Pago Pago, AMERIKA SAMOA

Ua fautuaina e Taitai o le Maota o Sui faapea ai le mamalu o afioga i Faipule o Itumalo filifilia le sui faipule mai le Itumalo o Sale, le Tofa Titiali’i Kitara Vaiau, e tusa ai o saunoaga ma amioga taupulea e tatau ona fa’aali i totonu o le Maota i soo se taimi e faatino ai galuega a le Maota o Sui.

O se faafitauli na tula’i mai i le taimi o le Iloiloga a le Komiti a Tupulaga Talavou, Tina ma Tamaitai a le Maota o Sui i le aso Faraile na te’a nei, lea na fa’aalia ai e Titiali’i ni amioga faapea ai ma ni lafoga i totonu o le maota ao i ai le Faatonusili filifilia mo lana iloiloga e faamaonia ai tofiga a le Kovana mo ia, le Faletua ia Dr. Salote Aoelua-Fanene, na mafua ai loa ona taoto se fautuaga mai afioga i Faipule ina ia faia se faasalaga faasaga ia Titiali’i.

O le fautuaga mai se tasi o Faipule matua, le afioga Vaetasi Tuumolimoli Saena Moliga, sa ia fautuaina ai le Sui Fofoga Fetalai ia Fetu Fetui Jr ina ia faia se faaiuga faasaga ia Titiali’i, e pei o le faamalolo lea o ia mo ni aso fono se 3 e aunoa ma le maua o sona totogi, ina ia ona lagona ai le le manuia o uiga o lo o fa’aauau pea ona ia fa’aalia i totonu o le maota.

O Titiali’i, o le Taitaifono lea o le Komiti na faatautaia le iloiloga e faamaonia ai tofiga a le Kovana mo le tamaitai Faatonusili filifilia ia Aoelua-Fanene. Na tuai atu Titiali’i i le iloiloga, ona taitai lea e le sui Taitaifono o le Komiti, afioga Lavea Legaee Palepoi Mauga le iloiloga.

A o faagasolo le iloiloga, sa talosaga lemu atu Titiali’i ia Lavea mo sona avanoa e faaleo ai ana fesili i le molimau, peita’i sa fa’aauau pea ona leai se avanoa na tuu e Lavea ia Titiali’i. Na avea lea ma itu na le fiafia ai Titiali’i ma amata loa ona fai e le afioga a Titiali’i nisi o gaioiga, e pei o lona geno geno lea i le molimau e aua nei talia fesili a afioga i Faipule.

O le faaiuga o le iloiloga ina ua tuu atu le avanoa i le tamaitai Faatonusili filifilia ia Aoelua-Fanene mo sana saunoaga faai’u, ae faauilavea loa le afioga a Titiali’i ma ia faaleo lona le fiafia i le leai o se avanoa na tuuina atu ia te ia.

Na taua e Titiali’i e faapea, o le susuga a Lavea ma sui uma o le komiti, o lana fanau, o le mafua’aga fo’i lea e manatu ai o ia e tuuina atu sana fautuaga i lana fanau i auala e faafoe ai iloiloga.

E le i logo malie i le faafofoga a le maota le saunoaga a Titiali’i. Na saunoa le afioga i le ali’i Faipule ia Vailoata E. Amituana’i ma fautua i le Komiti, e tatau ona fautuaina le afioga a Titiali’i i amioga ma saunoaga o lo o lalafo i totonu o le maota ao filogia le maota. 

Ina ua tuua e le molimau le Maota, na fautua ai loa le afioga i le Sui Fofoga Fetalai ia Fetu i le afioga a Titiali’i, ina ia tautuana ma ia le mamalu o le maota e tatou ona latou puipui uma i ai.

Na faauilavea Titiali’i ma saunoa e faapea, o lona le fiafia ia Lavea i le leai o sona avanoa na tuuina atu, lea ua mafua ai ona tiga lona loto. E tatau fo’i ona silafia e Lavea ma le Komiti, o ia o le Ta’ita’ifono o le Komiti.

Na faailoa e Fetu ia Titiali’i, na mafua ona taitai e Lavea le iloiloga, ina ua tuai atu o ia i le iloiloga, peita’i na saunoa Titiali’i, e ui na tuai atu, ae sa ia talosaga atu lava ia Lavea mo sona avanoa e faaleo ai ana fesili i le molimau. 

Na avea le le fiafia o le afioga a Titiali’i i le tulaga na tula’i mai ma itu na tula’i ai ma savali i fafo ma le Maota ae o loo saunoa pea le Sui Fofoga Fetalai. Na lalafo e Titiali’i nisi o saunoaga le taupulea ma ia laulau vavale. Sa ia una’i fo’i le faitoto’a ma ulufafo loa.

