Fa’atalofa atu i le mamalu o le atunu’u, ae maise o le au faitau i lenei taeao fou, taeao manino, taeao toto’a, ua alafa’i mai ai i le manuia i le alofa ma le agalelei o le Atua. Malo le soifua, malo foi le onosa’i i faiva ma tiute o lo’o feagai ai i lenei aso, ae alo maia, i le tatou Tala Puupuu I le faaiuga o lenei vaiaso.

************************************************* 

“Penina! Suga Penina!”

O le tauvalaau mai lea o le tina a Penina mai I le faitotoa o le fale, aga’I I le faatoaga I tua o le fale.  Ua amata ona alu ifo le la I lona nofoaga I afiafi taitasi.  Ma ua amata ona popole le loomatua o Sosefina po o fea o iai lana tama.

“O fea o iai le teine lea?” O le fesili a Sosefina.  “Suga, Sole, na vaai seisi ia Penina?”

“Pei uma lava na ou vaai o savali aga’I I luga I lona potu,” o le tali mai lea a le tuagane a Penina.

Na savali atu Sosefina ua tu I lalo o le sitepu o le fale ma valaau atu I luga I le mea o iai potu moe o le fale.  “Sosefina!”

Ua fiu lava Sosefina e tauvalaau ae le tali mai seisi, savali loa aga’I I luga o le sitepu Sosefina ma agai sa’o atu lava I le potu moe o Penina.

Ai ona o le sioa o Penina agai i fafo o le faamalama o lona potu moe, aga’I I luga o le lagi I le mea ua amata ona alu a’e ai le masina, sa ia le lagona ai le valaau atu o lona tina.

“Penina!”

“Oi tina, sau fo’I la.  Oka se matagofie!’ o le tali mai lea a Penina.

“O le a le mea o lo’o e tilotilo ai?” o le fesili lea a Sosefina ma nofo atu I tafatafa o Penina.

“Vaai i le masina ma fetu, ma le lafoia o le malamalama i luga o le auvai.  Pe aisea ou te faalogoina ai se lagona toafilemu I lo’u tilotilo atu iai” o le tala lea a Penina.

Sa tali atu le tina o Penina, “Ona sa fausia e le Atua mea uma.  Ua Ia fausia mea lelei uma mo le tagata.”

“O le a le aoga o le masina ma fetu ia te a’u?” o le fesili lea a Penina.

“Sa e fai mai a e tilotilo I le ata lafoia o le masina ma fetu I luga o le auvai, e te lagona le fiafia,” o le tali lea a le tina a Penina.  “E aoga foi le masina e na te faamalamalamaina le ala pe a alu I fafo I le pogisa.  O mea uma nei, sa faia e le Atua mo o tatou tino ma o tatou agaga.  E le gata ina aoga le masina ma fetu e faamalamalamaina ai o tatou ala, ae faapea foi ona faato’afilemu ma faafiafia ai o tatou agaga”.

Sa umi se taimi o nofonofo le tamaitai o Penina ma si ona tina I tafatafa o le faamalama ma tilotilo aga’I I le lagi I le masina ma fetu ma fa’agasolo o la mafaufauga I le mamana ma le matagofie o galuega a le Silisili Ese.

IA MANUIA LE SAUNI ASO MO SAPATI I LE FAAIUGA O LENEI VAIASO!