Ads by Google Ads by Google

Fesiligia Faipule le mafua’aga ua le avatu ai tupe mai fafo e faamaonia Fono


Afioga i Faipule i le taimi na lulu aao ai ma le Peresetene o le Faletupe o Atina’e a le malo ia Ruth Matagi Faatili i le mae’a ai o se iloiloga sa faia i le vaiaso na te’a nei [ata AF]
ausage@samoanews.com

Pago Pago, AMERIKA SAMOA

 

O le iloiloga lea na faataunuuina i luma o le Komiti o le Paketi ma le Tupe Faasoasoa a le Maota o Sui, ma le Teutupe a le malo i le vaiaso na te’a nei, na fesiligia ai e afioga i Faipule le mafua’aga ua le tuuina atu ai tupe faameaalofa mai le malo feterale e faamaonia mai e le Fono Faitulafono, e tusa ai ma le Tulafono o loo puipuia ai tulaga o soo se tupe fou lava e ulufale mai i totonu o le faigamalo.

 

O molimau na fesiligia i lenei iloiloga e aofia ai le Teutupe a le malo ia Ueligitone Tonumaipea ma le Faatonusili o le Ofisa o le Paketi a le malo ia Catherine Saelua. O le iloiloga na taitaia lea e le afioga i le alii Faipule ia Vailiuama Steve Leasiolagi o le Ta’ita’i Komiti.

 

Na faatulaga le iloiloga ina ia faamanino ai i afioga i Faipule le aofa’i atoa o le tupe faameaalofa lea na maua mai e le malo o Amerika Samoa mai le malo feterale, a o feagai ai le lalolagi ma le faama’i oti o le KOVITI-19 e pei ona iloa ai e le to’atele.

 

Na taua e le Teutupe a le malo i lana folasaga e faapea, e tusa ma le $164.6 miliona le aofa’i atoa o le tupe faameaalofa ua mafai ona maua mai e le malo o Amerika Samoa mai le malo feterale talu mai le masina o Me o le tausaga nei seia oo mai lava i le taimi nei.

 

Na faamanino atili e le Teutupe a le malo e faapea, o lenei vaega tupe tele ua mae’a ona tufatufa atu i Matagaluega ma Ofisa eseese o le malo mo le fa’aaogaina. Na tauaao faatasi mai e molimau ma ni ripoti o loo faamaonia ai le tufatufaina atu o lenei vaega tupe i vaega eseese o le malo, atoa ai ma le totogiina o itula ova taimi atoa ai ma tagata faigaluega o loo galulue mo le puipuia o le atunu’u i lenei fa’ama’i.

 

O le afioga i le ali’i Faipule mai Tualauta ia Larry Sanitoa na ia fesiligia le Teutupe i le mafua’aga ua ala ai ona le tuuna mai nei vaega tupe i totonu o le Fono mo lona faamaonia e tusa ai ma le tulafono. 

 

A o le i tali mai le Teutupe, na muamua saunoa le Ta’ita’i Komiti ia Vailiuama ma faamanino e faapea, sa i ai se fonotaga faapitoa a le Kovana ma Ta’ita’i o le Fono Faitulafono mo le talanoaina o lenei mataupu, o le mafuaaga lena ua taofia ai le tuuina mai o nei vaega tupe tetele i totonu o le Fono Faitulafono.

 

Ina ua maua le avanoa o le Teutupe, sa ia taua ai le tali lava fo’i lea e tasi na saunoa i ai le afioga i le ali’i Faipule ia Vailiuama, ona sa talanoaina i se fonotaga faapitoa a le Kovana ma Ta’ita’i o le Fono Faitulafono.

 

E le i nofo filemu i le finagalo o Sanitoa tali sa tuuina atu. Saunoa Sanitoa e faapea, o loo manino lava le Tulafono i soo se tupe fou lava e ulufale mai i le malo, e tatau lava ona tuuina atu i le Fono Faitulafono e faamaonia mai ai lona fa’aaogaina. 

 

O le mea moni lava e pei ona saunoa Sanitoa, ana faamalie le Tulafono e faatatau i tupe faameaalofa nei, e leai lava se faipule o le Fono na te toe fesiligia le tele o galuega lelei ma atina’e ua amata ona faatutu e le malo ona o nei mau seleni faameaalofa.

 

Na fesiligia fo’i e Sanitoa le tiute tauave o le Komiti Faapitoa lea ua tofia e vaavaaia le faaaogaina o tupe faameaalofa, poo mulimulita’i i lalo o ta’iala na tuuina mai ai.

 

Saunoa Sanitoa e faapea, o le tiute tonu lava lea o le Komiti Faafoe lea na mafua ai ona filifilia i latou, ia mata’ala i auala o loo fa’aaoga ai e vaega eseese uma lava a le malo tupe faameaalofa nei, ina ia aua ne’i toe aafia ai le malo i se taimi mulimuli ane ai.

