Pago Pago - AMERIKA SAMOA

Ua taoto nei i luma o le afioga i le Fofoga Fetalai, ia Savali Talavou Ale, se talosaga mai i le Komiti Faafoe o Faatonusili a le LBJ, mo le ave’esea o le afioga i le Faipule ia Lua’itaua Gene Pan, mai totonu o le Komiti o le Soifua Maloloina a le Maota o Sui, ona o ni uiga fa’aalia a le faipule i se iloiloga sa faataunuuina i ni nai vaiaso ua tuanai.

E tusa ai ma faaupuga o le tusi mai i le LBJ, i le aso 22 o Ianuari 2024, lea sa mafai ona maua mai e le Samoa News se kopi, o lo o ta’ua ai e le komiti faafoe a le maota gasegase autu a le malo, e faapea, sa auai le afioga i le Faipule i le iloiloga sa faataunuuina ma sana fuafuaga ina ia si’itia ai lona tulaga faalemalo i lenei tausaga palota, e ala i le faamatagaina o le falemai, o lana komiti faafoe faapea ma ana tagata faigaluega.

E lima ni mataupu autu sa talanoaina i le iloiloga lea a le Maota o Sui lea sa faataunuuina i le aso 19 o Ianuari, 2024 ma e toalima (5) ni molimau mai i le falemai na auai ai; o le fa’atonusili a le falemai ia Dr. Ledua Akapusi, o le taitaifono o le Komiti Faafoe ia Dr. Malouamaua Tuiolosega, o Dr. Jean Anderson lea o lo fa’auluulu iai le ofisa o galuega faatino a le falemai, o le ulu o le Ofisa o Tupe (CFO) a le falemai ia Senafanaia Kaumaitotoya faapea le tina ia Veronica Gasio lea o lo o faauluulu iai le ofisa inisia a le falemai.

O le taitaifono a le komiti o le soifua maloloina a le Maota o Sui, o le afioga i le Faipule ia Manumaua Wayne Wilson, ae o le afioga i le Faipule ia Lua’itaua, o se tasi o totino o lenei komiti.

Ma o mataupu e lima (5) sa talanoaina i lea iloiloga, na aofia ai potu tipitipi (OR) ma le ER, o le lipoti mo le kuata muamua, o le tulaga o afi a le falemai, o le tulaga o le fale a le EMS, faapea ma tulaga i le tautua i tua atu o itula faatulagaina a le falemai.  O lo o talitonu le Samoa News, sa tau’a’aoina e le taitaifono o le komiti a le Maota o Sui, ia faamaumauga o nei mataupu uma, ae e le i o’o i le aso o le iloiloga, na aofia ai ma lipoti faalekuata faapea tala o tupe.

Ae ua ta’ua i totonu o le tusi mai i le komiti faafoe a le falemai i le afioga i le Fofoga Fetalai, o amioga sa fa’aalia e Lua’itaua i le aso o le iloiloga e lagolago ai ana fa’asalalauga ia o lo o tu’uina i luga o “Api o Foliga” (Facebook) e fa’asagatau i taitai ma le pulega a le falemai.  O lo o ta’ua foi i le tusi a le komiti faafoe a le falemai e faapea, i aso luma mai ae le i o’o i le aso o le iloiloga sa fa’asalalauina ai e le afioga i le Faipule ia Lua’itaua ia sana fuafuaga e otegia pe fa’asea i taitai o le falemai.

O lo o ua ta’ua foi i le tusi mai i taitai a le falemai e faapea, o lo o fa’aauau pea ona fa’asalalau e le afioga i le Faipule i luga o a’upega tafa’ilagi ia le le mulimulita’i o taitai ma le pulega a le falemai i tulafono o tauofoga ma faatauga, faapea tulafono e faatau i konakarate o lo o tufatufa iai galuega a le falemai.

E le gata i lea, o lo o ta’ua i fa’asalalauga a Lua’itaua le tatau ona fa’ate’aina ia le CFO faapea ma le komiti o faatonusili a le falemai, ona o tulaga e pei ona ia ta’ua.

Ma o lo o ta’ua i totonu o le tusi mai i le pulega a le falemai e faapea, o le laina lava lea e tasi na agai iai fesili ma suesuega a le afioga i le Faipule i le taimi o le iloiloga a le Maota o Sui, e fa’asaga tau i le CFO e tusa ai ma tauofoga o konakarate lea o lo o manatu Lua’itaua, ua solia e le CFO tulafono o tauofoga e ala lea i le tu’uina atu o galuega a le falemai i le to’alua o lona tuafafine.  Ae peitai, e pei ona ta’ua i totonu o le tusi a le falemai, o le mafua’aga tonu lava lea na le auai ai le CFO i le filifiliga o konakarate mo galuega a le falemai.  Ma ua talitonu le komiti faafoe a le falemai, o tu’uaiga e pei ona faaleoina e Lua’itaua, o se taumafaiga e taufaaleaga ai le CFO a le falemai.

