Pago Pago - AMERIKA SAMOA

Na pau le auala e taofia ai le faia o le falema’i fou lea ua fuafuaina i Tafuna ia Kovana Lemanu P. S. Mauga o le faila lea e le Komiti Fa’afoe o le LBJ se talosaga taofi i le Fa’amasinoga.

O le saunoaga lea a le Peresetene o le Senate ia Tuaolo Manaia Fruean.

O lea mataupu na laga i le tauaofiaga a le Senate i le aso Lulu na te’a nei, e le taitaifono o le Komiti o le Falema’i/Soifua Maloloina a le Senate, le afioga i le senatoa ia Tuiasina Dr. Salamo Laumoli, na ia fa’aalia ai lona popolega i le umi o le taimi ua mavae talu ona pasia se iugafono a le Fono ma ma tuuina atu i le kovana ina ia talia le fautuaga a le US Army Corps of Engineers, ina ia toe fa’aleleia le LBJ Medical Center nai lo le fausia o se fale fou.

“O se mataupu e sili ona ogaoga ona e aafia ai olaga o tagata,” o le faamamafa lea a le afioga i le alii senatoa ia Tuiasina. “O tagata o lo o a’afia i gasegase tigaina ma o lo’o mana’omia se togafitiga fa’anatinati o lo’o fa’atalitali mo se tali mautinoa i lenei mataupu taua ae e le’i tali mai lava le ali’i kovana.

“O se falemai o se eleele paia mo e mama’i, o se nofoaga e tatau ona mama, o se nofoaga e sulufai i ai i latou ua lavea ma maliliu.

“E le tatau ona tatou faatagaina polokiki e taofia ai taumafaiga e faaleleia atili lana tausiga ma auaunaga o loo ofoina atu mo tagata o lenei teritori. I se faaupuga tuusao, e le tatau lava ona aafia i faiga faaupufai.”

Na faaalia e le afioga i le alii senatoa e faapea, sa latou faia se talanoaga ma le taitaifono ma sui o le Komiti Faafoe o le falema’i o le LBJ, ma ua latou toe faaleoina ai ona popolega, ma o lo o latou faatali pea i le tali a le alii kovana.

Na ia toe ta’ua o lenei mataupu e sili ona taua ona o le soifua o tagata ua lamatia.

“E tatau lava ona i ai se fa’amalamalamaga manino i so’o se finagalo o le ali’i kovana e fa’atatau i lenei mataupu taua, aua o lo o fa’atali tagata ma e fa’alagolago lava o latou ola i lana fa’aiuga,” o le saunoaga lea a Tuiasina.

Ona tu’u sa’o atu ai lea e Tuiasina se talosaga i le Peresetene o le Senate, ma ia fautuaina ai le Senate e talosagaina se feiloaiga fa’asaga ia te ia ma le ali’i kovana, ina ia mautinoa ai lona tulaga e tusa ai o lenei mataupu, ma saili ai se auala e aga’i ai i luma so’o se fa’aiuga ua faia.

“O le tulaga o le Senate i lenei mataupu ma lana fautuaga ua tuuina atu i le alii kovana,” o le tali lea a Tuaolo. “Tatou te le mana’omia se feiloaiga faafesagai ma ia. O lana valaau lena.”

“Afai na te manatu e le amanaia le matou fautuaga ae fa’aauau le fausiaina o le falema’i fou i Tafuna, pau le isi auala e taofia ai o ia, o le faila lea e le Komiti Fa’afoe o le LBJ se talosaga taofi i le Fa’amasinoga”.

O le I’ugafono a le Senate ua mae’a ona pasia ma tuuina atu i le ali’i kovana, ua fautuaina ai le kovana ma le malo o Amerika Samoa, “ia mulimulitai i fautuaga a le tatou foma’i i totonu o le atunu’u, ma fa’asoa atoa le $300 miliona o tupe faavae a le American Rescue Plan Act (ARPA) i totonu o falema’i mo le soifua maloloina. LBJ Tropical Medical Center ma lagolagoina a latou taumafaiga ina ia mulimulitai i fautuaga a le US Army Corps of Engineers ina ia toe faafou ma faaonaponei le fale o loo iai nei i le LBJ nai lo le fausia o se falemai fou”.

O pei ona lipotia muamua i se taimi ua tuana’i, i le mae’a ai ona faia e le ali’i kovana ma le ASG o le latou fa’aiuga e fa’aagaaga tupe mo le falema’i fou i Tafuna, ma i le lotolotoi o fa’amatalaga eseese e fa’atatau i lea fa’aiuga, na fa’atonuina ai loa e le ali’i kovana le fa’atulagaina o se Soa Komiti Fa’afoma’i e va’ava’ai i le mataupu ma ripoti atu ai i latou sa maua.

O le fautuaga a le Soa Komiti Fa’afomai, ina ia fa’aaoga tupe mai le ARPA e toe fa’alelei ai le LBJ.