 

Na ia faafetaia le malo ona o le fuafuaga e aofia ai ma Aoga Tua i faamanuiaga tau tupe ua tufatufaina atu i aoga uma a le malo. Saunoa Sanitoa e faapea, e tatau ona faamalamalama lelei i Aoga Tua nei auala talafeagai e fa’aaoga i ai tupe nei.

 

Saunoa le Teutupe a le malo e fa’apea, ua mae’a ona tauaao atu ta’iala i Aoga Tua uma lava ua faamanuiaina i lenei vaega tupe, ina ia mulimulita’i i ta’iala mo le fa’aaogaina o nei seleni.

 

Saunoa le afioga i le ali’i Faipule mai Manu’a #1 ia Vesi Talalelei Fautanu Jr e faapea, afai ua faaaoga e le malo tupe nei e faatupe ai malaga a va’alele o loo la’u mai ai tagata mai Samoa i Amerika Samoa nei, faapea ai fo’i ma tagata faigaluega a le malo o loo aga’i atu i Manu’a, e tatau fo’i ona agavaa ai ma le totogi o pasese o tagata o le itumalo o Manu’a o lo o fia malaga mai i Tutuila nei i le taimi lenei o puipuiga o le fa’ama’i.

 

Na faamanino e le Teutupe e faapea, o lo o aofia i le ripoti vaega tupe ua mae’a ona fa’aalu e totogi ai va’alele mo le auina atu o tagata faigaluega a le malo latou te faatinoina galuega mo Manu’a, ae afai o se tagatanu’u lava ia o Manu’a e fia malaga mai i Tutuila nei, e le agava’a la ona totogi lona pasese i lalo o vaega tupe nei, ae tatau ona totogi lava e le tagata Manu’a lona pasese.

 

E 2 ripoti eseese ua taulimaina e le Fono Faitulafono. O le ripoti muamua na tuuina mai i le aso 15 o Iuni, lea o lo o taua ai le aofaiga o le tupe faameaalofa mai le malo feterale e $155 miliona, ae o le ripoti lea na faatoa tauaao mai i le Fono i le vaiaso na te’a nei, o lo o taua ai le aofaiga o le tupe faameaalofa mai le feterale e $164.6 miliona.

 

Na fesili fia malamalama le Faipule mai le itumalo o Fofo, afioga Andra Theresa Samoa i le mafua’aga ua eseese ai le aofa’i o tupe ua i luma o le Fono Faitulafono, poo le mea ea e eseese vaega tupe nei mai le malo tele.

 

Na faamanino e le Teutupe a le malo e fa’apea, e ui e eseese ripoti ae tasi lava le alagatupe o loo taua mai ai. I le aso 15 o Iuni, 2020, e tusa ma le $155 miliona le tupe ua tauaao mai e le malo o Amerika Samoa mai le malo feterale, ae i le vaiaso na te’a nei, ua faaopoopo ai le aofa’i o le tupe i luga i le $164.6 miliona, ona e i ai alagatupe fou o lea faatoa taunu’u.

 

Na faafetaia e le afioga i le ali’i Faipule ia Timusa Tini Lam Yuen le malo feterale ma lenei vaega tupe tele ua ofo mai i Amerika Samoa. I lona talitonuga, o se faamanuiaga tele lenei mo le malo ma ona tagata, ma, e tatau fo’i la i le malo ma tagata ona fa’aaoga tatau.

 

Na taua e TImusa le tele o faasea ma faitioga e faatatau i le totogi o tagata faigaluega ma ova taimi i taimi o le faama’i, atoa ai ma le mana’omia o ni tupe fou mo le vaega o lo o tausia le soifua maloloina o le atunu’u. Ae i le vaavaai atu ai i le ripoti, e tetele naua vaega tupe a le Matagaluega o le Soifua Maloloina ma le Falema’i o le LBJ na maua ae le i fa’aaogaina.

 

Mo se fa’ata’ita’iga, e $6.6 miliona le vaega tupe na maua e le Matagaluega o le Soifua Maloloina, ae na o le $332.633 ua mae’a ona fa’aaoga, ae $6.3 miliona le tupe o loo totoe e le i fa’aaogaina.

 

O loo taua ai i le ripoti lea ua i luma o le Fono vaega tupe ta’i $10,000 mo Faipule ma Senatoa faapea ai ma le ta’i $20,000 mo ta’ita’i o le fono. O loo aofia ai fo’i le vaega tupe e $500,000 na foa’i atu mo le Vaega o Faamasinoga,

 

[O le a toe fa’aauau atu i le isi lomiga a le Lali isi vaega o le ripoti atoa ai ma i latou na faamanuiaina i lenei vaega tupe tele mai le malo feterale]