Pago Pago - AMERIKA SAMOA

I se pepa o fa’amatalaga mai le Ofisa o le Kovana o lo’o fa’ailoa ai e fa’apea o le Aso Faraile, Fepuari 17, 2023, na maua ai le avanoa e feiloai ai le afioga i le Kovana Sili, Lemanu P.S Mauga ma Toa o Samoa i Fort Shafter, i Hawaii ise talanoaga faalautele ma nei alo o le atunu’u i vaega au a le malo tele. 

Na fa’afetaia e le afioga i le ali’i kovana ia Lemanu i latou uma sa auai i le fa’atonuga. Na fa'ailoa e le uso a fitafita ia Alex Lin ia Satini (SGT) Adrianne Paselio o le a fa'au'u mai lona fa'ailoga Bachelor ma ua talia e avea ma ofisa i le Polokalama ROTC a le Hawaii Pacific University (HPU) i Honolulu. 

Na momoli le fa’amalo a le afioga i le ali’i kovana ma na ia ta’ua fo’i e fa’apea, o taumafaiga a SGT Paselio, fa’atasi ai ma le tele o isi alo ma fanau a Samoa, e fa’ailoa ai lo latou naunau e saili ma maua se olaga manuia. E le gata i lea, e le gata o lona igoa o lona aiga ae faapea foi Samoa atoa. 

“E leai se mea e maua fua, o mea lelei uma e faia i faigata, loimata, afu, toto; faaletino ma le mafaufau,” o le saunoaga lea Lemanu. 

Fa’ailoa i le pepa o faamatalaga fesili na tula’i mai i lenei faatasiga:

• Po o iai ni polokalame a le malo po o ni taumafaiga faapitoa mo militeri vetereni poo tagata litaea ua toe foi i aiga ma fia faigaluega mo le Malo o Amerika Samoa?

• Po’o va’ava’ai Amerika Samoa i le umia ma le fa’agaioia o ana va’alele mo femalagaiga i motu fa’apea fo’i ma se alava’a malaga i Hawai’i? E mafai e le Falemeli a Amerika ona faia se nofoaga tutotonu mo le tufatufaina o meli i le itu i sasae o le motu?

• E iai ni fesoasoani po'o ni fa'amalosi'au o lo'o avanoa mai le Matagaluega o A'oga mo o tatou tagata i Amerika Samoa e tapena ma fa'ailoa ai le tupulaga i a'oa'oga 'ese'ese e fa'atatau i le fa'alauteleina o a'oa'oga nai lo le fa'atapula'aina i le militeri?

• Fautuaga mo le Matagaluega o Aʻoga e talimalo i se faʻaaliga e valaʻaulia ai kolisi ma iunivesite eseese e tuʻuina atu i tamaiti aoga maualuga avanoa e suʻesuʻe ai a latou filifiliga.

• Po o iai se lipoti tau tupe a le Malo o loo avanoa mo tagata lautele?

Ina ua ma’ea le fesili mulimuli na faia ai loa se talosaga e fa’amalamalama atili ai le tulaga o sitiseni mo tagata Samoa o lo’o auai i le militeri ona e le o se faiga faigofie e maua ai.

Na tali le afioga i le ali’i kovana ia Lemanu i le tele o fesili i le fa’auluuluga o le latou iloiloga lea e aofia ai le Fa’atonusili ia Malemo Tausaga, Fa’atonusili ia Tuiafono Sua, ma le Fa’atonusili ia Solia Mutini. I le fa’ai’uga, na tu’ufa’atasia le aofia i pesega i le tatalo na saunia e le Fa’atonu Malemo Tausaga.

E fa’ailoa atu e le Samoa News, e le’i ta’ua i le pepa o faamatalaga mai le Ofisa o le Kovana, tali ma tuuina atu e Lemanu i nei fesili.