Na tula’i le Sui Fofoga Fetalai ma mulimuli atu i tua o Titiali’i peita’i na fautuaina o ia e afioga i Faipule ina ia lava lona onosa’i i faafitauli e tutupu mai.

O le taimi lea na toe faasoa ai loa afioga i Faipule e tusa ai o le mataupu faasaga ia Titiali’i, ma faia ai loa le fautuaga ina ia faia se feiloaiga ma le afioga i le Fofoga Fetalai pe a mae’a le tauaofiaga sei tau faatalatalanoa le mataupu.

I le taimi o folafolagaa i le faaiuga o le Tauaofiaga a le Maota, na tula’i ai le afioga a Titiali’i ma faatoese i le Maota e tusa ai o le tulaga na tula’i mai i le taeao ua te’a. Sa ia faatoese faapitoa fo’i i le afioga i le Sui Fofoga Fetalai i ni ona uiga fa’aalia. Sa ia talosagaina le mamalu o sui filifilia ina ia faamagalo ia.

O se fono faapitoa e le i faatagaina sui o le au faasalalau e faalogologo ai, na faataunuuina lea i totonu o le Maota Fono ina ua mae’a le tauaofiaga. 

I lea fonotaga, na fautuaina ai e ni isi o afioga i Faipule Ta’ita’i o le maota ina ia faia se faaiuga faasaga ia Titiali’i e tusa ai o uiga ma amioga o loo maitauina pea i le taimi o galugaega a le Maota o Sui.

Saunoa nisi o afioga i sui matutua o le Maota o Sui e faapea, e le o se taimi muamua lenei ua tula’i mai ai lenei faafitauli i le sui o Saole, o lona lafo lea o ni faamatalaga ma fa’aali uiga ma amioga e ta’u faatauva’a ai le mamalu o le Maota o Sui Fiifilia o le atunu’u.

Saunoa le afioga a Vailoata e faapea, o Titiali’i le isi Tama matua o le Maota, e tatau fo’i ona silasila toto’a i ai le ali’i Faipule i lea tulaga, ona o sui matutua o le Maota e tatau ona afua mai ai faataitaiga lelei, e atagia atu ai le mamalu o le Maota Fono a le atunu’u.

I le faaiuga o le faasoa a afioga i Faipule, na tuuina atu ai loa se fautauga malosi mai le Fofoga Fetalai ma le Sui Fofoga Fetalai o le Maota i le afioga a Titiali’i, ina ia tautuana ma ia le mamalu o le maota. 

Na malilie afioga i Faipule e leai se faaiuga e faia faasaga ia Titiali’i, ae o le a tuuina atu i ai le fautuaga ma le avanoa.

A o le i faia le Tauaofiaga a le Maota, na tula’i mai se feeseeseaiga i le va o le afioga i le Sui Fofoga Fetalai ma le afioga a Titialii i tua i le Fale Samoa a afioga i Faipule. I lea feeseeseaiga, na lu’i ai e Titiali’i le Sui Fofoga Fetalai la te o i fafo la te pa’i lima ai (fusu), ao faafofoga i ai le toatele o Faipule e aofia ai ma le Fofoga Fetalai o le Maota, le tofa Savali Talavou Ale.

A o le i tula’i mai le mataupu i le aso Faraile na te’a nei, sa i ai fo’i le isi mataupu na tula’i mai i le taeao o le Lua i le taimi o le iloiloiga a le Komiti o Mataupu Tau Faamasinoga, lea na molimau ai le afioga i le Loia Sili a le malo ia Fainuulelei Falefatu Ala’ilima-Utu, ina ua faauilavea le afioga a Titiali’i ao tulei saunoa le afioga i le ali’i Faipule ia Lavea, ma tula’i mai ai loa felafolafoaiga o upu i le va o ali’i faipule ao faafofoga le molimau.

I le taimi o le Tauaofiaga a le Maota o Sui i le aso lea, na tula’i ai le afioga i le Sui Fofoga Fetalai ma fautua i le afioga a Titiali’i i le fa’aauau pea lea o uiga o lo o ia fa’aalia i totonu o le Maota.

O le toe amata ai o galuega a le Fono Faitulafono i lenei vaiaso fou, na vaaia ai le usu fiafia atu o afioga i Faipule i le taeao ananafi mo le faatinoina o tiute masani mo lenei Tauaofiaga o lo o nofoia a le Fono Faitulafono.