O le itula e 9:00 i le taeao nei lea ua toe tolopo mai i ai se iloiloga sa faia i le vaiaso na te’a nei, e fa’atatau i le mataupu i se ali’i ua mae’a ona ia totogiina le $3,000 e tatala ai o ia i tua e fa’atali ai lana mataupu, e ui o lea sa poloaina le taofia o ia i le toese e aunoa ma se tupe e totogi.

Ua fa’atonuina e le afioga i le ali’i Fa’amasino Sili ia Michael Kruse le loia a le malo ia Christy Dunn ina ia oo atu i le taeao nei, ua manino i le fa’amasinoga le mafua’aga na tatala ai i tua Falaniko Fetoai e ui o lea o loo taoto le faaiuga e taofia ai o ia i le toese i Tafuna e aunoa ma se tupe e tatala ai o ia i tua.

O le aso Faraile na te’a nei na tula’i ai Fetoai i luma o le Fa’amasinoga Maualuga, ona o se talosaga a le malo e poloaina ai le fa’amasinoga e fa’aleaoga tuutuuga o loo tatala ai o ia i tua, ae taofia loa o ia i le toese e aunoa ma se tupe e fa’atulaga.

Na faailoa e Dunn i le fa’amasinoga e fa’apea, o Fetoai o loo tuuaia i le moliaga mamafa o le faaoolima i le tulaga muamua, atoa ai ma isi moliaga feololo, e mafua mai i se fa’alavelave na manu’a ai se fafine ina ua a’afia i le ta’avale sa ia fa’afoeina i le masina o Novema o le tausaga na te’a nei.

O se tasi o tuutuuga o loo tatala ai o ia i tua, o le aua lea ne’i ona toe solia se tulafono a le malo.

I le masina na te’a nei, na faila ai e le malo la latou tagi fou fa’asaga ia Fetoai, ona o se fa’alavelave o loo tu’uaia na a’afia ai o ia, lea o loo tu’uaia ai o ia i moliaga mama e 2 o le faaoolima i le tulaga tolu atoa ai ma le faatupu vevesi i nofoaga faitele.

Na faailoa atili e le loia a le malo i le fa’amasinoga i le vaiaso na te’a nei, le sauni o Leoleo e toalua e molimau i luma o le fa’amasinoga e tusa ai o le siosiomaga o le mataupu fou lea ua tuuaia ai Fetoa’i.

Na finau Dunn e fa’apea, afai e tusa ai ma le finagalo o le fa’amasinoga, ia faaleaoga le poloaiga na totogi ai e le ua molia le $3,000 e tatala ai o ia i tua, a ia taofia loa o ia i le toese e aunoa ma se tupe fa’atulaga, pe toe faaopoopo fo’i e le fa’amasinoga le aofaiga o le tupe e tatala ai o ia i tua, e fa’atali ai taualumaga o lana mataupu.

Na matua tete’e le loia a Fetoai i le talosaga a le malo. Na taua e le tama’ita’i loia fautua ia Kate Hannaher e fa’apea, o tu’uaiga fou fa’asaga ia Fetoa’i e pei ona finau mai ai le malo, ua na o ni tu’uaiga lava, e le i mafai e le fa’amasinoga ona fa’amaonia ia tu’uaiga.

Na faailoa e Hannaher e fa’apea, o le mataupu fou lea ua tuuaia ai le ali’i o loo ia tauaveina i luma o le Fa’amasinoga Fa’aitumalo, o lo o matua tete’e i ai Fetoa’i. Afai ua sauni le malo e tuuina atu a latou molimau i luma o le fa’amasinoga e lagolago ai la latou tagi, ua sauni fo’i le itu tete’e e tuuina atu a latou molimau i luma o le fa’amasinoga e lagolagoina ai la latou talitonuga tete’e, e le moni tu’uaiga e pei ona faia fa’asaga ia Fetoai.

Na talosaga Hannaher ina ia fa’amalumalu e le fa’amasinoga le tuuina mai o sana fa’aiuga i lenei mataupu, ae fa’atali sei fa’ataunuu muamua le faamasinoga autu a Fetoai i luma o le fa’amasinoga fa’aitumalo, ona manino ai loa lea iina o le mea moni sa tupu.

A o le i faia le faaiuga a Kruse e toe tolopo ai le iloiloga e toe fofogaina i le taeao nei, na faailoa e Kruse i le loia a le malo se mataupu o loo nenefu ai le finagalo o le fa’amasinoga.

O lea mataupu e pei ona saunoa le afioga i le ali’i Fa’amasino, o lea ua finau le malo e fa’aleaoga le poloaiga o loo tatala ai i tua Fetoai, ae i totonu o le faila o loo i ai fa’amaumauga i taualumaga atoa o le mataupu a Fetoai, amata mai le taimi o lana ulua’i tula’i i luma o le Fa’amasinoga Fa’aitumalo seia oo ina tofu atu i luma o le Fa’amasinoga Maualuga lana mataupu, e le o taua ai se poloaiga e tatala le ua molia i tua i le $3,000.

“Pau le faaiuga lea o loo i luma o i matou nei ma afioga i Fa’amasino Lagolago sa tuuina mai e le Fa’amasinoga Fa’aitumalo, ia taofia Fetoai i le toese e aunoa ma se tupe e tatala,” o le saunoaga lea a Kruse.

“O le a le mea ua tupu lau susuga a le loia mo le malo. O lea e molia le alii lea i le moliaga pito sili ona mamafa o le faaoolima i le tulaga lua, atoa ai ma le poloaiga e taofia ai i le toese e aunoa ma se tupe e totogi. Ae o le isi itu o le faila lea o loo faapea mai e totogi le $3,000 e tatala ai. O ai na faia lea suiga,” o le fesili fia iloa lea a Kruse.

Ae na taua e le loia a le malo, e foliga mai sa i ai se fa’aletonu i fa’amaumauga e pei ona i luma o le fa’amasinoga.

“O ai na mafua ai lea fa’aletonu,” o le fesili tuli tatao lea a Kruse. Ae na tali le loia a le malo, “Ou te le iloa poo ai na mafua ai lea fa’aletonu, ae pei lava o se tasi mai le Fa’amasinoga.”

Talu ai le saunoaga a Dunn, na poloaina ai loa e Kruse le loia a le malo e valaau le Failautusi a le Fa’amasinoga e fa’atauto mo lana molimau.

Na taua e le Sui Failautusi a le fa’amasinoga ia Crystal Solofa, na te le iloa se fa’amatalaga e uiga i le mataupu a Fetoa’i, ona e taunuu atu lana faila i luma o le fa’amasinoga maualuga, ae o le taimi lea ave ai ona aso malolo fa’a le galuega.

Talu ai le le fa’amalieina o le finagalo o Kruse i lenei mataupu, na ia poloaina ai loa Fetoai ina ia toe oo atu i luma o le fa’amasinoga i le taeao nei, sei tau saili poo ai na faia le faaiuga e totogi ai le $3,000 e tatala ai o ia i tua.