamasinoga o ia i le tausaga na te’a nei e totogi.