Pago Pago - AMERIKA SAMOA

O le amataga o le vaiaso nei, na faia ai se solo tete’e filemu, a le Pulega faapea le aufaigaluega o lo’o mataituina le tausiga o va’a a le malo (ASSA-American Samoa Shipyard Authority), i luma o le Ofisa a le Malo (EOB) i Utulei.

O le ASSA o se matagaluega a le malo o Amerika Samoa, e iai sona vaega, e tutoatasi.

O le solo tete’e filemu a le ASSA, e pei ona sa faatinoina, o le latou tali atu lea i le le tatalaina mai i tua, e le Ofisa o Tupe a le malo, ia sa latou koneteina o iai ni meafaigaluega, seia mae’a ona totogia sa latou lafoga fa’ae’e e $30,000 – pe a ma le 8% o le tau aofai o oloa i totonu o le koneteina.

I se vaitaimi lata mai, na fa’aleoina ai e le Tausitupe ia Doald Kruse, i luga o fa’asausauga a le KVZK-TV, ia le mana’omia i ofisa ma matagaluega uma a le malo, ona totogia lafoga fa’ae’e mo oloa uma, e aumai i totonu o le teritori.

Ma sa fa’amamafaina e Kruse le fa’amalosia o lenei lafoga i ofisa ma matagaluega ma vaega uma o le malo, e fa’amautuina ai le leai o se ofisa ma matagaluega a le malo, e saofia mai i le totogia o nei lafoga.

E le gata i lea, ua ma’oti le aofia ai o  vaega a le malo, e pei o le ASTCA, ASPA ma le falema’i i le totogia o lafoga fa’ae’e.  Ona e taua tele, le tupe aoina mai i nei lafoga, e pei ona saunoa iai le Tausitupe, mo le fa’atupeina o auaunaga ‘ese’ese faapea poloketi e fa’aleleia atili ai le atunu’u, e aofia ai auaunaga fa’alesoifua maloloina, aoaoga, ma femalagaiga.

Ma e na’o le pau le auala e mafai ona ‘alofia ai e se ofisa po o se matagaluega, le totogia o nei lafoga, o le faia lea o se talosaga i le malo.  Ma a taliaina lea talosaga, o le a faapea ona mafai ona tatalaina i tua oloa a se ofisa po o se matagaluega, ae totogi mulimuli a latou lafoga, po o le faia o seisi fuafuaga, e mafai ai ona fa’amagaloina nei lafoga.

Ae peitai, ua fa’amanino mai e Kruse e faapea, ua na o le komiti fa’afoe, o lo’o iai le malosiaga e taliaina ai talosaga mo le ‘alo’ese mai i le totogia o lafoga fa’ae’e.  Ma sa ia faamamafaina mai ai foi e faapea, e le o ia te ia (Tausitupe) ia le paoa po o le malosiaga, e na te talia ai talosaga o ‘alofaga mai i le totogia o lafoga fa’ae’e.  Ma e manino ai le tu’u’ese’eseina o tiute i totonu o le faigamalo.

 I le tali mai a le alii pule a le ASSA ia Carlos Sanchez e tusa ai ma lenei mataupu, sa ia ta’ua ai le “faavalevalea” (stupid) o lenei tulaga, o le fa’alafogaina e le Ofisa o Tupe o seisi lala a le malo.

Ma na saunoa Sanchez, o lo’o feagai le ASSA ma fa’afitauli tau tupe, talu ai o lea fa’ato’a toe tatalaina i le faaiuga o le tausaga ua tuanai ae ua leva ona tapunia.

Sa fa’amatalatalaina e Sanchez mafatiaga o feagai ma le ASSA, ae o lea ua mana’o le malo e fa’aopoopo atu iai ma le totogia o lafoga fa’ae’e, o se tulaga e le o gafatia e le ASSA i le taimi nei.

Fai mai a Sanchez, o Faigamalo e tolu ua mava atu, sa le totogia e la latou matagaluega ia nei lafoga, ona o le maualalo o tupe maua e latou te aoina mai i la latou auaunaga.  Ma o lo latou le totogia o lafoga fa’ae’e, e tulaga ‘ese ai lava la latou ofisa, lea o lo’o gafa ma le fa’aleleia o femalagaiga i luga o le sami ma le atina’eina o tulaga tau i le tamaoaiga.

Sa ta’ua e Sanchez le tele o ni suiga po o tulaga fa’aleleia, ua faia i lo latou laumua, i le fa tausaga ua tuanai atu, lea ua si’itia ai le tulaga o le latou matagaluega.  Ma na mafai ona faia lea tulaga, ona o le tu’uto ma le galulue malosi a le latou aufaigaluega lotoifale.