Ua faapea foi ona ta’ua i totonu o le tusi a le falemai e faapea, o lo o tu’uaia foi e le afioga i le Faipule, ia le falemai i le solia o tulafono o le saogalemu, i le taimi na faapipi’i ai le afi fou a le falemai, e ala lea i le fa’aaogaina o se masini (crane) e faapipi’i ai se afi (containerized generator) i tafatafa o uaea eletise.

O se tu’uaiga ua fa’ailoa mai e le pulega a le falemai i totonu o le latou tusi, e sese.  Ua ta’ua e le pulega a le falemai, na mae’a ona faia se su’esu’ega a le ASPA i le nofoaga o lo o ua iai nei le afi fou ma na pasia mai e le ASPA le saogalemu o lea nofoaga mo le tu’uina iai o le afi fou.

Ua ta’ua e le pulega a le falemai, o le ata lea sa fa’aaogaina e le afioga i le Faipule e fa’amautu ai ana tu’uaiga, sa pu’eina i se auala, e foliga mai ai o lo o latalata ia uaea eletise i le nofoaga o iai le afi fou.

E le gata i lea, o lo o ta’ua foi i totonu o le tusi a le pulega a le falemai, lea sa sainia e le Faatonusili, CFO, o le sui pule o le ofisa Inisinia ia Rudolph Bartley, Lt. Colonel (ret.), USAF, Faatonusili o le ofisa e mataituina le tausiga o le falemai, Command Master Chief (ret.) USN, e faapea, e tusa ai ma lipoti ua o’o atu i le pulega a le falemai, o lo o feso’ota’i ia le afioga i le Faipule ma nisi o le aufaigaluega a le falemai, e aunoa ma se faatagana mai ia i latou.

O lo o ua iai se talitonuga i le pulega a le falemai, o lo o u’unaia e le afioga i le Faipule ia nei tagata faigaluega a le falemai, ina ia o latou solia tulafono patino i o latou tiute,  e puipuia o mataupu lilo a le falemai, ona o lipoti po o faamaumauga uma o lo o manaomia e le afioga i le Faipule, e mafai ona ia mauaina e ala i se tusi talosaga pe mai i le Faatonusili a le falemai.  Ae peitai, ua talitonu le pulega a le falemai, ua filifili le afioga i le Faipule e fa’aaoga tagata faigaluega a le falemai e auala mai ai ana lipoti mo ana lava fuafuaga.

Ua talitonu le pulega a le falemai, ua avea uiga fa’aalia a le afioga i le Faipule ma tulaga ua ta’uvalea ai le Maota o Sui faapea tiute a le fono faitulafono, e ala lea i lona ta’alo i le igoa lelei a le falemai, ma taumafai e fa’afoliga mai e le o saunia ma leai se atamai i le pulega ale falemai, e ala i mataupu e le i aofia i totonu o mataupu sa amia ai i latou.

Ma o lea na talosagaina ai e le pulega a le falemai le ave’esea o le afioga i le Faipule mai totonu o le Komiti a le Soifua Maloloina, “ina ia le toe tupu se tulaga faapenei”.

Sa taumafai le Samoa News e a’apa atu i le afioga i le Faipule mo sana faamatalaga.

Na aofia foi i totonu o le tusi a le pulega a le Maota o Sui se faamatalaga e faapea, o le toatele o sui o le komiti a le Maota o Sui na auai i lea iloiloga, sa agai lava a latou fesili i mataupu e lima ma na fa’aalia foi lo latou agaga fa’aaloalo i a latou suesuega.

O nisi o lipoti sa talosagaina i le taimi o le iloiloga, e afioga i Faipule, sa faapea ona faaooina atu i le taitaifono o le Komiti o le Soifua Maloloina a le Maota o Sui, i le vaiaso ua tuanai, lea e aofia ai ma lipoti i tupe fa’aalu mai le ARPA, o le faamaoniga o tupe na toe maua mai i tupe ia sa ave faasolitulafono ma teuina i se faletupe i atunuu i fafo, o le tulaga ua o’o iai feutagaiga ma le Chamnade faapea ma tupe ua alu ai; atoa ai ma se lipoti lata mai i le polokalama mo le sailiga o tausimai faapea ma le aofaiga o tupe ua fa’aaluina i le aumaia o tausimai mai Fiti.