Pago Pago - AMERIKA SAMOA

Na fa’aalia e le afioga i le Fofoga Fetalai o le Maota o Sui, le susuga Savali Talavou Ale, lona faanoanoa i le faamalamalamaga a le afioga i le Kovana Sili,  le susuga Lemanu P. S. Mauga, i le mafuaaga na ia taofia ai faatonusili ma ulu o ofisa a le malo -  e ui sa mo sina taimi pu’upu’u, ona – ona auai atu i iloiloga a le Maota o Sui, e pei ona samania ai i latou.

I sana tusi na tusia I le aso 10 o Aperila, sa faaooina atu I le kovana, na taua ai e le afioga i le Fofoga Fetalai, e ui ua mae’a ona soalaupuleina lenei mataupu, ae peitai, o lo o iai pea sona atugaluga i lenei mataupu.

Na ta’ua e le susuga Savali, talu mai le faavaeina o le malo, sa iai se fa’aaloaloga i le galulue faatasi o lala e tolu a le malo, e faavae i luga o tu ma aganuu faapea le tulafono.

Sa ia toe faamanatu atu I le kovana, e mafua ona iai tulafono o ‘siaki ma paleni’ ina ia mafai ona faatutusa pulega I le va o lala eseese o le malo.  Ae peitai, na fa’aalia le agaga faanoanoa o le afioga i le Fofoga Fetalai ona ua avea le faatonuga a le kovana ma pa pupuni i lea agaga o le galulue faatasi.  Ma i sona talitonuga, o se tulaga e le tatau ona laasia e soo se tasi, i soo se lala o le malo.  Ma ia talosagaina ai le faatumauina o fesootaiga ae e le’i toe uia ia ituaiga auala.

Sa toe faamanatu atu foi e Savali, o le mafuaaga ua le toe uia ai e le Maota o Sui auala e faamalosia ai le auai mai o taitai o le malo, e ala i le faamasinoga (subpoena), ona o lo o fa’aauau pea ona tali mai talosaga a le Maota o Sui.  Ma o le mafuaaga lea o le galulue faatasi o lala eseese o le malo, ona o le lelei o tulaga o fesootaiga.  Ma sa ia ta’ua foi, o le a fa’aauau pea ona faamalieina le Maota o Sui i le uia o lea lea auala.

Na fa’aalia e le afioga i le Fofoga Fetalai, i totonu o lana tusi, lona agaga faafetai ona ua toe ave’esea e le kovana sili lana faatonuga e taofia ai le toe auai mai o lana kapeneta i iloiloga o totoe a le Maota o Sui, ona o lo o iai pea ni pili a le Fono ma le Faigamalo o lo o manaomia ona soalaupuleina.

Na ia fa’aalia le agaga faafetai i le galulue faatasi o lala a le malo ua i’u manuia ai nisi o mataupu ma sa ia ta’ua ai foi le iai o nisi o lu’ita’u o le a tula’i mai foi i iloiloga o lo o fuafua mo le masina o Iulai, ae o lo o maualuga lona faatuatuaga o le a mafai ona galulue faatasi lala uma o le malo aua se sailiga o se manuia.