Ads by Google Ads by Google

Fesiligia e senetoa mataupu eseese e fa’atatau i le soifua maloloina o le atunuu


[ata: foa'i]

Pago Pago - AMERIKA SAMOA

 

O le faateleina o le numera o tagata maliliu i le teritori - faatasi ai ma le 36 ia Ianuari o i latou ua maliliu ona o le tulaga fa’aletonu o le soifua maloloina o le olaga - o le autu lea o le iloiloga a le Maota Maualuga i le vaiaso talu ai.

 

O atugaluga nei na fa’aleo e le Peresetene o le Senate ia Tuaolo Manaia Fruean i le Matagaluega o le Soifua Maloloina (DoH) i le iloiloga i le taeao o le aso Faraile ua te’a. 

 

Na fesili Tuaolo i foma’i pe o i ai ni su’esu’ega sa faia e le DoH i le tulaga o le soifua maloloina i le teritori, ona e foliga mai o le to’atele o tina ua maua i le kanesa faatoa iloa ua maua i latou i le kanesa i le tulaga e le mafai ai ona togafitia.

 

O i latou sa auai i le iloiloga i le taeao o le Aso Faraile, o le faatonu o tutua (Clinical Service) Dr Elizabeth Lauvoa, Fa’atonu Fomai Lagolago Dr Saipale Fuimaono, Fa’atonusili o le Soifua Maloloina, v Motusa Tuileama Nua ma Scott Enesi o lo o va’aia le Vaega a le DoH Epidemiology Division.

 

Saunoa Tuaolo e fa’apea, o lo o vaaia le taumamafa o fanau i meaai le lelei ma le paleni e fai ma o latou malu taeao, ma e tatau ona i ai ni polokalame e taofia ai lea ituaiga o taumafa leaga, ma ia a’oa’oina ai matua i le mata’utia o taumafa leaga, e le o se mea e ofo ai le lapopoa o fanau i le teritori.

 

Na ioe le Faatonusili o le Soifua Maloloina i le finagalo o Tuaolo. Ta'ua e mana'omia le tele o su'esu'ega o le kanesa, a leai e iloa e tagata gasegase ua tuai tele ma ua sosolo le kanesa.

 

Fa’ailoa e Dr Lauvao, na faia e le DoH se suʻesuʻega i tua i le 2004, ma le suʻesuʻega lona lua i le 2018 e faʻatatau i faʻamaʻi le pipisi (poo le NCD) ma le kanesa.

 

O le suʻesuʻega na faʻaalia ai o nisi tagata na faatoa iloa i le taimi lena o loʻo maua i latou i le toto maualuga ma le suka, o isi na mumusu e talia le mea moni o loʻo mamaʻi ma tumau i le faʻafitia, latou te le inu a latou vailaʻau faʻatonu.

 

E o’o fo’i i su’esu’ega o le kanesa, e le to’atele tagata e manatu o se fa’amuamua lea, o le fa’amalamalamaga lea a Dr Lauvao.

 

Fai mai a ia, o le suʻesuʻega na oʻo atu ai i le sauniunia o polokalame o fuafuaga faʻataʻitaʻi o loʻo faʻalauiloaina nei. Faaalia e Dr Lauvao, e tai lima tausaga e faia ai suesuega ma o le tausaga nei e toe faia ai se isi suesuega o le soifua maloloina.

 

O le isi mataupu na taua e le Peresetene o le Senate, o taumafa o lo o maua i le motu. Sa ia fesiligia le mafua’aga ua ala ai ona le toe talosaga le DoH i le ali’i kovana, ina ia taofia le fa’atauina mai o aano o manufasi e le lelei mo le soifua maloloina, e pei o le si’usi’u o le pipi.

 

Faaalia e Dr Lauvao o le suesuega talu ai na iloa ai e le o aai tagata i meaai maloloina pe paleni ma ua suia mai le taumafaina o fua fou po o fualaau faisua i le taumafaina o aano o manu.

 

O le isi tulaga leaga o lo’o a’afia ai le NCD o le ulaula tapaa ma o lo’o latou fa’ailoa mai se isi si’itaga o lafoga mo sikaleti e taofia ai tagata mai le ulaula tapa’a. O lenei fuafuaga o le a tuʻuina atu mo le iloiloga ma le faʻamaoniga a le Maota Maualuga.

 

Saunoa le afioga i le ali’i senatoa ia Malaepule Fuega Moliga e fa’apea, ua suia le olaga i le taimi nei, lea e le mafai e fanau i aso nei ona ‘ai esi ma le popo, e pei o le faitau aofa’i o tagata matutua pe afai e avatu na’o le fa’i ma le koko samoa, e le fiafia, o lea e mana’omia ai le toe to’a’i toto’a i ai. polokalame faalauiloa.

 

I taimi o sauniga a le aiga, o mea'ai e tu'uina atu e aofia ai fasi-puaa, fasi-povi. E mana'omia le suia o mafaufauga o tatou tagata e ala i le fa'alauiloaina o taumafa paleni.

 

Na ia ta’ua atili le a’afiaga o le tamaoaiga pe a aga’i atu le malo e fa’asa meainu suamalie, o le a pa’u tupe maua mai lafoga.